ໃຫ້ບຸລິມະສິດແກ່ວິສາຫະກິດຫວຽດນາມ ທີ່ລົງທຶນ ແລະດຳເນີນທຸລະກິດຢູ່ ລາວ
ທີ່ການພົບປະກັບທ່ານນາຍົກລັດຖະມົນຕີລາວ ສອນໄຊ ສີພັນດອນ, ສອງຝ່າຍໄດ້ຫວນຄືນການຮ່ວມມືສອງຝ່າຍໃນໄລຍະຜ່ານມາ, ເຫັນດີເປັນເອກະພາບເຮັດໃຫ້ເສົາຄໍ້າການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບເລິກເຊິ່ງກວ່າ, ເປັນບ່ອນອີງອັນໜັກແໜ້ນໃຫ້ແກ່ກັນ; ສືບຕໍ່ຮັກສາຄວາມສະຫງົບ, ສ້າງເສັ້ນຊາຍແດນ ຫວຽດນາມ-ລາວ ແຫ່ງສັນຕິພາບ, ມິດຕະພາບ, ສະຖຽນລະພາບ ແລະພັດທະນາແບບຍືນຍົງ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະສອງຝ່າຍກັບທ່ານ ສອນໄຊ ສີພັນດອນ ນາຍົກລັດຖະມົນຕີລາວ. ພາບ: ສໍານັກຂ່າວສານຫວຽດນາມ |
ນາຍົກລັດຖະມົນຕີສອງທ່ານ ໄດ້ເອົາໃຈໃສ່ເປັນພິເສດ ແລະເຫັນດີເປັນເອກະພາບສືບຕໍ່ສ້າງບາດກ້າວບຸກທະລຸໃນການຮ່ວມມືດ້ານເສດຖະກິດ, ການຄ້າ. ທ່ານ ສອນໄຊ ສີພັນດອນ ຢືນຢັນວ່າ ລາວ ຍາມໃດກໍ່ຖືເປັນສໍາຄັນ ແລະໃຫ້ບຸລິມະສິດແກ່ວິສາຫະກິດຫວຽດນາມ ລົງທຶນ, ດຳເນີນທຸລະກິດຢູ່ລາວ, ພິເສດແມ່ນບັນດາຂົງເຂດຍຸດທະສາດ, ຄື: ພື້ນຖານໂຄງລ່າງ, ພະລັງງານ, ເຕັກໂນໂລຢີສູງ...; ປາດຖະໜາຢາກຊຸກຍູ້ການເຊື່ອມຕໍ່ສອງພື້ນຖານເສດຖະກິດ ລາວ-ຫວຽດນາມ, ຮ່ວມມືປັບປຸງລະບົບກົດໝາຍແນໃສ່ສ້າງຄວາມສະດວກໃຫ້ແກ່ການເຄື່ອນໄຫວດ້ານການຄ້າ ແລະການລົງທຶນ.
ທ່ານນາຍົກລັດຖະມົນຕີ ຟ້າມມິງຈິ໊ງ ຢືນຢັນວ່າ ຫວຽດນາມ ຈະສືບຕໍ່ໃຫ້ບຸລິມະສິດໜູນຊ່ວຍລາວ ຍົກສູງຄຸນນະພາບຊັບພະຍາກອນມະນຸດ, ແນໃສ່ຊ່ວຍລາວ ປັບຕົວກັບຄວາມຕ້ອງການພັດທະນາໃນໄລຍະໃໝ່, ເປັນຕົ້ນແມ່ນການບຳລຸງກໍ່ສ້າງພະນັກງານຍຸດທະສາດ, ພະນັກງານຄຸ້ມຄອງທຸກຂັ້ນ. ນາຍົກລັດຖະມົນຕີສອງທ່ານ ໄດ້ເຫັນດີເປັນເອກະພາບຜັນຂະຫຍາຍການຮ່ວມມືດ້ານວັດທະນະທຳໃຫ້ມີປະສິດທິຜົນຫຼາຍກວ່າ; ສືບຕໍ່ເພີ່ມທະວີການແລກປ່ຽນຄວາມໄວ້ເນື້ອເຊື່ອໃຈ, ແບ່ງປັນຂໍ້ມູນຂ່າວສານຢ່າງທັນການ, ຮ່ວມມືກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນໃນບັນຫາສາກົນ ແລະພາກພື້ນທີ່ຕ່າງຝ່າຍຕ່າງມີຄວາມສົນໃຈ.
ນຳວົງເງິນການຄ້າ ຫວຽດນາມ-ກໍາປູເຈຍ ໃຫ້ບັນລຸ 20 ຕື້ໂດລາສະຫະລັດ ໂດຍໄວ
ທີ່ການພົບປະກັບທ່ານນາຍົກລັດຖະມົນຕີ ກຳປູເຈຍ Hun Manet, ສອງຝ່າຍໄດ້ສະແດງຄວາມປິຕິຊົມຊື່ນຕໍ່ການພັດທະນາຂອງການພົວພັນ ຫວຽດນາມ-ກໍາປູເຈຍ ໃນໄລຍະຜ່ານມາ. ສອງຝ່າຍເຫັນດີເປັນເອກະພາບເພີ່ມທະວີການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ, ສົມທົບກັນຢ່າງແໜ້ນແຟ້ນໃນການຕໍ່ສູ້ສະກັດກັ້ນກົນອຸບາຍມ້າງເພທຳລາຍ, ແບ່ງແຍກການພົວພັນສອງປະເທດຂອງບັນດາອິດທິກໍາລັງປໍລະປັກ; ສົ່ງເສີມ, ສ້າງເງື່ອນໄຂສະດວກໃຫ້ແກ່ການເຄື່ອນໄຫວການລົງທຶນ, ດຳເນີນທຸລະກິດຂອງວິສາຫະກິດສອງປະເທດ, ມານະພະຍາຍາມນໍາວົງເງິນການຄ້າສອງຝ່າຍໃຫ້ບັນລຸ 20 ຕື້ໂດລາສະຫະລັດ ໂດຍໄວໃນໄລຍະຈະມາເຖິງ; ໃຫ້ຄຳໝັ້ນສັນຍາຍູ້ແຮງການເຊື່ອມຕໍ່ການຄົມມະນາຄົມ, ເປັນຕົ້ນແມ່ນຢູ່ເຂດຊາຍແດນ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະສອງຝ່າຍກັບທ່ານ Hun Manet ນາຍົກລັດຖະມົນຕີ ກໍາປູເຈຍ. ພາບ: ສໍານັກຂ່າວສານຫວຽດນາມ |
ນາຍົກລັດຖະມົນຕີສອງທ່ານ ໄດ້ເນັ້ນໜັກເຖິງຄວາມໝາຍ, ຄຸນຄ່າປະຫວັດສາດຂອງການພົວພັນ ຫວຽດນາມ-ລາວ-ກໍາປູເຈຍ; ໂດຍຢືນຢັນວ່າ ຈະສືບຕໍ່ຮັກສາກົນໄກຮ່ວມມືລະຫວ່າງສາມປະເທດໃນທຸກຊ່ອງທາງ, ເພື່ອຜົນປະໂຫຍດຂອງປະຊາຊົນສາມປະເທດ, ເພື່ອສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນກໍ່ຄືໃນໂລກ.
ADB ພ້ອມແລ້ວທີ່ຈະໜູນຊ່ວຍຫວຽດນາມ ບັນລຸການປ່ອຍອາຍພິດລົງລະດັບ 0
ວັນທີ 6 ພະຈິກ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ໃຫ້ການຕ້ອນຮັບທ່ານ Masatsugu Asakawa ປະທານທະນາຄານພັດທະນາອາຊີ (ADB). ທີ່ການຕ້ອນຮັບ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ຂອບໃຈ ADB ທີ່ອຸປະຖຳແຫຼ່ງທຶນສຳຄັນໃຫ້ບັນດາໂຄງການພັດທະນາເສດຖະກິດ-ສັງຄົມ, ພ້ອມທັງຕັ້ງໜ້າປະກອບສ່ວນເຂົ້າໃນການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກຢູ່ຫວຽດນາມ. ທ່ານນາຍົກລັດຖະມົນຕີ ສະເໜີໃຫ້ທະນາຄານ ADB ສືບຕໍ່ອຸປະຖຳແຫຼ່ງທຶນໃຫ້ແກ່ຫວຽດນາມ ດ້ວຍອັດຕາດອກເບ້ຍບຸລິມະສິດກ່ຽວກັບບັນດາຂົງເຂດທີ່ຫາກໍ່ພົ້ນເດັ່ນ, ຄື: ການຫັນເປັນດີຈີຕອນ, ຫັນເປັນສີຂຽວ, cloud computing; ເອົາໃຈໃສ່, ອຸປະຖຳໃຫ້ບັນດາໂຄງການໄຟຟ້າແຮງລົມຢູ່ນອກຝັ່ງທະເລ, ທາງລົດໄຟທີ່ໄດ້ມາດຕະຖານ, ທາງລົດໄຟຕົວເມືອງ...
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ຕ້ອນຮັບທ່ານ Masatsugu Asakawa ປະທານທະນາຄານພັດທະນາອາຊີ (ADB). ພາບ: ສໍານັກຂ່າວສານ ຫວຽດນາມ |
ສ່ວນທ່ານປະທານ ADB Masatsugu Asakawa ໃຫ້ຮູ້ວ່າ ADB ພ້ອມແລ້ວທີ່ຈະໜູນຊ່ວຍຫວຽດນາມ ບັນລຸເປົ້າໝາຍການປ່ອຍອາຍພິດລົງລະດັບ 0 ໃນປີ 2050. ພິເສດໃນນາມສ່ວນຕົວປະທານ ADB ແລະ ADB ຈະສືບຕໍ່ຮ່ວມເດີນທາງກັບຫວຽດນາມ, ແບ່ງປັນບົດຮຽນ ແລະໜູນຊ່ວຍຫວຽດນາມ ໃນການໃຫ້ຄຳປຶກສາດ້ານນະໂຍບາຍ, ເປັນຕົ້ນແມ່ນນະໂຍບາຍມະຫາພາກ, ນະໂຍບາຍເງິນຕາ, ປີການເງິນ, ຮັບປະກັນຄວາມດຸ່ນດ່ຽງໃຫຍ່, ຄວບຄຸມໄພເງິນເຟີ້, ຊຸກຍູ້ການເຕີບໂຕ; ໜູນຊ່ວຍຫວຽດນາມ ໃນການພັດທະນາເສດຖະກິດສີຂຽວ, ເສດຖະກິດດີຈີຕອນ, ເສດຖະກິດໝູນວຽນ, ຍົກສູງກຳລັງແກ່ງແຍ້ງຂອງພື້ນຖານເສດຖະກິດ; ຊ່ວຍໃຫ້ວິສາຫະກິດຫວຽດນາມ ເຂົ້າຮ່ວມຢ່າງເລິກເຊິ່ງກວ່າໃນລະບົບຕ່ອງໂສ້ການສະໜອງທົ່ວໂລກ.
ສ້າງເງື່ອນໄຂສະດວກໃຫ້ບັນດາທ້ອງຖິ່ນຂອງຫວຽດນາມ ແລະຈີນ ເພີ່ມທະວີການຮ່ວມມື
ວັນທີ 6 ພະຈິກ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ໃຫ້ການຕ້ອນຮັບທ່ານ Wang Ning ເລຂາພັກແຂວງຢຸນນານ. ທີ່ການຕ້ອນຮັບ, ທ່ານນາຍົກລັດຖະມົນຕີ ຟ້າມມິງຈິ໊ງ ເນັ້ນໜັກວ່າ ແຂວງຢຸນນານ ມີທີ່ຕັ້ງສຳຄັນຍິ່ງໃນການພົວພັນ ຫວຽດນາມ-ຈີນ. ທ່ານນາຍົກລັດຖະມົນຕີ ສະເໜີໃຫ້ແຂວງຢຸນນານ ນຳໜ້າໃນການປະຕິບັດຄວາມຮັບຮູ້ລວມຂັ້ນສູງ ແລະບັນດາຖະແຫຼງການຮ່ວມ, ເພີ່ມທະວີການພົບປະແລກປ່ຽນກັບທ້ອງຖິ່ນຕ່າງໆຂອງຫວຽດນາມ; ສູ້ຊົນນຳວົງເງິນການຄ້າ ຫວຽດນາມ-ຢຸນນານ ຂຶ້ນເປັນ 5 ຕື້ໂດລາສະຫະລັດ, ນຳແຂວງຢຸນນານ ແລະແຂວງລາວກາຍ ຂອງຫວຽດນາມ ກາຍເປັນສູນເຊື່ອມຕໍ່ແລກປ່ຽນການຄ້າລະຫວ່າງ ຈີນ ກັບອາຊຽນ; ຊຸກຍູ້ການຜັນຂະຫຍາຍການທົດລອງຮູບແບບດ່ານຊາຍແດນອັດສະລິຍະ; ເພີ່ມທະວີການສົມທົບໃນວຽກງານດັດສົມການປ່ອຍນ້ຳຖ້ວມ ແລະສະກັດກັ້ນ, ຕ້ານໄພທຳມະຊາດ.
|
|
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Wang Ning ເລຂາພັກແຂວງຢຸນນານ. ພາບ: ສໍານັກຂ່າວສານຫວຽດນາມ |
ສ່ວນທ່ານ Wang Ning ໄດ້ຢັ້ງຢືນຄວາມປາດຖະໜາຢາກເພີ່ມທະວີການຮ່ວມມືກັບຫວຽດນາມ ໃນບັນດາຂົງເຂດກ່ຽວກັບພະລັງງານສີຂຽວ, ກະສິກຳ, ການທ່ອງທ່ຽວ; ພ້ອມທັງຍູ້ແຮງການຮ່ວມມືດ້ານເສດຖະກິດ, ການຄ້າ, ເສດຖະກິດດ່ານຊາຍແດນ, ຮ່ວມມືພັດທະນາຂະແໜງອາຊີບຜະລິດທີ່ກ້າວໜ້າ; ການຮ່ວມມືບໍາລຸງກໍ່ສ້າງພະນັກງານ, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ປົກປັກຮັກສາສິ່ງແວດລ້ອມ ແລະການພັດທະນາແບບຍືນຍົງ.
* ໃນວັນດຽວກັນ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ໃຫ້ການຕ້ອນຮັບທ່ານ LanTianLi ປະທານເຂດປົກຄອງຕົນເອງ ຊົນເຜົ່າຈວາງ ກວາງຊີ, ຈີນ.
* ວັນທີ 6 ພະຈິກ, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ເຮັດວຽກກັບບາງກຸ່ມບໍລິສັດແຖວໜ້າຂອງ ຈີນ ໃນຂົງເຂດການບິນ, ການບໍລິການ, ກະສິກໍາ, ພື້ນຖານໂຄງລ່າງ, ພະລັງງານ.
ໂດຍ: ເຈິ່ນຮວ່ຽນ