ທ່ານນາຍົກລັດຖະມົນຕີ ຟ້າມມິງຈິງ ແລະພັນລະຍາ ຈັດງານລ້ຽງຕ້ອນຮັບຄະນະທູຕານຸທູດ ເນື່ອງໃນໂອກາດບຸນປີໃໝ່ປະຈຳຊາດຫວຽດນາມ ປີມະເສັງ 2025

ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ  ແລະພັນລະຍາ ຈັດງານລ້ຽງຕ້ອນຮັບຄະນະທູຕານຸທູດ. ພາບ: ສໍານັກຂ່າວສານຫວຽດນາມ.

ກ່າວຄຳເຫັນໃນເຫດການດັ່ງກ່າວ, ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ເນັ້ນໜັກວ່າ ປີ 2025, ຫວຽດນາມຕັ້ງເປົ້າໝາຍເຕີບໂຕປະມານ 8% ແລະສອງຕົວເລກ ຖ້າເງື່ອນໄຂສະດວກ, ສ້າງທ່ວງທ່າ, ກຳລັງໜູນ, ສ້າງບາດກ້າວເພື່ອບັນລຸໄດ້ການເຕີບໂຕສອງຕົວເລກໃນຊຸມປີຕໍ່ໄປ. ໃນເສັ້ນທາງນັ້ນ, ຫວຽດນາມ ປາດຖະໜາວ່າ ຈະສືບຕໍ່ໄດ້ຮັບການສະໜັບສະໜູນ, ການຊ່ວຍເຫຼືອ, ການຮ່ວມມືຢ່າງແໜ້ນແຟ້ນຂອງເພື່ອນມິດສາກົນ, ໃນນັ້ນ ມີບັນດາທ່ານເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າບັນດາອົງການຈັດຕັ້ງສາກົນ, ເພື່ອນຳການພົວພັນມິດຕະພາບ ແລະການຮ່ວມມືລະຫວ່າງສອງຝ່າຍໃຫ້ນັບມື້ນັບພັດທະນາຢ່າງແໜ້ນແຟ້ນ, ເລິກເຊິ່ງ, ແທດຈິງ ແລະມີປະສິດທິຜົນ.  ທ່ານນາຍົກລັດຖະມົນຕີ ຢັ້ງຢືນວ່າ ຫວຽດນາມ ຈະປະກອບສ່ວນສ້າງສັນຕິພາບ, ການຮ່ວມມື, ພັດທະນາ ແລະແກ້ໄຂບັນດາບັນຫາລວມຂອງທົ່ວໂລກຫຼາຍກວ່າອີກ, ປະກອບສ່ວນສ້າງຄວາມເປັນລະບຽບຮຽບຮ້ອຍສາກົນຢ່າງຍຸຕິທຳ, ສະເໝີພາບ ໂດຍອີງຕາມກົດໝາຍສາກົນ, ຮັບໃຊ້ຜົນປະໂຫຍດລວມຂອງມວນມະນຸດ.

ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ  ກ່າວຄຳເຫັນທີ່ງານລ້ຽງ. ພາບ: ສໍານັກຂ່າວສານຫວຽດນາມ.

ທ່ານນາຍົກລັດຖະມົນຕີ ຢັ້ງຢືນວ່າ ຫວຽດນາມ ຈະສ້າງທຸກເງື່ອນໄຂສະດວກທີ່ສຸດເພື່ອໃຫ້ບັນດາເອກອັກຄະລັດຖະທູດ, ຫົວໜ້າຜູ້ຕາງໜ້າບັນດາອົງການຈັດຕັ້ງສາກົນຢູ່ຫວຽດນາມ ບໍ່ພຽງແຕ່ປະຕິບັດໜ້າທີ່ອັນສຳຄັນຂອງຕົນໃຫ້ເປັນຢ່າງດີເທົ່ານັ້ນ, ຫາກຍັງນັບມື້ນັບຮັກປະເທດຊາດ, ຊາວຫວຽດນາມ; ຖືຫວຽດນາມ ເປັນຊາຍຄາແຫ່ງທີສອງຂອງຕົນ, ຮ່ວມແຮງຮ່ວມໃຈສ້າງເຮືອນຫຼັງນັ້ນໃຫ້ນັບມື້ນັບອີ່ມໜຳສຳລານສົມບູນພູນສຸກ ແລະພ້ອມກັນພັດທະນາ.

ໂດຍ: ກວຽດເຕິມ