ທ່ານ ຟ້າມມິງຈິ໊ງ ນາຍົກລັດຖະມົນຕີ ໄປຮອດນະຄອນຄຸນມີງ ເລີ່ມຕົ້ນການປະຕິບັດງານຢູ່ຈີນ

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄປຮອດນະຄອນຄຸນມີງ, ແຂວງຢຸນນານ ເລີ່ມຕົ້ນການເຂົ້າຮ່ວມກອງປະຊຸມສຸດຍອດການຮ່ວມມືອະນຸພາກພື້ນແມ່ນ້ຳຂອງເປີດກວ້າງ (GMS) ຄັ້ງທີ 8. ພາບ: ສໍານັກຂ່າວສານຫວຽດນາມ

ຕອນບ່າຍວັນທີ 5 ພະຈິກ, ທ່ານ ຟ້າມມິງຈິ໊ງ ນາຍົກລັດຖະມົນຕີ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ໄປຖະຫວາຍດອກໄມ້ ແລະຢ້ຽມຢາມເຂດປູຊະນີຍະສະຖານປະຫວັດສາດປະທານໂຮ່ຈີມິນ ຢູ່ນະຄອນຄຸນມີງ. ຢູ່ທີ່ນີ້, ທ່ານ ຟ້າມມິງຈິ໊ງ ໄດ້ຮັບການແນະນຳຈາກການນໍາຄະນະຄຸ້ມຄອງເຂດປູຊະນີຍະສະຖານກ່ຽວກັບວັດຖຸພັນ, ຮູບພາບ, ເອກະສານອັນລໍ້າຄ່າວາດພາບໄລຍະທີ່ປະທານໂຮ່ຈີມິນ ດຳລົງຊີວິດ ແລະເຮັດວຽກຢູ່ທີ່ນີ້ແຕ່ເດືອນກຸມພາ ຫາເດືອນຕຸລາ ປີ 1940 ກ່ອນທີ່ກັບຄືນປະເທດເພື່ອຊີ້ນຳການປະຕິວັດຫວຽດນາມ ໂດຍກົງ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ຢ້ຽມຢາມເຂດປູຊະນີຍະສະຖານປະຫວັດສາດປະທານໂຮ່ຈີມິນ ຢູ່ນະຄອນຄຸນມີງ. ພາບ: ສໍານັກຂ່າວສານຫວຽດນາມ

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ມອບພາບເຄິ່ງຄີງປະທານໂຮ່ຈີມິນ ໃຫ້ເຂດປູຊະນີຍະສະຖານປະຫວັດສາດປະທານໂຮ່ຈີມິນ ຢູ່ນະຄອນຄຸນມີງ. ພາບ: ສໍານັກຂ່າວສານຫວຽດນາມ

ຕອນບ່າຍວັນທີ 5 ພະຈິກ, ຢູ່ນະຄອນຄຸນມີງ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ມີການພົບປະກັບພະນັກງານ, ພາລະກອນອົງການຜູ້ຕາງໜ້າຫວຽດນາມ ປະຈຳ ຈີນ ແລະປະຊາຄົມຊາວຫວຽດນາມ ອາໄສຢູ່ແຂວງຢຸນນານ. ກ່າວຄໍາເຫັນຢູ່ທີ່ນີ້, ທ່ານນາຍົກລັດຖະມົນຕີ ສະແດງຄວາມຂອບໃຈຕໍ່ພັກ, ລັດ ແລະປະຊາຊົນຈີນ ຍາມໃດກໍຖືເປັນສໍາຄັນ, ເອົາໃຈໃສ່ເບິ່ງແຍງດູແລ ແລະຮັກສາສາຍພົວພັນລະຫວ່າງສອງປະເທດເວົ້າລວມ, ສ້າງເງື່ອນໄຂໃຫ້ປະຊາຄົມຊາວຫວຽດນາມ ອາໄສຢູ່ທີ່ນີ້ດຳລົງຊີວິດ, ດຳເນີນທຸລະກິດຖືກກັບກົດໝາຍ ແລະເສີມຂະຫຍາຍຄວາມສາມາດຂອງຕົນໃຫ້ດີທີ່ສຸດ.

ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ແຈ້ງໃຫ້ພໍ່ແມ່ປະຊາຊົນຮັບຊາບກ່ຽວກັບສະພາບການພາຍໃນປະເທດ; ຫວັງວ່າ ພໍ່ແມ່ປະຊາຊົນຈະເສີມຂະຫຍາຍນ້ຳໃຈສາມັກຄີ, ຜ່ານຜ່າຄວາມຫຍຸ້ງຍາກ, ປ່ຽນແປງໃໝ່ປະດິດສ້າງ; ຮັກສາສີສັນວັດທະນະທຳຂອງຊາດ; ປະຕິບັດກົດໝາຍເປັນຢ່າງດີ ແລະເຊື່ອມໂຍງເຂົ້າກັບຊີວິດຢູ່ປະເທດປະຈໍາຖິ່ນ; ຍາມໃດກໍ່ມຸ່ງຫາບ້ານເກີດເມືອງນອນ ແລະປະເທດ; ປະກອບສ່ວນເຂົ້າໃນການພັດທະນາຂອງແຕ່ລະປະເທດ, ເພີ່ມພູນຄູນສ້າງສາຍພົວພັນ ຫວຽດນາມ-ຈີນ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບພະນັກງານ, ພາລະກອນສະຖານກົງສູນໃຫຍ່ຫວຽດນາມ ປະຈຳ ແຂວງຢຸນນານ. ພາບ: ສໍານັກຂ່າວສານຫວຽດນາມ

ທ່ານນາຍົກລັດຖະມົນຕີ ຟ້າມມິງຈິ໊ງ ຕັກເຕືອນພະນັກງານ,  ພາລະກອນອົງການຜູ້ຕາງໜ້າຫວຽດນາມ ປະຈໍາ ຈີນ ເວົ້າລວມ ແລະປະຈໍາ ແຂວງຢຸນນານ ເວົ້າສະເພາະ ຄວນເອົາໃຈໃສ່ເບິ່ງແຍງດູແລສະໜິດຕິດພັນ, ພັດທະນາປະຊາຄົມໃຫ້ເຕີບໃຫຍ່ເຂັ້ມແຂງ; ໜູນຊ່ວຍ ແລະແກ້ໄຂຄຳສະເໜີ, ສິດ ແລະຜົນປະໂຫຍດອັນຊອບທໍາຂອງພໍ່ແມ່ປະຊາຊົນຕາມ; ພິເສດແມ່ນຊ່ວຍເຫຼືອ, ສ້າງເງື່ອນໄຂໃຫ້ພໍ່ແມ່ປະຊາຊົນໃນຍາມທີ່ປະສົບກັບຄວາມຫຍຸ້ງຍາກ, ດ້ວຍຄວາມຮັບຜິດຊອບ ແລະຄວາມຮັກແພງກັນຂອງພີ່ນ້ອງຮ່ວມຊາດ.

ຕອນບ່າຍວັນທີ 5 ພະຈິກ, ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ເຂົ້າຮ່ວມງານບຸນວັດທະນະທຳ ແລະ ການທ່ອງທ່ຽວຫວຽດນາມ ທີ່ໂຮງລະຄອນຢຸນນານ ຢູ່ນະຄອນຄຸນມີງ, ມຸ່ງໄປເຖິງການສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ-ຈີນ ແລະ“ປີແຫ່ງການພົບປະແລກປ່ຽນມະນຸດຊາດ ຫວຽດນາມ-ຈີນ” ໃນປີ 2025. ຢູ່ທີ່ນີ້, ທ່ານນາຍົກລັດຖະມົນຕີ ໄດ້ຢ້ຽມຊົມງານວາງສະແດງຮູບພາບ 40 ແຜ່ນກ່ຽວກັບມໍລະດົກ, ວັດທະນະທຳ ແລະການທ່ອງທ່ຽວຫວຽດນາມ ແລະ ຮັບຊົມລາຍການສະແດງສິລະປະໂດຍນັກສິລະປິນຫວຽດນາມ ແລະ ຈີນ ສະແດງ.

ໂດຍ: ທູຈາງ