ວັນທີ 1 ເມສາ 2025 ນີ້, ຢູ່ກະຊວງປ້ອງກັນປະເທດ, ບັນດາຄອບຄົວການນໍາພັກ-ລັດ ນໍາໂດຍ ທ່ານ ນາງ ນາລີ ສີສຸລິດ ພັນລະຍາປະທານປະເທດແຫ່ງ ສປປ ລາວ ໄດ້ນໍາເອົາເງິນ ແລະ ເຄື່ອງບໍລິໂພກ ມາມອບໃຫ້ກະຊວງປ້ອງກັນປະເທດ ເພື່ອນໍາໄປຊ່ວຍເຫລືອປະເທດມຽນມາ ທີ່ໄດ້ຮັບຜົນກະທົບຢ່າງໜັກໜ່ວງ ຈາກເຫດການແຜ່ນດິນໄຫວ ເຊິ່ງຕາງໜ້າຮັບໂດຍ ທ່ານ ພົນຕີ ສົມພອນ ມິດຕະພອນ ຫົວໜ້າຫ້ອງວ່າການ ກະຊວງປ້ອງກັນປະເທດ ພ້ອມຄະນະ.

leftcenterrightdel
 

ເຄື່ອງທີ່ນໍາມາມອບໃນຄັ້ງນີ້, ປະກອບມີ: ຄອບຄົວການນໍາພັກ-ລັດ ມອບເງິນສົດ 328 ລ້ານ ກີບ, ບໍລິສັດ PSL ເຊີວິສ ຈໍາກັດຜູ້ດຽວ ເງິນສົດ 500 ລ້ານກີບ ແລະເຄື່ອງບໍລິໂພກມູນຄ່າ 150 ລ້ານກີບ.

ໂອກາດນີ້, ທ່ານພົນຕີ ສົມພອນ ມິດຕະພອນ ໄດ້ສະແດງຄວາມຂອບໃຈຕໍ່ຄອບຄົວການນໍາພັກ-ລັດ ແລະ ບໍລິສັດ PSL ເຊີວິສ ຈຳກັດຜູ້ດຽວທີ່ມີຄວາມເປັນຫ່ວງເປັນໄຍ ນໍາເອົາເງິນສົດ ແລະເຄື່ອງບໍລິໂພກມາມອບໃຫ້ກະຊວງປ້ອງກັນປະເທດ ເພື່ອສົ່ງຕໍ່ນໍາໄປຊ່ວຍເຫລືອປະຊາຊົນປະເທດ ມຽນມາ ທີ່ໄດ້ຮັບຜົນກະທົບຈາກເຫດການແຜ່ນດິນໄຫວໃນຄັ້ງນີ້ ເຊິ່ງເປັນການສະແດງເຖິງຄວາມຈິງໃຈ, ຄວາມສາມັກຄີຮັກແພງລະຫວ່າງສອງປະເທດ ສປປ ລາວ-ສສ ມຽນມາ ທີ່ເຄີຍມີມູນເຊື້ອອັນດີງາມມາແລ້ວນັ້ນ, ພ້ອມທັງອວຍພອນໄຊໃຫ້ຈົ່ງມີສຸຂະພາບແຂງແຮງ ດໍາເນີນທຸລະກິດໃຫ້ຈະເລີນກ້າວໜ້າຂຶ້ນໄປເລື້ອຍໆ.

ແຫຼ່ງຄັດຈາກ: ສໍານັກຂ່າວສານປະເທດລາວ