ໄຂວັນບຸນວັດທະນະທໍາ, ກິລາ ແລະທ່ອງທ່ຽວບັນດາເຜົ່າທາງທິດຕາເວັນອອກສ່ຽງເໜືອ 2024

ທ່ານ ຫງວຽນວັນຮຸ່ງ ລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວ ກ່າວຄໍາເຫັນໄຂວັນບຸນ. ພາບ: ຮວ່າຍເຟືອງ.

ເຂົ້າຮ່ວມພິທີມີບັນດາສະຫາຍ: ໂດ໋ວັນຈ໊ຽນ, ກໍາມະການກົມການເມືອງ, ເລຂາທິການທິການສູນກາງພັກ, ປະທານຄະນະກໍາມະການສູນກາງແນວໂຮມປະເທດຊາດຫວຽດນາມ; ຫງວຽນວັນຮຸ່ງ ລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວ; ຫງວຽນກ໊ວກດວ່ານ ເລຂາພັກແຂວງລ້າງເຊີນ.

ລາຍການສະແດງສິລະປະທີ່ພິທີໄຂວັນບຸນ. ພາບ: ຮວ່າຍເຟືອງ.

ກ່າວຄໍາເຫັນທີ່ພິທີໄຂວັນບຸນ, ທ່ານ ຫງວຽນວັນຮຸ່ງ ລັດຖະມົນຕີກະຊວງວັດທະນະທໍາ, ກິລາ ແລະທ່ອງທ່ຽວ ໄດ້ເນັ້ນໜັກວ່າ ໂດຍຮັບຮູ້ຢ່າງເລິກເຊິ່ງເຖິງບົດບາດຂອງວັດທະນະທໍາຕໍ່ການພັດທະນາຂອງປະເທດ, ໃນໄລຍະຜ່ານມາ, ກະຊວງວັດທະນະທໍາ, ກິລາ ແລະທ່ອງທ່ຽວ ໄດ້ໃກ້ຊິດຕິດແທດແຜນນະໂຍບາຍຂອງພັກ, ນະໂຍບາຍ ແລະກົດໝາຍຂອງລັດ ເພື່ອຜັນຂະຫຍາຍ ຫຼາຍກິດຈະກໍາອະນຸລັກຮັກສາ, ເສີມຂະຫຍາຍວັດທະນະທໍາຂອງພໍ່ແມ່ປະຊາຊົນບັນດາເຜົ່າ. ການຈັດຕັ້ງວັນບຸນວັດທະນະທໍາ, ກິລາ ແລະທ່ອງທ່ຽວບັນດາເຜົ່າທາງທິດຕາເວັນອອກສ່ຽງເໜືອ ແມ່ນຫຼັກຖານພະຍານ, ໃນນັ້ນໄດ້ສຸມໃສ່ອະນຸລັກຮັກສາ, ເສີມຂະຫຍາຍຄຸນຄ່າວັດທະນະທໍາທີ່ໂດດເດັ່ນຂອງບັນດາເຜົ່າ, ປະກອບສ່ວນໂຄສະນາພາບພົດຂອງປະເທດ ແລະຊາວຫວຽດນາມ. ດ້ວຍຫົວຂໍ້ “ວັດທະນະທໍາທາງທິດຕາເວັນອອກສ່ຽງເໜືອ - ສີສັນສະເພາະ, ເຊື່ອມໂຍງ ແລະກ້າວໄກ”, ວັນບຸນ ຈະນໍາເອົາການຄົ້ນຫາທີ່ຈັບອົກຈັບໃຈມາໃຫ້ປະຊາຊົນ ແລະແຂກທ່ອງທ່ຽວ”.

ທ່ານ ໂດ໋ວັນຈ໊ຽນ ມອບໃບຍ້ອງຍໍຂອງຄະນະກໍາມະການສູນກາງແນວໂຮມປະເທດຊາດຫວຽດນາມ ໃຫ້ຜູ້ຕາງໜ້າ 8 ຄະນະທີ່ເຂົ້າຮ່ວມວັນບຸນ. ພາບ: ຮວ່າຍເຟືອງ.

ວຍການເຂົ້າຮ່ວມຂອງນັກສິລະປິນ, ນັກສະແດງ, ນັກກິລາທີ່ມາຈາກບັນດາແຂວງ: ບັກຢາງ, ບັກກ້ານ, ກາວບັ່ງ, ຮ່າຢາງ, ຕວຽນກວາງ, ວິ້ງຝຸກ, ທ໊າຍງວຽນ ແລະລ້າງເຊີນ ເປັນຈໍານວນຫຼວງຫຼາຍ, ວັນບຸນໄດ້ດໍາເນີນຫຼາຍກິດຈະກໍາທີ່ຈັບໃຈ ຄື: ການສະແດງ, ນໍາສະເໜີໂດຍຄັດຈາກງານບຸນ, ພິທີດໍາເນີນຊີວິດວັດທະນະທໍາທີ່ເປັນມູນເຊື້ອຂອງຊົນເຜົ່າ; ວາງສະແດງ, ນໍາສະເໜີ ແລະໂຄສະນາຜະລິດຕະພັນວັດທະນະທໍາທີ່ເປັນມູນເຊື້ອຂອງທ້ອງຖິ່ນ; ວາງສະແດງ, ປຸງແຕ່ງ ແລະນໍາສະເໜີວັດທະນະທໍາອາຫານພື້ນເມືອງ; ປະກວດການສະແດງທັກສະຜູ້ນໍາທ່ຽວ; ງານສະແດງສິລະປະມະຫາຊົນ ແລະສະແດງຊຸດອາພອນປະຈໍາເຜົ່າທາງທິດຕາເວັນອອກສ່ຽງເໜືອ; ຈັດການແຂ່ງຂັນກິລາ ແລະການລະຫຼິ້ນພື້ນເມືອງຂອງຊົນເຜົ່າ.

ທີ່ພິທີໄຂວັນບຸນ, ທ່ານ ໂດ໋ວັນຈ໊ຽນ ໄດ້ມອບໃບຍ້ອງຍໍຂອງຄະນະກໍາມະການສູນກາງແນວໂຮມປະເທດຊາດຫວຽດນາມ ໃຫ້ຜູ້ຕາງໜ້າ 8 ຄະນະທີ່ເຂົ້າຮ່ວມວັນບຸນ.

ວັນບຸນຈະດໍາເນີນໄປຈົນເຖິງວັນທີ 4 ພະຈິກ.

ໂດຍ: ໄຊຊະນະ