ການຢ້ຽມຢາມຂອງທ່ານນາຍົກລັດຖະມົນຕີ Mishustin ດໍາເນີນກ່ອນ ແລະເປີດສາກບັນດາກິດຈະກຳສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ ແລະສະຫະພັນລັດເຊຍ (30-1-1950 / 30-1-2025). ນີ້ແມ່ນເຫດການສຳຄັນໃນປະຫວັດສາດການພົວພັນສອງປະເທດ. ໃນໄລຍະທາງ 75 ປີຜ່ານມາ, ການພົວພັນມິດຕະພາບທີ່ເປັນມູນເຊື້ອຫວຽດນາມ-ລັດເຊຍ ໄດ້ຮັບການປັບປຸງຢ່າງບໍ່ຢຸດຢັ້ງ. ພັກ, ລັດ ແລະປະຊາຊົນຫວຽດນາມ ຍາມໃດກໍ່ຖືເປັນສຳຄັນການພົວພັນມິດຕະພາບ, ບໍລິສຸດຜຸດຜ່ອງ, ເຄົາລົບນັບຖືການສະໜັບສະໜູນ ແລະການຊ່ວຍເຫຼືອອັນລ້ຳຄ່າ ເຊິ່ງ ໂຊວຽດ ໃນເມື່ອກ່ອນ ແລະປະຈຸບັນແມ່ນປະເທດລັດເຊຍ ໄດ້ສະຫງວນໃຫ້ແກ່ຫວຽດນາມ. ຫວຽດນາມ ກຳນົດການພົວພັນກັບລັດເຊຍ ມີຄວາມສຳຄັນຍຸດທະສາດ, ຖືລັດເຊຍ ແມ່ນຄູ່ຮ່ວມມືແຖວໜ້າໃນນະໂຍບາຍພົວພັນຕ່າງປະເທດຂອງຫວຽດນາມ. ສ່ວນ ລັດເຊຍ ຖື ຫວຽດນາມ ແມ່ນຄູ່ຮ່ວມມືໄວ້ເນື້ອເຊື່ອໃຈ ແລະແມ່ນໜຶ່ງໃນບັນດາບຸລິມະສິດແຖວໜ້າໃນນະໂຍບາຍພົວພັນຕ່າງປະເທດຂອງລັດເຊຍ ຢູ່ພາກພື້ນອາຊີ-ປາຊີຟິກ.

leftcenterrightdel
ທ່ານ Mikhail Vladimirovich Mishustin ນາຍົກລັດຖະມົນຕີແຫ່ງສະຫະພັນລັດເຊຍ. ພາບ: ຈ່າງວຽນ

ການເຄື່ອນໄຫວແລກປ່ຽນຄະນະ ແລະພົບປະລະຫວ່າງການນຳຂັ້ນສູງຂອງສອງປະເທດໄດ້ດຳເນີນຢ່າງຟົດຟື້ນໃນປີ 2024, ສ້າງພື້ນຖານການເມືອງສຳຄັນເພື່ອຊຸກຍູ້ການຮ່ວມມືສອງຝ່າຍ. ໃນການຢ້ຽມຢາມທາງລັດຖະກິດຫວຽດນາມ ໃນເດືອນມິຖຸນາ 2024 ຂອງທ່ານ Vladimir Putin ປະທານາທິບໍດີລັດເຊຍ, ສອງຝ່າຍໄດ້ຮັບຮອງເອົາຖະແຫຼງການຮ່ວມວ່າດ້ວຍການເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ລັດເຊຍ ເລິກເຊິ່ງຂຶ້ນຕື່ມ. ໃນການໂອ້ລົມສົນທະນາທາງໂທລະສັບກັບທ່ານ ໂຕເລີມ ເລຂາທິການໃຫຍ່, ປະທານປະເທດຫວຽດນາມ ກັບທ່ານ Putin ປະທານາທິບໍດີລັດເຊຍ ໃນເດືອນສິງຫາ 2024; ການຢ້ຽມຢາມລັດເຊຍ ຢ່າງເປັນທາງການຂອງທ່ານ ເຈີ່ນແທັງເໝີນ ປະທານສະພາແຫ່ງຊາດຫວຽດນາມ ໃນເດືອນກັນຍາ 2024 ແລະການພົບປະເຈລະຈາລະຫວ່າງທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ກັບທ່ານ Putin ປະທານາທິບໍດີລັດເຊຍ ເນື່ອງໃນໂອກາດເຂົ້າຮ່ວມກອງປະຊຸມບັນດາການນຳກຸ່ມ BRICS ເປີດກວ້າງຢູ່ Kazan (ລັດເຊຍ) ເດືອນຕຸລາ 2024, ສອງຝ່າຍສືບຕໍ່ຢັ້ງຢືນຄວາມໄວ້ເນື້ອເຊື່ອໃຈຢ່າງສູງດ້ານການເມືອງ ແລະແລກປ່ຽນຢ່າງແທດຈິງກ່ຽວກັບການກຳນົດທິດ ແລະຂົງເຂດລະອຽດ ເພື່ອແນໃສ່ຊຸກຍູ້ການພົວພັນສອງຝ່າຍໃນໄລຍະປະຈຸບັນ. ສອງຝ່າຍປະສານສົມທົບກັນຢ່າງແໜ້ນແຟ້ນໃນຂອບເຂດບັນດາອົງການຈັດຕັ້ງສາກົນ ແລະເວທີປາໄສຫຼາຍຝ່າຍດ້ວຍທັດສະນະຄ້າຍຄືກັນກ່ຽວກັບຫຼາຍບັນຫາສາກົນ ແລະພາກພື້ນ.

ການຮ່ວມມືເສດຖະກິດ, ການຄ້າລະຫວ່າງສອງປະເທດພວມຄ່ອຍໆຟື້ນຟູດ້ວຍວົງເງິນການຄ້າສອງສົ້ນບັນລຸ 3,63 ຕື້ໂດລາສະຫະລັດ ໃນປີ 2023; 11 ເດືອນຂອງປີ 2024 ບັນລຸ 4,1 ຕື້ໂດລາສະຫະລັດ, ເພີ່ມ 27,4% ເມື່ອທຽບໃສ່ໄລຍະດຽວກັນຂອງປີ 2023. ການເຄື່ອນໄຫວສົ່ງອອກບັນລຸ 2,1 ຕື້ໂດລາສະຫະລັດ (ເພີ່ມຂຶ້ນ 35,7%) ແລະການນຳເຂົ້າບັນລຸ 2 ຕື້ໂດລາສະຫະລັດ (ເພີ່ມຂຶ້ນ 29,2%). ບັນດາສິນຄ້າສົ່ງອອກຕົ້ນຕໍ່ຂອງຫວຽດນາມ ໄປຍັງລັດເຊຍ, ລວມມີ: ໂທລະສັບ, ເຄື່ອງເອເລັກໂຕນິກ, ຜະລິດຕະພັນຕ່ຳແຜ່ນຕັດຫຍິບ, ເກີບໜັງ, ກະສິກຳ, ສິນໃນນ້ຳປະເພດຕ່າງໆ...; ບັນດາສິນຄ້າ ນຳເຂົ້າຕົ້ນຕໍລວມມີ: ຖ່ານຫີນ, ເຂົ້າບະເລ, ເຫຼັກ, ຝຸ່ນ, ລົດໂອໂຕ, ເຄື່ອງຈັກ, ວັດຖຸອຸປະກອນປະເພດຕ່າງໆ... ສຳລັບການລົງທຶນ, ໄລ່ສະສົມຈົນຮອດຕົ້ນເດືອນພະຈິກ 2024, ປະຈຸບັນຝ່າຍລັດເຊຍ ມີ 199 ໂຄງການລົງທຶນຢູ່ຫວຽດນາມ ດ້ວຍຍອດຈຳນວນທຶນຈົດທະບຽນປະມານ 990 ລ້ານໂດລາສະຫະລັດ, ຢືນອັນດັບ 26/147 ປະເທດ ແລະເຂດແຄວ້ນລົງທຶນເຂົ້າຫວຽດນາມ, ໄດ້ປະຕິບັດຢູ່ 21/63 ທ້ອງຖິ່ນ. ຫວຽດນາມ ມີ 16 ໂຄງການລົງທຶນຢູ່ລັດເຊຍ ຍັງມີຜົນສັກສິດດ້ວຍຍອດຈຳນວນທຶນຈົດທະບຽນ ບັນລຸ 1,6 ຕື້ໂດລາສະຫະລັດ, ຢືນອັນດັບທີ 4/81 ປະເທດ ແລະເຂດແຄວ້ນຫວຽດນາມ ລົງທຶນ.

ການຮ່ວມມືດ້ານການສຶກສາ-ກໍ່ສ້າງ, ວິທະຍາສາດເຕັກໂນໂລຢີສືບຕໍ່ໄດ້ຮັກສາໃນຂອບເຂດຄະນະກຳມະການຮ່ວມມືການສຶກສາ, ວິທະຍາສາດ ແລະເຕັກໂນໂລຢີ. ສອງປະເທດໄດ້ປະຕິບັດຫຼາຍໂຄງການຄົ້ນຄວ້າ ແລະຖ່າຍຖອດເຕັກໂນໂລຢີ. ການຮ່ວມມືຄົ້ນຄວ້າວິທະຍາສາດໃນຂອບເຂດສູນເຂດຮ້ອນຢູ່ຫວຽດນາມ ນຳມາເຊິ່ງໝາກຜົນຕັ້ງໜ້າຫຼາຍຢ່າງ. ປະຈຸບັນສອງຝ່າຍພວມຜັນຂະຫຍາຍໂຄງການສູນຄົ້ນຄວ້າວິທະຍາສາດ ແລະເຕັກໂນໂລຢີ ນິວເຄຼຍ.

ການຮ່ວມມືດ້ານວັດທະນະທຳ, ກິລາ, ການທ່ອງທ່ຽວໄດ້ຜັນຂະຫຍາຍຢ່າງຕັ້ງໜ້າດ້ວຍການຜັດປ່ຽນກັນຈັດຕັ້ງວັນວັດທະນະທຳຢູ່ຫວຽດນາມ ແລະລັດເຊຍ ປະຈຳປີ ປະກອບສ່ວນເພີ່ມທະວີຄວາມເຂົ້າອົກເຂົ້າໃຈ ແລະມິດຕະພາບລະຫວ່າງປະຊາຊົນສອງປະເທດ. ການຮ່ວມມືທ້ອງຖິ່ນສືບຕໍ່ໄດ້ຮັບການຮັກສາ ແລະເພີ່ມທະວີຜ່ານການແລກປ່ຽນຄະນະຜູ້ແທນ ແລະລົງນາມຂໍ້ຕົກລົງຮ່ວມມືຫຼາຍສະບັບດ້ວຍປະມານ 20 ຄູ່ການພົວພັນລະຫວ່າງບັນດາທ້ອງຖິ່ນຂອງສອງປະເທດໄດ້ຮັບການສ້າງຕັ້ງ.

ບົນພື້ນຖານບັນດາຜົນງານທີ່ບັນລຸໄດ້, ການຢ້ຽມຢາມຫວຽດນາມ ຄັ້ງນີ້ຂອງທ່ານນາຍົກລັດຖະມົນຕີ Mishustin ເພື່ອແນໃສ່ຊຸກຍູ້ການຜັນຂະຫຍາຍບັນດາທິດທາງໃຫຍ່ ເຊິ່ງການນຳຂັ້ນສູງສອງປະເທດໄດ້ແລກປ່ຽນ, ເຫັນດີເປັນເອກະພາບກ່ອນໜ້ານັ້ນ; ວາງອອກມາດຕະການເປີດກວ້າງການຮ່ວມມືໃນຂົງເຂດທີ່ມີຄວາມສາມາດບົ່ມຊ້ອນ, ສ້າງກຳລັງໜູນຊຸກຍູ້ການພົວພັນສອງຝ່າຍ; ພ້ອມທັງຢັ້ງຢືນຄຳໝັ້ນສັນຍາຢ່າງແຮງຂອງທັງສອງຝ່າຍໃນການຮັກສາ ແລະພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ນັບມື້ນັບລົງເລິກ, ແທດຈິງ ແລະມີປະສິດທິຜົນ. ການຢ້ຽມຢາມ ກໍ່ແມ່ນກາລະໂອກາດເພື່ອໃຫ້ຫວຽດນາມ ຢັ້ງຢືນແນວທາງພົວພັນຕ່າງປະເທດ ຢ່າງສະເໝີຕົ້ນສະເໝີປາຍຂອງກອງປະຊຸມໃຫຍ່ ຄັ້ງທີ XIII ຂອງພັກ ກ່ຽວກັບເອກະລາດ, ເປັນເຈົ້າຕົນເອງ, ສັນຕິພາບ, ການຮ່ວມມື ແລະພັດທະນາ, ຫັນການພົວພັນຕ່າງປະເທດເປັນຫຼາຍຮູບຫຼາຍແບບ ແລະຫຼາຍຝ່າຍ, ໃນນັ້ນໃຫ້ບຸລິມະສິດແກ່ບັນດາປະເທດທີ່ມີການພົວພັນມິດຕະພາບທີ່ເປັນມູນເຊື້ອ.

ພວກເຮົາເຊື່ອໝັ້ນວ່າ ການຢ້ຽມຢາມຂອງທ່ານ Mishustin ນາຍົກລັດຖະມົນຕີລັດເຊຍ ຈະປະສົບຜົນສຳເລັດຢ່າງຈົບງາມ, ປະກອບສ່ວນເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດເລິກເຊິ່ງກວ່າເພື່ອເປົ້າໝາຍພັດທະນາ, ປະກອບສ່ວນໃຫ້ແກ່ສັນຕິພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.

ໂດຍ: ແສງເດືອນ