ພົບປະ, ແລກປ່ຽນຄອບຄົວຫວຽດນາມ ກັບນັກສຶກສາລາວ ແລະກໍາປູເຈຍ
ກປ.ອອນໄລ - ໃນວັນທີ 2 ແລະ 3 ພະຈິກ, ຢູ່ແຂວງບິ່ງທ້ວນ, ສະຫະພັນແຮງງານນະຄອນໂຮ່ຈີມິນ ໄດ້ສົມທົບກັບສະຫະພັນແມ່ຍິງນະຄອນ ຈັດຕັ້ງການພົບປະ, ແລກປ່ຽນວັດທະນະທໍາລະຫວ່າງຄອບຄົວຫວຽດນາມ ກັບນັກສຶກສາລາວ ແລະກໍາປູເຈຍ ທີ່ພວມຮໍ່າຮຽນຢູ່ນະຄອນໂຮ່ຈີມິນ.
    |
 |
|
ນັກສຶກສາລາວ, ກໍາປູເຈຍ ແລະຄອບຄົວຫວຽດນາມ ເຂົ້າຮ່ວມລາຍການພົບປະ, ແລກປ່ຽນວັດທະນະທຳ. ພາບ: ສໍານັກຂ່າວສານຫວຽດນາມ |
ນີ້ແມ່ນການເຄື່ອນໄຫວປະຈຳປີແນໃສ່ປະກອບສ່ວນຮັດແໜ້ນນໍ້າໃຈມິດຕະພາບ, ຊຸກຍູ້ສາຍພົວພັນຮ່ວມມືລະຫວ່າງຫວຽດນາມ ກັບລາວ, ກໍາປູເຈຍ ໃຫ້ພັດທະນາຮອບດ້ານ, ຍືນຍົງ.
ທີ່ລາຍການ, ນັກສຶກສາລາວ ແລະກຳປູເຈຍ 160 ຄົນ ທີ່ພວມຮໍ່າຮຽນຢູ່ນະຄອນໂຮ່ຈີມິນ ແລະພໍ່ແມ່ຄອບຄົວຫວຽດນາມ ໄດ້ແລກປ່ຽນ, ແບ່ງປັນຫຼາຍເລື່ອງລາວສະເທືອນໃຈກ່ຽວກັບນໍ້າໃຈສາມັກຄີ, ມິດຕະພາບລະຫວ່າງ 3 ປະເທດຫວຽດນາມ-ລາວ-ກໍາປູເຈຍ. ມີຫຼາຍຄອບຄົວຫວຽດນາມ ໄດ້ໜູນຊ່ວຍ, ຊ່ວຍເຫຼືອນັກສຶກສາລາວ, ກໍາປູເຈຍ ແລະມອບຄວາມຮັກແພງໃຫ້ເຂົາເຈົ້າຄືກັບສະມາຊິກໃນຄອບຄົວໃນໄລຍະທີ່ພວກນ້ອງກຳລັງຮໍ່າຮຽນຢູ່ນະຄອນໂຮ່ຈີມິນ; ນັກສຶກສາລາວ ແລະກໍາປູເຈຍ ຖືວ່າຄອບຄົວຫວຽດນາມ ເປັນເຮືອນແຫ່ງທີສອງຂອງຕົນ. ຄວາມຮັກແພງ, ໜູນຊ່ວຍ, ຊ່ວຍເຫຼືອຂອງບັນດາຄອບຄົວຫວຽດນາມ ໄດ້ກາຍເປັນກຳລັງໜູນອັນໃຫຍ່ຫຼວງຊ່ວຍໃຫ້ນັກສຶກສາຜ່ານຜ່າຄວາມຫຍຸ້ງຍາກ, ຮໍ່າຮຽນດີ; ເຂົ້າໃຈກ່ຽວກັບມູນເຊື້ອວັດທະນະທໍາອັນດີງາມຂອງຊົນຊາດຫວຽດນາມ ຢ່າງເລິກເຊິ່ງກວ່າ, ຜ່ານນັ້ນປະກອບສ່ວນສືບຕໍ່ເພີ່ມພູນຄູນສ້າງນໍ້າໃຈສາມັກຄີ, ມິດຕະພາບ, ມູນເຊື້ອອັນດີງາມລະຫວ່າງ 3 ປະເທດຫວຽດນາມ-ລາວ-ກໍາປູເຈຍ ໃນໄລຍະຈະມາເຖິງ.
ໂດຍ: ເຈິ່ນຮວ່ຽນ