ນັກຂ່າວ: ຂໍທ່ານເອກອັກຄະລັດຖະທູດ ໃຫ້ຮູ້ກ່ຽວກັບຄວາມໝາຍຂອງການຢ້ຽມຢາມໂປໂລຍ ຂອງທ່ານນາຍົກລັດຖະມົນຕີ ຟ້າມມິງຈິິ໊ງ ທີ່ມີຕໍ່ສາຍພົວພັນລະຫວ່າງ ຫວຽດນາມ-ໂປໂລຍ ໃນສະພາບການທີ່ສອງປະເທດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ?
ທ່ານ ຮ່າຮວ່າງຫາຍ ເອກອັກຄະລັດຖະທູດຫວຽດນາມ ປະຈຳ ໂປໂລຍ: ການຢ້ຽມຢາມມີຄວາມໝາຍສຳຄັນໃນການຊຸກຍູ້ການພົວພັນລະຫວ່າງສອງປະເທດໃນໄລຍະຈະມາເຖິງ; ແມ່ນໂອກາດເພື່ອໃຫ້ການນຳຂັ້ນສູງຂອງຫວຽດນາມ ແລະໂປໂລຍ ພົບປະ ແລະປຶກສາຫາລືໂດຍກົງກ່ຽວກັບບັນຫາສຳຄັນ, ຈາກນັ້ນສ້າງຄວາມໄວ້ເນື້ອເຊື່ອໃຈ ແລະສະແດງໃຫ້ເຫັນຄຳໝັ້ນສັນຍາໃນການຮັກສາ ແລະພັດທະນາສາຍພົວພັນແບບຍືນຍົງ ແລະຍາວນານ.
ການຢ້ຽມຢາມໄດ້ດຳເນີນໄປໃນສະພາບການເມືອງສາກົນພວມມີການຜັນແປຢ່າງວ່ອງໄວ, ສັບສົນ ແລະຍາກທີ່ຈະຄາດຄະເນໄດ້. ຫຼາຍຈຸດຮ້ອນຢູ່ໃນໂລກມີຄວາມສ່ຽງຈະແຜ່ລາມຢ່າງກວ້າງຂວາງ, ສົ່ງຜົນກະທົບເຖິງສັນຕິພາບ ແລະສະຖຽນລະພາບຂອງພາກພື້ນ ແລະສາກົນ, ສົ່ງຜົນສະທ້ອນໂດຍກົງເຖິງຫວຽດນາມ ແລະໂປໂລຍ. ການຢ້ຽມຢາມຂອງທ່ານນາຍົກລັດຖະມົນຕີ ຟ້າມມິງຈິ໊ງ ສືບທອດການເຄື່ອນໄຫວພົວພັນຕ່າງປະເທດທີ່ຂະຫຍັນຂັນເຄື່ອນ ແລະຕັ້ງໜ້າຂອງການນຳພັກ, ລັດຫວຽດນາມ ໃນໄລຍະຜ່ານມາ, ເປັນການຢັ້ງຢືນແນວທາງພົວພັນຕ່າງປະເທດເປັນເອກະລາດ, ເປັນເຈົ້າຕົນເອງ, ເປັນຫຼາຍຮູບຫຼາຍແບບ ແລະ ຫຼາຍຝ່າຍ, ເປັນເພື່ອນມິດ, ຄູ່ຮ່ວມມືທີ່ໄວ້ເນື້ອເຊື່ອໃຈ ແລະມີຄວາມຮັບຜິດຊອບຂອງປະຊາຄົມສາກົນ. ການຢ້ຽມຢາມຍັງສະແດງໃຫ້ເຫັນການຕີລາຄາສູງຂອງຫວຽດນາມ ຕໍ່ການພົວພັນມິດຕະພາບທີ່ມີມາແຕ່ດົນນານກັບບັນດາປະເທດເພື່ອນມິດທີ່ເປັນມູນເຊື້ອຢູ່ເອີລົບຕາເວັນອອກກາງ, ໃນນັ້ນມີ ໂປໂລຍ.
    |
 |
|
ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Andrzej Sebastian Duda ປະທານາທິບໍດີໂປໂລຍ ຢູ່ນອກກອງປະຊຸມປະຈໍາປີບັນດາຜູ້ນໍາໜ້າ ຄັ້ງທີ 15 ຂອງເວທີປາໄສເສດຖະກິດໂລກ (WEF) ຢູ່ຈີນ, ເດືອນມິຖຸນາ ປີ 2024. ພາບ: ສໍານັກຂ່າວສານຫວຽດນາມ |
ນັກຂ່າວ: ຂໍທ່ານເອກອັກຄະລັດຖະທູດ ຍົກອອກບາງຈຸດພົ້ນເດັ່ນໃນການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຫຼາຍດ້ານລະຫວ່າງ ຫວຽດນາມ ກັບໂປໂລຍ ໃນໄລຍະ 75 ປີຜ່ານມາ?
ທ່ານ ຮ່າຮວ່າງຫາຍ ເອກອັກຄະລັດຖະທູດຫວຽດນາມ ປະຈຳ ໂປໂລຍ: ຄືດັ່ງພວກເຮົາໄດ້ຮູ້ແລ້ວວ່າ ໂປໂລຍ ໄດ້ສ້າງຕັ້ງການພົວພັນທາງການທູດກັບຫວຽດນາມ ແຕ່ຫົວທີ, ໃນວັນທີ 4 ກຸມພາ ປີ 1950. ປະຊາຊົນໂປໂລຍ ຍາມໃດກໍ່ສະຫງວນອາລົມຈິດອັນດີງາມໃຫ້ແກ່ປະເທດ ແລະປະຊາຊົນຫວຽດນາມ. ໂປໂລຍ ໄດ້ຕັ້ງໜ້າໜູນຊ່ວຍຫວຽດນາມ ໃນໄລຍະສົງຄາມຕໍ່ສູູ້ກຸ້ຊາດ. ໂປໂລຍ ຍັງໄດ້ຊ່ວຍບໍາລຸງກໍ່ສ້າງພະນັກງານ ແລະວິສະວະກອນຫວຽດນາມ ນັບພັນຄົນເພື່ອສ້າງສາປະເທດໃນສະໄໝສັນຕິພາບ. ໃນໄລຍະພະຍາດໂຄວິດ-19 ແຜ່ລະບາດ, ສອງປະເທດໄດ້ຊ່ວຍເຫຼືອເຊິ່ງກັນ ແລະກັນ, ຫວຽດນາມ ໄດ້ສົ່ງຜ້າອັດປາກຊ່ວຍເຫຼືອໂປໂລຍ ແລະໂປໂລຍ ສົ່ງວັກຊິນໂຄວິດ-19 ໄປຍັງຮ່າໂນ້ຍ ຊ່ວຍຫວຽດນາມ. ຫຼັງຈາກນັ້ນແມ່ນການໜູນຊ່ວຍຂອງລັດຖະບານໂປໂລຍ ໃນການຊ່ວຍເຫຼືອຊາວຫວຽດນາມ ປະສົບກັບຄວາມຫຍຸ້ງຍາກ ແລະອົບພະຍົບອອກຈາກຢູແກຼນ. ບັນດາການກະທໍາຊ່ວຍເຫຼືອກັນຄືດັ່ງກ່າວໄດ້ພິສູດໃຫ້ເຫັນວ່າສອງປະເທດເປັນຄູ່ຮ່ວມມືທີ່ຈິງໃຈ ແລະໜູນຊ່ວຍເຊິ່ງກັນ ແລະກັນ.
ທາງດ້ານເສດຖະກິດ-ການຄ້າ, ປະຈຸບັນ ໂປໂລຍ ເປັນຄູ່ຄ້າອັນດັບທີ 1 ຂອງຫວຽດນາມ ຢູ່ເອີລົບຕາເວັນອອກກາງ, ໃນຂະນະທີ່ຫວຽດນາມ ເປັນຄູ່ຄ້າໃຫຍ່ອັນດັບທີ 7 ຂອງໂປໂລຍ ນອກ ອີຢູ. ປະຈຸບັນ, ຊາວຫວຽດນາມ ສາມາດເຂົ້າເຖິງຜະລິດຕະພັນກະສິກຳ ແລະສະບຽງອາຫານຂອງໂປໂລຍ ຢູ່ຮ້ານສັບພະສິນຄ້າ. ໃນຂະນະນັ້ນ, ເຄື່ອງຕໍ່າແຜ່ນຕັດຫຍິບ, ເຂົ້າໜົມ, ທັນຍາຫານ, ຜະລິດຕະພັນກະເສດ... ຂອງຫວຽດນາມ ກໍບໍ່ແປກປະຫຼາດສຳລັບຊາວໂປໂລຍ. ຄຽງຂ້າງນັ້ນ, ຂົງເຂດຮ່ວມມືທີ່ສຳຄັນຂອງການພົວພັນ ຫວຽດນາມ-ໂປໂລຍ ແມ່ນການສຶກສາ-ກໍ່ສ້າງ.
ປະຈຸບັນ, ປະຊາຄົມຊາວຫວຽດນາມ ອາໄສຢູ່ໂປໂລຍ ມີປະມານ 30.000 ຄົນ, ດ້ວຍຈຸດພົ້ນເດັ່ນຫຼາຍຢ່າງ, ຕັ້ງໜ້າເຊື່ອມໂຍງເຂົ້າກັບສັງຄົມໂປໂລຍ, ປະກອບສ່ວນສຳຄັນເຂົ້າໃນການຮັກສາ ແລະພັດທະນາສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືຫຼາຍດ້ານລະຫວ່າງສອງປະເທດ ແລະໄດ້ຮັບການຕີລາຄາຢ່າງຕັ້ງໜ້າຈາກລັດຖະບານໂປໂລຍ.
ນັກຂ່າວ: ຕາມທ່ານເອກອັກຄະລັດຖະທູດ ແລ້ວ, ສອງປະເທດຕ້ອງເຮັດຫຍັງແດ່ເພື່ອເສີມຂະຫຍາຍຄວາມສາມາດບົ່ມຊ້ອນ ແລະທ່າແຮງຂອງແຕ່ລະປະເທດ ເພື່ອແນໃສ່ເພີ່ມທະວີການພົວພັນສອງຝ່າຍໃຫ້ຫຼາຍກວ່າອີກ?
ທ່ານ ຮ່າຮວ່າງຫາຍ ເອກອັກຄະລັດຖະທູດຫວຽດນາມ ປະຈຳ ໂປໂລຍ: ເພື່ອເສີມຂະຫຍາຍຄວາມສາມາດບົ່ມຊ້ອນ ແລະທ່າແຮງຂອງແຕ່ລະປະເທດ, ສອງຝ່າຍຕ້ອງເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ເສີມຂະຫຍາຍປະສິດທິຜົນກົນໄກປຶກສາຫາລື, ເພີ່ມທະວີການແລກປ່ຽນ, ສົມທົບກັນລະຫວ່າງບັນດາອົງການວິຊາສະເພາະຂອງສອງຝ່າຍເພື່ອສາມາດເຂົ້າໃຈຄວາມຕ້ອງການ, ເປົ້າໝາຍຂອງກັນ, ຈາກນັ້ນເລືອກເອົາຂົງເຂດທີ່ຝ່າຍຕ່າງໆມີບຸລິມະສິດ ແລະທ່າແຮງ, ປະກອບສ່ວນໜູນຊ່ວຍພ້ອມກັນພັດທະນາ. ບາງຂົງເຂດພວມພັດທະນາ ແລະມີຄວາມສາມາດບົ່ມຊ້ອນຫຼາຍຢ່າງໃນການຮ່ວມມືລະຫວ່າງສອງປະເທດ, ຄື: ການທ່ອງທ່ຽວ, ການຮ່ວມມືດ້ານວິທະຍາສາດເຕັກໂນໂລຢີ, ປັນຍາປະດິດ, ພະລັງງານທົດແທນ...
ໃນຂົງເຂດການທ່ອງທ່ຽວ, ສອງຝ່າຍຄວນຄິດໄລ່ເຖິງການສ້າງສາຍການບິນໂດຍກົງຄືນໃໝ່ເພື່ອຮັບໃຊ້ຄວາມຕ້ອງການຂອງປະຊາຊົນສອງປະເທດ, ກໍຄືຍູ້ແຮງການດຶງດູດນັກທ່ອງທ່ຽວໂປໂລຍ ມາຢ້ຽມຢາມຫວຽດນາມ. ສໍາລັບຂົງເຂດແຮງງານ, ນີ້ແມ່ນຂົງເຂດຮ່ວມມືທີ່ມີຄວາມສາມາດບົ່ມຊ້ອນຫຼາຍຢ່າງ, ຜູ້ອອກແຮງງານຫວຽດນາມ ແມ່ນເໝາະສົມ ແລະໄດ້ຮອງຮັບຢູ່ຕະຫຼາດແຮງງານໂປໂລຍ. ສະນັ້ນ, ອົງການກ່ຽວຂ້ອງຂອງສອງຝ່າຍຄວນລົງນາມໃນຂໍ້ຕົກລົງດ້ານແຮງງານໂດຍໄວ, ຊຸກຍູ້ການສະໜອງແຮງງານຈາກຫວຽດນາມ ໃຫ້ແກ່ໂປໂລຍ.
|
|
 |
|
ທ່ານ ຮ່າຮວ່າງຫາຍ ເອກອັກຄະລັດຖະທູດຫວຽດນາມ ປະຈຳ ໂປໂລຍ. ພາບ: ສະຖານທູດຫວຽດນາມ ປະຈໍາ ໂປໂລຍ |
ນັກຂ່າວ: ປີນີ້, ຫວຽດນາມ ແລະໂປໂລຍ ສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ, ທ່ານເອກອັກຄະລັດຖະທູດ ສາມາດໃຫ້ຮູ້ບາງແຜນການ ແລະການເຄື່ອນໄຫວທີ່ພົ້ນເດັ່ນເຊິ່ງສອງປະເທດໄດ້ ແລະພວມປະຕິບັດເພື່ອຊຸກຍູ້ການພົບປະແລກປ່ຽນປະຊາຊົນ ແລະເພີ່ມທະວີນໍ້າໃຈມິດຕະພາບ ແລະ ຄວາມເຂົ້າໃຈເຊິ່ງກັນ ແລະກັນລະຫວ່າງປະຊາຊົນສອງປະເທດ?
ທ່ານ ຮ່າຮວ່າງຫາຍ ເອກອັກຄະລັດຖະທູດຫວຽດນາມ ປະຈຳ ໂປໂລຍ: ເພື່ອກະກຽມໃຫ້ເຫດການພິເສດຂອງປີນີ້, ແຕ່ທ້າຍປີ 2024, ສະຖານທູດຫວຽດນາມ ປະຈຳ ໂປໂລຍ ໄດ້ສົມທົບກັບສະຖານທູດໂປໂລຍ ປະຈຳ ຮ່າໂນ້ຍ ຈັດຕັ້ງງານປະກວດອອກແບບໂລໂກ ເນື່ອງໃນໂອກາດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ. ສະຖານທູດຂອງສອງປະເທດ ໄດ້ເລືອກເອົາໂລໂກທີ່ມີຄຸນນະພາບ ແລະມີຄວາມໝາຍຕໍ່ການສະເຫຼີມສະຫຼອງເຫດການພິເສດຂອງການພົວພັນ ຫວຽດນາມ-ໂປໂລຍ. ທ້າຍເດືອນມັງກອນ ປີ 2025, ຄາດວ່າຈະດໍາເນີນງານວາງສະແດງພາບແຕ້ມເພື່ອສະເຫຼີມສະຫຼອງ 80 ປີແຫ່ງວັນຊາດສາທາລະນະລັດສັງຄົມນິຍົມຫວຽດນາມ ແລະ 75 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ.
ພາຍຫຼັງການຢ້ຽມຢາມຂອງທ່ານນາຍົກລັດຖະມົນຕີ ແລະຄະນະຜູ້ແທນຂັ້ນສູງຫວຽດນາມ ຢູ່ໂປໂລຍ, ສະຖານທູດຫວຽດນາມ ປະຈຳ ໂປໂລຍ ຈະສົມທົບກັບສະຖານທູດໂປໂລຍ ປະຈຳ ຮ່າໂນ້ຍ ແລະອົງການທີ່ກ່ຽວຂ້ອງຂອງສອງປະເທດ, ຊາບຊຶມ ແລະຜັນຂະຫຍາຍບັເນື້ອໃນທີ່ການນຳສອງປະເທດບັນລຸໄດ້, ຕັ້ງໜ້າສົມທົບກັນເພື່ອນໍາການພົວພັນຮ່ວມມືລະຫວ່າງ ຫວຽດນາມ-ໂປໂລຍ ໃຫ້ນັບມື້ນັບມີປະສິດທິຜົນ, ເພື່ອຜົນປະໂຫຍດຂອງປະຊາຊົນສອງປະເທດ.
ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!
ໂດຍ: ທູຈາງ