ນັກຂ່າວ: ຂໍທ່ານຮອງລັດຖະມົນຕີ ໃຫ້ຮູ້ກ່ຽວກັບຄຸນຄ່າ ແລະ ບົດບາດຂອງ UNCLOS?

ທ່ານຮອງລັດຖະມົນຕີ ຫງວຽນມິງຫວູ້: UNCLOS ໄດ້ຂະໜານນາມວ່າແມ່ນ “ລັດຖະທຳມະນູນມະຫາສະໝຸດ” ໄດ້ວາງອອກຂອບເຂດນິຕິກຳຢ່າງຮອບດ້ານໃນການດັດປັບທຸກການເຄື່ອນໄຫວຢູ່ທະເລ ແລະມະຫາສະໝຸດ, ກວມກວ່າ 70% ຂອງພື້ນທີ່ໜ້າໂລກ. ສົນທິສັນຍາຍັງແມ່ນພື້ນຖານ ເພື່ອໃຫ້ບັນດາປະເທດຮ່ວມມືໃນການບໍລິຫານມະຫາສະໝຸດຢ່າງເປັນລະບຽບ ແລະຍືນຍົງ. ບາງຈຸດພົ້ນເດັ່ນ ແລະຄວາມໝາຍສຳຄັນຂອງສົນທິສັນຍາ ມີດັ່ງນີ້:

ກ່ອນອື່ນ, UNCLOS ເປັນຄັ້ງທຳອິດທີ່ໄດ້ແກ້ໄຂບັນຫາຂອບເຂດ ແລະລະບຽບການເຂດທະເລຢ່າງຮອບດ້ານ ແລະເຖິງຖອງ, ສ້າງພື້ນຖານໃຫ້ບັນດາປະເທດປະຕິບັດສິດ ແລະດໍາເນີນການເຄື່ອນໄຫວຢູ່ທະເລ. ລະບຽບການກ່ຽວກັບເຂດທະເລທີ່ໄດ້ກຳນົດໄວ້ໃນສົນທິສັນຍາໄດ້ແກ້ໄຂຜົນປະໂຫຍດຂອງບັນດາກຸ່ມປະເທດຕ່າງໆຢ່າງກົມກຽວ, ລວມທັງບັນດາປະເທດແຄມທະເລ, ປະເທດທີ່ບໍ່ມີທະເລທີ່ມັກປະສົບກັບຄວາມເສຍປຽບທາງດ້ານພູມສາດ.

ສົນທິສັນຍາມີຫຼາຍຂໍ້ກຳນົດກ່ຽວກັບການປົກປັກຮັກສາສິ່ງແວດລ້ອມທາງທະເລ ແລະຄົ້ນຄ້ວາວິທະຍາສາດທາງທະເລ - ນີ້ແມ່ນເນື້ອໃນໃໝ່ຢ່າງຄົບຖ້ວນເມື່ອທຽບໃສ່ບັນດາສົນທິສັນຍາສາກົນທາງທະເລຂອງສະຫະປະຊາຊາດ (ສັນຍາ Geneva ກ່ຽວກັບກົດໝາຍວ່າດ້ວຍທະເລ 1958 4 ສະບັບ). ຕາມນັ້ນແລ້ວ, UNCLOS ໄດ້ວາງອອກບັນດາຂອບເຂດນິຕິກຳທີ່ສຳຄັນໃນການປັບປຸງການຄຸ້ມຄອງຊັບພະຍາກອນທາງທະເລ ແລະການອະນຸລັກຮັກສາ, ນຳໃຊ້ຊັບພະຍາກອນດັ່ງກ່າວຢ່າງໝັ້ນຄົງເພື່ອຄົນລຸ້ນຫຼັງ.

leftcenterrightdel
ທ່ານ ຫງວຽນມິງຫວູ້ ຮອງລັດຖະມົນຕີຜູ້ປະຈໍາການກະຊວງການຕ່າງປະເທດຫວຽດນາມ . ພາບ: ຈ່າຫງວຽນ

ສຸດທ້າຍ, ສົນທິສັນຍາໄດ້ກຳນົດລະບົບການແກ້ໄຂຂໍ້ຂັດແຍ່ງຮອບດ້ານພໍສົມຄວນ, ດ້ານໜຶ່ງແມ່ນຢືນຢັນຄືນພັນທະໃນການແກ້ໄຂຂໍ້ຂັດແຍ່ງສາກົນໂດຍສັນຕິວິທີທີ່ກຳນົດໄວ້ໃນກົດບັດ ສປຊ, ອີກດ້ານໜຶ່ງແມ່ນສະໜອງບັນດາຂໍ້ກຳນົດທີ່ລະອຽດກ່ຽວກັບການແກ້ໄຂການຂັດແຍ່ງໂດຍສັນຕິວິທີເຊັ່ນ: ການໄກ່ເກ່ຍ, ກໍາມະການ ຫຼືສານ. ດ້ວຍລະບົບດັ່ງກ່າວ, ບັນດາການຂັດແຍ່ງທີ່ກ່ຽວຂ້ອງກັບການອະທິບາຍ ແລະການນຳໃຊ້ສົນທິສັນຍາຍາມໃດກໍ່ສາມາດແກ້ໄຂໄດ້ຢ່າງທັນການ, ຜ່ານນັ້ນ, ຮັກສາສັນຕິພາບ, ສະຖຽນລະພາບ ແລະສະກັດກັ້ນການປະທະກັນ.

ອາດເວົ້າໄດ້ວ່າ UNCLOS ແມ່ນໜຶ່ງໃນບັນດາຜົນງານໃຫຍ່ທີ່ສຸດຂອງກົດໝາຍສາກົນຂອງປະຊາຄົມສາກົນໃນສະຕະວັດທີ 20, ສົນທິສັນຍາບໍ່ພຽງແຕ່ໄດ້ກຳນົດບັນດາລະບຽບການສາກົນຕາມຮີດຄອງປະເພນີສາກົນເທົ່ານັ້ນ, ຫາກຍັງພັດທະນາມີຄວາມກ້າວໜ້າຂອງກົດໝາຍວ່າດ້ວຍທະເລສາກົນ ເພື່ອແນໃສ່ຕອບສະໜອງທ່າອ່ຽງພັດທະນາໃໝ່ໃນການນໍາໃຊ້, ການຂຸດຄົ້ນທະເລ ແລະມະຫາສະໝຸດ ອີກດ້ວຍ. ມາຮອດປະຈຸບັນ, ສົນທິສັນຍາຍັງມີຄຸນຄ່າທີ່ຄົບຖ້ວນເໝືອນເດີມ ແລະສືບຕໍ່ຢືນຢັນບົດບາດທີ່ຈໍາເປັນຂອງຕົນໃນການຮັກສາຄວາມເປັນລະບຽບຮຽບຮ້ອຍທາງນິຕິກໍາຢູ່ທະເລ ແລະມະຫາສະໝຸດ.

ນັກຂ່າວ: ຂໍຮຽນທ່ານຮອງລັດຖະມົນຕີ, ພາຍຫຼັງ 30 ປີ ນັບແຕ່ UNCLOS ມີຜົນສັກສິດ, ຫວຽດນາມ ໄດ້ປະກອບສ່ວນຫຍັງແດ່ເຂົ້າໃນການພັດທະນາ ແລະປະຕິບັດສົນທິສັນຍາ?

ທ່ານຮອງລັດຖະມົນຕີ ຫງວຽນມິງຫວູ້: ຫວຽດນາມ ຍາມໃດກໍ່ເຂົ້າຮ່ວມຢ່າງຕັ້ງໜ້າ ແລະມີຄວາມຮັບຜິດຊອບໃນການລົງນາມ ແລະປະຕິບັດສົນທິສັນຍາ. ໃນຊຸມປີຜ່ານມາ, ເພື່ອແນໃສ່ປະຕິບັດ UNCLOS, ຫວຽດນາມ ໄດ້ປັບປຸງລະບົບກົດໝາຍວ່າດ້ວຍທະເລ ແລະມະຫາສະໝຸດເທື່ອລະກ້າວ, ປະກາດໃຊ້ບັນດາເອກະສານນິຕິກຳ, ຍຸດທະສາດ, ນະໂຍບາຍ, ແຜນການຮັບໃຊ້ການນຳໃຊ້, ຂຸດຄົ້ນທະເລ ແລະມະຫາສະໝຸດຢ່າງມີປະສິດທິຜົນ ແລະຍືນຍົງຂອງປະເທດ.

ບົນຈິດໃຈເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ, ຫວຽດນາມ ຍາມໃດກໍ່ຖືສົນທິສັນຍາແມ່ນພື້ນຖານສຳຄັນໃນການຜັນຂະຫຍາຍການເຄື່ອນໄຫວຮ່ວມມືຢູ່ທະເລ. ຄຽງຂ້າງນັ້ນ, ຫວຽດນາມ ຍັງເປັນເຈົ້າການ ແລະຕັ້ງໜ້າເຂົ້າຮ່ວມການເຄື່ອນໄຫວໃນຂອບເຂດກົນໄກສາກົນທີ່ສ້າງຂຶ້ນຕາມສົນທິສັນຍາ, ວາງອອກຫຼາຍຂໍ້ລິເລີ່ມທີ່ໄດ້ຮັບການຮັບຮູ້ຈາກປະຊາຄົມສາກົນ, ຜ່ານນັ້ນຍົກສູງບົດບາດຂອງຫວຽດນາມ ໃນເວທີສາກົນເທື່ອລະກ້າວ.

ເຫັນໄດ້ວ່າ, ການປະກອບສ່ວນເຂົ້າໃນການສ້າງ ແລະພັດທະນາ UNCLOS, ຫວຽດນາມ ຍາມໃດກໍ່ສະແດງໃຫ້ເຫັນບົດບາດເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບຂອງສົນທິສັນຍາ, ຍາມໃດກໍ່ຍົກສູງຄຸນຄ່າ, ເຄົາລົບ ແລະປະຕິບັດສົນທິສັນຍາຢ່າງຄົບຖ້ວນ, ພ້ອມທັງຢືນຢັນທີ່ຕັ້ງ, ບົດບາດ ແລະຄວາມຕັ້ງໜ້າ, ເປັນເຈົ້າການຂອງຫວຽດນາມ ໃນເວທີສາກົນ.

ນັກຂ່າວ: ສະນັ້ນ ໃນໄລຍະຈະມາເຖິງ, ຫວຽດນາມ ຈະປະກອບສ່ວນຫຍັງແດ່ໃຫ້ແກ່ການຍົກສູງ ແລະປະຕິບັດສົນທິສັນຍາສະບັບນີ້, ຂໍຮຽນທ່ານຮອງລັດຖະມົນຕີ?

ທ່ານຮອງລັດຖະມົນຕີ ຫງວຽນມິງຫວູ້: ໃນໄລຍະຈະມາເຖິງ, ຫວຽດນາມ ຈະມານະພະຍາຍາມຜັນຂະຫຍາຍບັນດາໜ້າທີ່ໃຫ້ປະສົບຜົນສໍາເລັດ ເພື່ອແນໃສ່ສືບຕໍ່ສະແດງໃຫ້ເຫັນການຖືເປັນສໍາຄັນ, ປະຕິບັດ UNCLOS ຢ່າງຄົບຖ້ວນ, ສະແດງໃຫ້ເຫັນພາບພົດຂອງຫວຽດນາມ ໃນສະຕະວັດທີ 20, ເປັນເພື່ອນມິດທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ມີຄວາມຮັບຜິດຊອບຂອງປະຊາຄົມສາກົນ.

ທີໜຶ່ງ, ຫວຽດນາມ ສືບຕໍ່ປະກາດໃຊ້ບັນດານະໂຍບາຍ, ປັບປຸງລະບົບກົດໝາຍແຫ່ງຊາດທີ່ກ່ຽວຂ້ອງເຖິງທະເລ, ໝູ່ເກາະໃຫ້ສົມບູນເພື່ອມຸ່ງໄປສູ່ການພັດທະນາແບບຍືນຍົງ, ຕອບສະໜອງຄວາມຮຽກຮ້ອງກ່ຽວກັບການປົກປັກຮັກສາອະທິປະໄຕທະເລ, ໝູ່ເກາະ ແລະຮັບປະກັນໃຫ້ສອດຄ່ອງກັບກົດໝາຍສາກົນ, ໃນນັ້ນມີ UNCLOS.

ທີສອງ, ຫວຽດນາມ ຍາມໃດກໍ່ຍົກສູງຈິດໃຈເຄົາລົບກົດໝາຍ ແລະຖືສົນທິສັນຍາແມ່ນພື້ນຖານນິຕິກຳເພື່ອດຳເນີນການເຄື່ອນໄຫວຢູ່ທະເລ, ໃນນັ້ນມີການແກ້ໄຂການແກ່ງແຍ້ງທາງທະເລກັບບັນດາປະເທດບ້ານໃກ້ເຮືອນຄຽງໂດຍສັນຕິວິທີ, ມຸ່ງໄປເຖິງການບໍລິຫານບັນດາເຂດທະເລໃຫ້ມີສັນຕິພາບ ແລະຍືນຍົງ, ໃນນັ້ນມີທະເລຕາເວັນອອກ.

ທີສາມ, ຫວຽດນາມ ຕັ້ງໜ້າເຂົ້າຮ່ວມ, ປະກອບສ່ວນຢ່າງແທດຈິງຢູ່ເວທີປາໄສກົດໝາຍວ່າດ້ວຍທະເລ ແລະມະຫາສະໝຸດ ຄື: ກອງປະຊຸມບັນດາປະເທດສະມາຊິກ UNCLOS, ກອງປະຊຸມມະຫາສະໝຸດສະຫະປະຊາຊາດ, ກໍ່ຄືສືບຕໍ່ປະກອບສ່ວນເຂົ້າໃນບັນດາບັນຫາທີ່ພວມໄດ້ຮັບຄວາມສົນໃຈຈາກປະຊາຄົມສາກົນ, ໃນນັ້ນມີການປ່ຽນແປງດິນຟ້າອາກາດ, ການອະນຸລັກ ແລະການນໍາໃຊ້ຊັບພະຍາກອນ ແລະຊີວະນາໆພັນໃນມະຫາສະໝຸດແບບຍືນຍົງ.

ທີສີ່, ຫວຽດນາມ ຍັງຮຽກຮ້ອງໃຫ້ບັນດາປະເທດ ສືບຕໍ່ຮັບຮອງ ແລະເຂົ້າຮ່ວມສົນທິສັນຍາ, ພ້ອມທັງຊຸກຍູ້ການປະຕິບັດບັນດາຂໍ້ກຳນົດຂອງສົນທິສັນຍາຢ່າງຄົບຖ້ວນເພື່ອໃຫ້ UNCLOS ສືບຕໍ່ເສີມຂະຫຍາຍບົດບາດເປັນຂອບເຂດນິຕິກຳທີ່ຮອບດ້ານເພື່ອດັດປັບທຸກການເຄື່ອນໄຫວຢູ່ທະເລ ແລະມະຫາສະໝຸດ.

ສຸດທ້າຍ, ຫວຽດນາມ ຈະສືບຕໍ່ເພີ່ມທະວີການພົວພັນຮ່ວມມືກັບບັນດາອົງການນິຕິບັນຍັດສາກົນ, ພິເສດແມ່ນບັນດາອົງການວິຊາສະເພາະກ່ຽວກັບມະຫາສະໝຸດ ແລະກົດໝາຍວ່າດ້ວຍທະເລ ໃຫ້ເຂົ້າສູ່ລວງເລິກ ແລະແທດຈິງກວ່າອີກ.

ນັກຂ່າວ: ຂໍຂອບໃຈທ່ານຮອງລັດຖະມົນຕີ!

ໂດຍ: ຈາງຫງວຽນ