ທະຫານເມືອງທ່າແຂກ ເປັນເຈົ້າການຕ້ານ-ແກ້ໄຂປະກົດການຫຍໍ້ທໍ້
ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20/01/1949 - 20/01/2019) ທີ່ໃກ້ຈະມາເຖິງໃນມໍ່ໆນີ້, ທ່ານພັນໂທ ສຸລິຍົງ ພວງພັກດີ ຫົວໜ້າການເມືອງກອງບັນຊາການທະຫານເມືອງທ່າແຂກ ໄດ້ກ່າວສະແດງຄວາມຮູ້ສຶກດີໃຈໃນການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ໂດຍພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ທີ່ໄດ້ເອົາໃຈໃສ່ປະກອບສ່ວນໃນການປົກປັກຮັກສາ ແລະສ້າງສາພັດທະນາປະເທດຊາດ ຕາມທິດກ້າວຂຶ້ນສັງຄົມນິຍົມ, ສາມາດປົກປັກຮັກສາໄດ້ສະຖຽນລະພາບທາງດ້ານການເມືອງ, ຮັກສາຜືນແຜ່ນດິນອັນຄົບຖ້ວນໄວ້ໄດ້ຢ່າງໝັ້ນຄົງ, ເສດຖະກິດແຫ່ງຊາດມີການຂະຫຍາຍຕົວຢ່າງຕໍ່ເນື່ອງ ແລະໝັ້ນທ່ຽງ.
ໄປຄຽງຄູ່ກັນນັ້ນກອງບັນຊາການທະຫານເມືອງທ່າແຂກ ໄດ້ຮັບການສ້າງຕັ້ງຂຶ້ນໃນວັນທີ 10 ພະຈິກ 1963 ຢູ່ເຂດຫົວດົງຊອກ ເມືອງທ່າແຂກ ໂດຍມີຈຳນວນພົນທັງໝົດ 12 ທ່ານ ເຊິ່ງຜູ້ບັນຊາການແມ່ນທ່ານເພັງ ແລະ ທ່ານລານ. ກອງບັນຊາການທະຫານເມືອງທ່າແຂກ ໄດ້ເຄື່ອນໄຫວຕີສັດຕູຫລາຍບັ້ນຮົບ, ຫລາຍບັ້ນຕີ ແລະໄດ້ຮັບໄຊຊະນະເປັນກ້າວໆມາ. ໃນໄລຍະນັ້ນທັງເຮັດໜ້າທີ່ປັບປຸງກຳລັງ ແລະກໍ່ສ້າງກຳລັງໄດ້ມີຄວາມເຕີບໃຫຍ່ເຂັ້ມແຂງຕະຫລອດມາສາມາດເຮັດສຳເລັດໃນສອງໜ້າທີ່ຍຸດທະສາດຄື: ປົກປັກຮັກສາ ແລະສ້າງສາພັດທະນາປະເທດຊາດເຮັດໃຫ້ເມືອງທ່າແຂກມີສະຖຽນລະພາບທາງດ້ານການເມືອງ, ທົ່ວສັງຄົມມີຄວາມສະຫງົບປອດໄພ, ຮຸ່ງເຮືອງສິວິໄລ ແລະຍຸຕິທຳ.
|
|
ທ່ານ ພັນໂທ ສຸລິຍົງ ພວງພັກດີ. ພາບ: kpl.gov.la. |
ກອງບັນຊາການທະຫານເມືອງທ່າແຂກ ປະກອບມີ 1 ອົງການ, ມີ 4 ພະແນກການ ແລະມີ 25 ຂະແໜງການ, ມີ 1 ໝວດເອກະລາດ, ມີ 11 ກອງຮ້ອຍກອງຫລອນທີ່ຂຶ້ນກັບ. ເຮັດໜ້າທີ່ເປັນເສນາທິການໂດຍກົງໃຫ້ຄະນະພັກ, ຄະນະບັນຊາຂັ້ນເທິງເປັນເຈົ້າການຕ້ານ ແລະແກ້ໄຂປະກົດການຫຍໍ້ທໍ້ທີ່ເກີດຂຶ້ນ, ນາຍ ແລະພົນທະຫານໄດ້ປະກອບສ່ວນເຂົ້າໃນການສ້າງສາພັດທະນາເມືອງທ່າແຂກ ໃຫ້ກາຍເປັນເມືອງເທດສະບານ. ເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງກອງທັບຄົບຮອບ 70 ປີ, ທາງກອງບັນຊາການທະຫານເມືອງທ່າແຂກ ໄດ້ສຸມໃສ່ເຮັດວຽກງານການເມືອງນຳພາແນວຄິດໃນກຳລັງທົ່ວກອງບັນຊາການໃຫ້ມີຄວາມອຸ່ນອ່ຽນ, ທຸ່ນທ່ຽງຫ້າວຫັນຕໍ່ໜ້າທີ່ວຽກງານ ແລະເຮັດສຳເລັດໜ້າທີ່ຢ່າງເຂັ້ມງວດ.
ພ້ອມນັ້ນ, ໄດ້ເອົາໃຈໃສ່ປັບປຸງກົມກອງເປັນຕົ້ນແມ່ນຫ້ອງການ, ເຮືອນພັກເຊົາ, ສະໂມສອນ, ເຮືອນຄົວໃຫ້ເປັນລະບຽບ, ສ້າງຂະບວນການອະນາໄມ, ປະດັບປະດາໃຫ້ມີຄວາມສະອາດຈົບງາມພ້ອມກັບການສ້າງຂະບວນການກິລາໃຫ້ເປັນຂະບວນການຟົດຟື້ນເພື່ອຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວຄົບຮອບ 70 ປີ.
ຂ່າວ: ມະນີວັນ