5 ປະເທດອອກຖະແຫຼງການຮ່ວມກ່ຽວກັບການຢຸດຍິງຢູ່ໃນລີບີ
ຫວ່າງມໍ່ໆມານີ້, ສ ອາເມລິກາ, ອັງກິດ, ຝຣັ່ງ, ອີຕາລີ ແລະ ສະຫະລັດອາຣັບ ເອມີເຣດ (UAE) ໄດ້ອອກຖະແຫຼງການຮ່ວມໂດຍຮຽກຮ້ອງໄປຍັງຝ່າຍຕ່າງໆທີ່ເຂົ້າຮ່ວມການພິພາດຢູ່ໃນປະເທດລີບີ ໃຫ້ຢຸດຍິງທັນທີ ແລະເປີດການສືບສວນສອບສວນກ່ຽວກັບເຫດການໂຈມຕີເມື່ອບໍ່ດົນມານີ້ ທີ່ນະຄອນເບນກາຊີ ທີ່ໄດ້ສົ່ງຜົນໃຫ້ເຈົ້າໜ້າທີ່ຂອງສະຫະປະຊາຊາດ ເສຍຊີວິດ 3 ຄົນ .
ຖະແຫຼງການຮ່ວມດັ່ງກ່າວ ລະບຸວ່າທັງຫ້າປະເທດກ່າວປະນາມຢ່າງແຂງແຮງຕໍ່ເຫດການໂຈມຕີທີ່ເກີດຂຶ້ນເມື່ອວັນທີ 10 ສິງຫາ ຢູ່ທີ່ນະຄອນເບນກາຊີ ພ້ອມທັງເນັ້ນໜັກວ່າຕ້ອງໄດ້ພິສູດໃຫ້ເຫັນທັນທີກ່ຽວກັບສະພາບ ກໍ່ຄືກຳນົດເຖິງຊື່ສຽງຂອງຜູ້ກໍ່ເຫດທີ່ປະຕິບັດການໂຈມຕີ ແລະນຳເອົາບັນດາເປົ້າໝາຍຜູ້ກໍ່ເຫດມາລົງໂທດ. ຖະແຫຼງການຮ່ວມນັ້ນ ກໍ່ໄດ້ຢືນຢັນອີກເທື່ອໜຶ່ງເຖິງການສະໜັບສະໜູນຂອງ ສ ອາເມລິກາ, ອັງກິດ, ຝຣັ່ງ, ອີຕາລີ ແລະ UAE ທີ່ມີຕໍ່ພາລະກິດຂອງຄະນະສະຫະປະຊາຊາດຢູ່ໃນລີບີ.
    |
 |
|
ພາບປະກອບຈາກ: ສໍານັກຂ່າວສານຫວຽດນາມ. |
ໃນປັດຈຸບັນນີ້, ນະຄອນເບນກາຊີ ຢູ່ພາຍໃຕ້ການຄວບຄຸມຂອງກອງກຳລັງທີ່ຂະໜານນາມດ້ວຍຕົນເອງວ່າເປັນກອງທັບແຫ່ງຊາດລີບີ (LNA) ພາຍໃຕ້ການນຳພາຂອງນາຍພົນ ຄາລີຟາ ຮາຟຕາ. ນັບແຕ່ຕົ້ນເດືອນເມສາປີນີ້ ເປັນຕົ້ນມາ LNA ໄດ້ດຳເນີນການໂຈມຕີຫຼາຍເທື່ອເພື່ອຍາດເອົາສິດຄວບຄຸມນະຄອນຫຼວງຕຣີໂປລີ ຈາກລັດຖະບານສາມັກຄີແຫ່ງຊາດ (GNA) ຂອງລີບີ ທີ່ໄດ້ຮັບການຮັບຮູ້ຈາກສາກົນ.
ອົງການອະນາໄມໂລກ (WHO) ໃຫ້ຮູ້ວ່າການຍິງຕໍ່ສູ້ຢູ່ໃນລີບີ ນັບແຕ່ເດືອນເມສາເປັນຕົ້ນມາ ໄດ້ເຮັດໃຫ້ມີຜູ້ເສຍຊີວິດ 1.000 ກວ່າຄົນ, ບາດເຈັບ 5.700 ຄົນ ແລະມີ 120.000 ກວ່າຄົນຕ້ອງອົບພະຍົບໜີໄພຮຸນແຮງ.
ຂ່າວ: ວຽງຈັນໃໝ່