ທ່ານ ສະເຫຼີມໄຊ ກົມມະສິດ ຕີລາຄາສູງບົດບາດນໍາພາ, ຄວາມສາມາດຊັກຈູງຂອງຫວຽດນາມ ໃນຖານະຕໍາແໜ່ງເປັນປະທານອາຊຽນ 2020, ກໍ່ຄືບັນດາການປະກອບສ່ວນຂອງຫວຽດນາມ ໃນການຍົກສູງບົດບາດຂອງອາຊຽນໃນເວທີປາໄສພາກພື້ນ ແລະສາກົນ.
ຕອນບ່າຍວັນທີ 15 ພະຈິກ, ພາຍຫຼັງກອງປະຊຸມສຸດຍອດອາຊຽນ ຄັ້ງທີ 37 ແລະບັນດາກອງປະຊຸມທີ່ກ່ຽວຂ້ອງ, ນັກຂ່າວສໍານັກຂ່າວສານຫວຽດນາມ ປະຈໍາ ນະຄອນຫຼວງວຽງຈັນ ໄດ້ມີການສໍາພາດທ່ານ ສະເຫຼີມໄຊ ກົມມະສິດ ລັດຖະມົນຕີການຕ່າງປະເທດລາວ ກ່ຽວກັບໝາກຜົນຂອງກອງປະຊຸມ ກໍ່ຄືບົດບາດຂອງຫວຽດນາມ ໃນຖານະຕໍາແໜ່ງເປັນປະທານອາຊຽນ.
|
|
ທ່ານ ສະເຫຼີມໄຊ ກົມມະສິດ ລັດຖະມົນຕີການຕ່າງປະເທດລາວ ໃຫ້ສໍາພາດຕໍ່ນັກຂ່າວສໍານັກຂ່າວສານຫວຽດນາມ ປະຈໍາ ສປປ ລາວ. ພາບ: ສໍານັກຂ່າວສານຫວຽດນາມ. |
ຕີລາຄາກ່ຽວກັບບັນດາໝາກຜົນສໍາຄັນທີ່ສຸດທີ່ບັນລຸໄດ້ຢູ່ກອງປະຊຸມສຸດຍອດອາຊຽນ ຄັ້ງທີ 37 ແລະບັນດາກອງປະຊຸມທີ່ກ່ຽວຂ້ອງ, ທ່ານ ສະເຫຼີມໄຊ ກົມມະສິດ ຖືວ່າ ຫວຽດນາມ ດໍາລົງຕໍາແໜ່ງເປັນປະທານອາຊຽນ 2020 ໃນສະພາບການທີ່ພາກພື້ນ ແລະໂລກ ພວມປະເຊີນໜ້າກັບບັນດາສິ່ງທ້າທາຍທີ່ບໍ່ເຄີຍມີມາກ່ອນ, ພິເສດເມື່ອພະຍາດໂຄວິດ-19 ພວມຜັນແປຢ່າງສັບສົນໃນທົ່ວໂລກ.
ໂດຍບໍ່ຫົວຊາຕໍ່ບັນດາສິ່ງທ້າທາຍອັນໃຫຍ່ຫຼວງ ແລະຕ້ອງຈັດຕັ້ງບັນດາການປະຊຸມຕາມແບບວິທີບໍ່ເຄີຍປະຕິບັດມາໃນປະຫວັດສາດຂອງອາຊຽນ, ຫວຽດນາມ ບໍ່ພຽງແຕ່ປະຕິບັດບົດບາດເປັນປະທານອາຊຽນຢ່າງມີປະສິດທິຜົນເທົ່ານັ້ນຫາກຍັງປະຕິບັດສໍາເລັດທຸກເປົ້າໝາຍຕາມແຜນການທີ່ໄດ້ວາງອອກອີກດ້ວຍ.
ທ່ານ ສະເຫຼີມໄຊ ກົມມະສິດ ໃຫ້ຂໍ້ສັງເກດວ່າ ໃນປີ 2020, ພາກພື້ນ ແລະໂລກຕ້ອງປະເຊີນໜ້າກັບການແຜ່ລະບາດຂອງພະຍາດໂຄວິດ-19, ເຖິງຢ່າງໃດກໍ່ຕາມເມື່ອທຽບໃສ່ບັນດາພາກພື້ນອື່ນ, ອາຊຽນໄດ້ປະຕິບັດວຽກງານປ້ອງກັນ, ຕ້ານ, ຄວບຄຸມພະຍາດໂຄວິດ-19 ໄດ້ເປັນຢ່າງດີ, ສິ່ງນີ້ແມ່ນຍ້ອນການນໍາພາຂອງຫວຽດນາມ, ອາຊຽນ ໄດ້ມີບັນດາຂໍ້ລິເລີ່ມ, ຄືການສ້າງຕັ້ງກອງທຶນຮັບມືກັບພະຍາດໂຄວິດ-19 ແນໃສ່ລະດົມແຫຼ່ງທຶນຈາກຫຼາຍປະເທດໃນໂລກເພື່ອສ້າງງົບປະມານປ້ອງກັນ, ຕ້ານພະຍາດໂຄວິດ-19, ສ້າງຄັງແຮຢາປົວພະຍາດ ແລະອຸປະກອນການແພດສໍາລັບພາວະສຸກເສີນດ້ານສາທາລະນະສຸກພາກພື້ນອາຊຽນ ແລະສູນອາຊຽນກ່ຽວກັບການຮັບມືກັບພາວະສຸກເສີນດ້ານສາທາລະນະສຸກ ສາທາລະນະ ແລະໂລກລະບາດທີ່ເກີດຂຶ້ນໃໝ່... ນີ້ແມ່ນບັນດາສິ່ງເຊິ່ງຫຼາຍພາກພື້ນອື່ນໃນໂລກຍັງບໍ່ທັນເຮັດໄດ້, ແຕ່ອາຊຽນເຮັດໄດ້ ແລະກໍ່ແມ່ນໜຶ່ງໃນບັນດາຜົນງານພົ້ນເດັ່ນ ເຊິ່ງອາຊຽນ ເຮັດໄດ້ພາຍໃຕ້ການນໍາພາຂອງຫວຽດນາມ.
ກ່ຽວກັບການປະກອບສ່ວນພົ້ນເດັ່ນຂອງຫວຽດນາມ ໃຫ້ອາຊຽນໃນປີ 2020, ທ່ານ ສະເຫຼີມໄຊ ກົມມະສິດ ໃຫ້ຮູ້ວ່າ ເຖິງວ່າພະຍາດໂຄວິດ-19 ເຮັດໃຫ້ການໄປມາຫາສູ່ກັນປະສົບຄວາມຫຍຸ້ງຍາກ, ແຕ່ພາຍໃຕ້ການນໍາພາຂອງຫວຽດນາມ, ບັນດາກອງປະຊຸມຂອງອາຊຽນ, ເຖິງວ່າຂັ້ນຊ່ຽວຊານ ຫຼື ຂັ້ນສູງ, ຍັງໄດ້ຮັບການຈັດຕັ້ງເປັນຢ່າງດີ, ສິ່ງນີ້ໄດ້ຊ່ວຍໃຫ້ຫວຽດນາມ ປະຕິບັດສໍາເລັດທຸກເປົ້າໝາຍ, ຈຸດປະສົງທີ່ໄດ້ວາງອອກໃນອາຍຸການເປັນປະທານອາຊຽນ 2020.
ທ່ານ ສະເຫຼີມໄຊ ກົມມະສິດ ກໍ່ຕີລາຄາສູງບົດບາດຂອງຫວຽດນາມ ໃນຖານະຕໍາແໜ່ງເປັນປະທານອາຊຽນ ກໍ່ຄືຖານະຕໍາແໜ່ງກໍາມະການບໍ່ປະຈໍາການສະພາຄວາມໝັ້ນຄົງສະຫະປະຊາຊາດ. ພິເສດ, ໃນຖານະຕໍາແໜ່ງເປັນປະທານອາຊຽນ 2020, ຫວຽດນາມ ໄດ້ພະຍາຍາມນໍາເອົາບັນດາບັນຫາຂອງອາຊຽນໄປປຶກສາຫາລືຢູ່ສະຫະປະຊາຊາດ, ພິເສດແມ່ນຢູ່ສະພາຄວາມໝັ້ນຄົງ, ຊ່ວຍສະຫະປະຊາຊາດ ກໍ່ຄືປະຊາຄົມສາກົນມີຄວາມເຂົ້າໃຈຢ່າງຈະແຈ້ງກວ່າກ່ຽວກັບບົດບາດຂອງອາຊຽນ, ສິ່ງນີ້ບໍ່ພຽງແຕ່ຊ່ວຍຍົກສູງບົດບາດຂອງຫວຽດນາມ ແລະອາຊຽນໃນເວທີສາກົນ.
ໂດຍ: ເຈິ່ນຮວ່ຽນ