ກອງປະຊຸມສຸດຍອດອາຊຽນ-ສະຫະປະຊາຊາດ ຄັ້ງທີ 11
ກປ.ອອນໄລ - ວັນທີ 15 ພະຈິກ, ທ່ານ ຫງວນຊວນຟຸກ ນາຍົກລັດຖະມົນຕີຫວຽດນາມ ໄດ້ເປັນປະທານກອງປະຊຸມສຸດຍອດອາຊຽນ-ສະຫະປະຊາຊາດ (ສປຊ) ຄັ້ງທີ 11 ຜ່ານລະບົບທາງໄກ, ດ້ວຍການເຂົ້າຮ່ວມຂອງການນໍາບັນດາປະເທດອາຊຽນ, ທ່ານ Antonio Guterres ເລຂາທິການໃຫຍ່ ສປຊ ແລະທ່ານ Lim Jock Hoi ເລຂາທິການໃຫຍ່ອາຊຽນ.
ກ່າວຄໍາເຫັນໄຂກອງປະຊຸມ, ທ່ານ ຫງວນຊວນຟຸກ ເນັ້ນໜັກຄວາມໝາຍຂອງການສະເຫຼີມສະຫຼອງ 75 ປີແຫ່ງວັນສ້າງຕັ້ງ ສປຊ ແລະ 20 ປີກອງປະຊຸມສຸດຍອດ ຄັ້ງທໍາອິດລະຫວ່າງອາຊຽນ ແລະສປຊ. ທ່ານ ຫງວນຊວນຟຸກ ຢັ້ງຢືນວ່າພາຍຫຼັງກວ່າ 4 ທົດສະວັດ, ການພົວພັນອາຊຽນ-ສປຊ ໄດ້ກາຍເປັນແບບຢ່າງໃຫ້ການຮ່ວມມືລະຫວ່າງ ສປຊ ກັບບັນດາອົງການຈັດຕັ້ງຢູ່ພາກພື້ນ.
|
|
ບັນຍາກາດທີ່ກອງປະຊຸມສຸດຍອດອາຊຽນ-ສປຊ ຄັ້ງທີ 11 ຜ່ານລະບົບທາງໄກ. ພາບ: ສໍານັກຂ່າວສານຫວຽດນາມ. |
ສ່ວນທ່ານ Antonio Guterres ຢັ້ງຢືນເຖິງການສະໜັບສະໜູນບົດບາດເປັນໃຈກາງຂອງອາຊຽນ, ຕີລາຄາສູງເລື່ອງຫວຽດນາມ ປະສານງານ ແລະຊັກຈູງສໍາເລັດຜົນບັນດາຄວາມມານະພະຍາຍາມຂອງອາຊຽນ, ການຮ່ວມມືກັບບັນດາຄູ່ຮ່ວມມື, ການຮັບມືກັບພະຍາດໂຄວິດ-19 ຢ່າງມີປະສິດທິຜົນ. ສປຊ ຕີລາຄາສູງບັນດາການປະກອບສ່ວນຂອງອິນໂດເນເຊຍ ແລະຫວຽດນາມ, ຜູ້ຕາງໜ້າຂອງອາຊຽນ ໃນສະພາຄວາມໝັ້ນຄົງ ສປຊ, ຮັບຮູ້ການປະກອບສ່ວນສໍາຄັນຂອງອາຊຽນ ເຂົ້າໃນຄວາມມານະພະຍາຍາມຊຸກຍູ້ສັນຕິພາບ, ຄວາມໝັ້ນຄົງສາກົນຂອງ ສປຊ.
ແລກປ່ຽນກ່ຽວກັບສະພາບການສາກົນ ແລະພາກພື້ນ, ບັນດາຝ່າຍໄດ້ຢັ້ງຢືນຄືນໃໝ່ຄວາມສໍາຄັນຂອງຈິດໃຈຮັບຜິດຊອບແຫ່ງຊາດ ໃນການສ້າງສັນຕິພາບ, ຮັກສາສະຖຽນລະພາບ, ຮັບປະກັນຄວາມໝັ້ນຄົງ ແລະຄວາມປອດໄພຢູ່ພາກພື້ນ, ພິເສດແມ່ນໃນສະພາບພະຍາດໂຄວິດ-19 ພວມສືບຕໍ່ແມ່ນຄວາມສ່ຽງໃຫຍ່, ນາບຂູ່ໂດຍກົງເຖິງຊີວິດການເປັນຢູ່ດ້ານເສດຖະກິດ-ສັງຄົມຂອງປະເທດຕ່າງໆ. ສອງຝ່າຍຢັ້ງຢືນແບ່ງປັນວິໄສທັດ ແລະໃຫ້ຄໍາໝັ້ນສັນຍາເພື່ອບັນດາເປົ້າໝາຍລວມແມ່ນຍົກສູງກົດໝາຍສາກົນ, ຊຸກຍູ້ລັດທິຫຼາຍຝ່າຍ ແລະສ້າງຄວາມເປັນລະບຽບຮຽບຮ້ອຍຢູ່ພາກພື້ນ ແລະສາກົນອີງຕາມກົດໝາຍ...
ສິ້ນສຸດກອງປະຊຸມ, ບັນດາການນໍາອາຊຽນ ແລະເລຂາທິການໃຫຍ່ ສປຊ ຮັບຮູ້ເລື່ອງສອງຝ່າຍຮັບຮອງເອົາແຜນການດໍາເນີນງານອາຊຽນ-ສປຊ ໄລຍະ 2021-2025. ພ້ອມທັງ, ປະທານກອງປະຊຸມອອກຖະແຫຼງການປະທານສ່ອງແສງບັນດາໝາກຜົນກອງປະຊຸມສຸດຍອດອາຊຽນ-ສປຊ ຄັ້ງທີ 11.
ໂດຍ: ເຈິ່ນຮວ່ຽນ