ບັນດາເຈົ້າໜ້າທີ່ອາວຸໂສອາຊຽນ ປະຊຸມກະກຽມໃຫ້ກອງປະຊຸມລັດຖະມົນຕີການຕ່າງປະເທດອາຽນ
ກປ.ອອນໄລ - ວັນທີ 16 ມັງກອນ, ເຈົ້າໜ້າທີ່ອາວຸໂສ (SOM) ບັນດາປະເທດອາຊຽນ ໄດ້ປະຊຸມທີ່ນະຄອນຍາຈາງ, ແຂວງແຄ໋ງຮວ່າ. ນີ້ແມ່ນກອງປະຊຸມ SOM ASEAN ທໍາອິດໃນປີ 2020. ທ່ານ ຫງວຽນກ໊ວກຢູງ, ຮອງລັດຖະມົນຕີກະຊວງການຕ່າງປະເທດຫວຽດນາມ, ຫົວໜ້າຄະນະເຈົ້າໜ້າທີ່ອາວຸໂສຫວຽດນາມ ປະຈໍາອາຊຽນ ເປັນປະທານການປະຊຸມດັ່ງກ່າວ.
ທີ່ການປະຊຸມ, ບັນດາເຈົ້າໜ້າທີ່ອາວຸໂສ ໄດ້ກວດກາຄືນວຽກງານການກະກຽມທຸກດ້ານໃຫ້ກອງປະຊຸມບັນດາລັດຖະມົນຕີການຕ່າງປະເທດອາຊຽນ ວົງແຄບທີ່ດໍາເນີນໃນລະຫວ່າງວັນທີ 16-17 ມັງກອນ ຢູ່ນະຄອນຍາຈາງ. ບັນດາປະເທດໄດ້ຕີລາຄາສູງຫວຽດນາມ ໄດ້ເປັນເຈົ້າການສະເໜີບັນດາທິດກໍານົດ, ບຸລິມະສິດ ແລະຂໍ້ລິເລີ່ມ ເພື່ອຜັນຂະຫຍາຍບັນດາເນື້ອໃນການຮ່ວມມືອາຊຽນ ໃນປີ 2020. ບົນພື້ນຖານນັ້ນ, ບັນດາປະເທດເຫັນດີເປັນເອກະພາບຈະສະເໜີແນະຕໍ່ບັນດາລັດຖະມົນຕີການຕ່າງປະເທດຮັບຮອງເອົາບັນດາເນື້ອໃນນີ້.
|
|
ບັນຍາກາດທີ່ການປະຊຸມບັນດາເຈົ້າໜ້າທີ່ອາວຸໂສອາຊຽນ. ພາບ: ວັນແຮ້ງ. |
ກ່າວຄໍາເຫັນທີ່ກອງປະຊຸມ, ທ່ານ ຫງວຽນກ໊ວກຢູງ ໄດ້ແນະນໍາກ່ຽວກັບຫົວຂໍ້, ບັນດາບຸລິມະສິດ ແລະຂໍ້ລິເລີ່ມໂດຍຫວຽດນາມ ສະເໜີໃນປີ 2020. ຕາມນັ້ນແລ້ວ, ບັນດາຂໍ້ສະເໜີຂອງຫວຽດນາມ ແມ່ນຂຶ້ນກັບທຸກຂົງເຂດຮ່ວມມືອາຊຽນ, ໂດຍອີງໃສ່ບັນດາເນື້ອໃນຕົ້ນຕໍເຊິ່ງລວມມີການກໍ່ສ້າງປະຊາຄົມ, ການພົວພັນຕ່າງປະເທດ ແລະການໂຄສະນາເຜີຍແຜ່ຮູບພາບຂອງອາຊຽນ ເຖິງປະຊາຄົມສາກົນ. ທ່ານ ຫງວຽນກ໊ວກຢູງ ຢັ້ງຢືນວ່າ: ໂດຍເປັນປະທານອາຊຽນ 2020, ຫວຽດນາມ ຈະສູ້ຊົນຈົນສຸດຄວາມສາມາດຂອງຕົນ ເພື່ອຜົນສໍາເລັດຂອງປະຊາຄົມອາຊຽນ, ເພື່ອອາຊຽນສາມັກຄີ, ເຫັນດີເປັນເອກະພາບ, ສວມບົດບາດໃຈກາງໃນພາກພື້ນ ແລະມຸ່ງໄປເຖິງອະນາຄົດ.
ໂດຍ: ທູຈາງ