ການນຳລັດເຊຍ - ຈີນ ສະໜັບສະໜູນກັນຄັດຄ້ານການແຊກແຊງຈາກພາຍນອກ
ວັນທີ 8 ກໍລະກົດ, ທ່ານເລຂາທິການໃຫຍ່, ປະທານປະເທດຈີນ ສີຈິ້ນຜິງ ໄດ້ໂອ້ລົມທາງໂທລະສັບກັບທ່ານປະທານາທິບໍດີລັດເຊຍ V.Putin. ໃນການໂອ້ລົມ, ສອງຝ່າຍໄດ້ສະແດງໃຫ້ເຫັນການສະໜັບສະໜູນເຊິ່ງກັນ ແລະກັນໃນບັນດາບັນຫາ, ໃນນັ້ນ ມີການປັບປຸງລັດຖະທຳມະນູນຢູ່ລັດເຊຍ ແລະກົດໝາຍວ່າດ້ວຍຄວາມໝັ້ນຄົງຮົ່ງກົງ ຂອງຈີນ.
ໃນການໂອ້ລົມ, ທ່ານ ສີຈິ້ນຜິງ ໄດ້ຢືນຢັນວ່າ ຈີນສະໜັບສະໜູນເສັ້ນທາງພັດທະນາທີ່ເໝາະສົມກັບສະພາບການພາຍໃນປະເທດຂອງລັດເຊຍ ແລະເລື່ອງສ້າງປະເທດນີ້ໃຫ້ຈະເລີນພັດທະນາ.
ສ່ວນທ່ານປະທານາທິບໍດີລັດເຊຍ Putin ຖືວ່າ: ເລື່ອງລັດເຊຍ ຮັບຮອງເອົາລັດຖະທຳມະນູນສະບັບປັບປຸງດ້ວຍອັດຕາສະໜັບສະໜູນສູງໄດ້ຊ່ວຍໃຫ້ປະເທດນີ້ຮັກສາສະຖຽນລະພາບດ້ານການເມືອງຍາວນານ, ປົກປັກຮັກສາອະທິປະໄຕຂອງປະເທດຊາດໃຫ້ດີກ່ວາ ແລະຄັດຄ້ານການແຊກແຊງຈາກພາຍນອກ.
ທ່ານ Putin ຢັ້ງຢືນວ່າ: “ການພົວພັນລະຫວ່າງລັດເຊຍ - ຈີນ ພວມຢູ່ໃນລະດັບສູງສຸດໃນປະຫວັດສາດ”, ພ້ອມທັງເນັ້ນໜັກເຖິງການສະໜັບສະໜູນມານະພະຍາຍາມຂອງຈີນ ໃນການປົກປັກຮັກສາຄວາມໝັ້ນຄົງແຫ່ງຊາດຢູ່ຮົ່ງກົງ ແລະຄັດຄ້ານບັນດາການກະທຳເກາະຜິດທີ່ແນໃສ່ທຳລາຍອະທິປະໄຕຂອງຈີນ.
ແຫຼ່ງຄັດຈາກ: vovworld.vn