ໂຄສະນາການທ່ອງທ່ຽວຫວຽດນາມ-ນະຄອນໂຮ່ຈີມິນ ຢູ່ເຢຍລະມັນ ແລະຝະລັ່ງ
ກປ.ອອນໄລ - ວັນທີ 14 ມີນາ, ພະແນກທ່ອງທ່ຽວນະຄອນໂຮ່ຈີມິນ ໃຫ້ຮູ້ວ່າ, ເພື່ອແນໃສ່ຍູ້ແຮງວຽກງານສົ່ງເສີມການທ່ອງທ່ຽວຢູ່ຕະຫຼາດເອີລົບ, ພະແນກໄດ້ສົມທົບກັບກົມໃຫຍ່ທ່ອງທ່ຽວຫວຽດນາມ ຈັດຕັ້ງລາຍການໂຄສະນາການທ່ອງທ່ຽວຫວຽດນາມ-ນະຄອນໂຮ່ຈີມິນ ຢູ່ Berlin (ເຢຍລະມັນ) ແລະ Paris (ຝະລັ່ງ) ດ້ວຍຫົວຂໍ້ “ນະຄອນໂຮ່ຈີມິນ - ຈຸດນັດພົບທີ່ດູດດື່ມເພື່ອຄົ້ນຫາຫວຽດນາມ”.
ຕາມນັ້ນແລ້ວ, ຢູ່ເຢຍລະມັນ, ໃນຂອບເຂດງານຕະຫຼາດນັດ ITB Berlin 2019, ກົມກອງນີ້ໄດ້ຈັດຕັ້ງບັນດາການເຄື່ອນໄຫວໂຄສະນາການທ່ອງທ່ຽວ, ວັດທະນາທໍາຫວຽດນາມ, ລວມມີ: ສະແດງເສບດົນຕີພື້ນເມືອງ, ແນະນໍາອາຫານການກິນ, ເຫດການ “ຄໍ່າຄືນຫວຽດນາມ”, ລາຍການເຊື່ອມຕໍ່ການຄ້າ, ແນະນໍາຜະລິດຕະພັນບໍລິການທ່ອງທ່ຽວຢູ່ຈຸດນັດພົບຫວຽດນາມ-ນະຄອນໂຮ່ຈີມິນ ໃຫ້ອົງການທ່ອງທ່ຽວເຢຍລະມັນ, ວິສາຫະກິດເອີລົບ ແລະປະຊາຊົນເຢຍລະມັນ.
|
|
ສະແດງເຄື່ອງດົນຕີພື້ນເມືອງທີ່ງານຕະຫຼາດນັດ ITB Berlin 2019, ເຢຍລະມັນ. ພາບ: qdnd.vn. |
ຢູ່ຝະລັ່ງ, ລາຍການໂຄສະນາການທ່ອງທ່ຽວຫວຽດນາມ ແລະນະຄອນໂຮ່ຈີມິນ ປະກອບມີການເຄື່ອນໄຫວຕ່າງໆ, ຄື: ງານວາງສະແດງຮູບພາບສະຖານທີ່ທ່ອງທ່ຽວຫວຽດນາມ, ສະແດງເຄື່ອງດົນຕີພື້ນເມືອງ, ແນະນໍາຜະລິດຕະພັນບໍລິການທ່ອງທ່ຽວ… ຢູ່ທີ່ນີ້ກໍໄດ້ດໍາເນີນພິທີລົງນາມໃນບົດບັນທຶກຂໍ້ຕົກລົງການຮ່ວມມືລະຫວ່າງສູນສົ່ງເສີມການທ່ອງທ່ຽວນະຄອນໂຮ່ຈີມິນ ແລະບໍລິສັດຫຸ້ນສ່ວນການທ່ອງທ່ຽວ ແລະການໂຄສະນາຄົມມະນາຄົມຂົນສົ່ງ (Vietravel) ສາຂາຢູ່ຝະລັ່ງ.
ໂດຍ: ຈາງຫງວຽນ