“ກໍາລັງຕໍາຫຼວດຫວຽດນາມ-ກໍາປູເຈຍ-ລາວ - ຂີດໝາຍແຫ່ງໄມຕີຈິດມິດຕະພາບ ແລະການຮ່ວມມື”

ໂດຍໄດ້ຮັບການມອບສິດຈາກການນໍາກະຊວງຕໍາຫຼວດຫວຽດນາມ, ທ່ານພົນຕີ ຫງວຽນງອກຕວ່ານ ຫົວໜ້າກົມວຽກງານພັກ ແລະວຽກງານການເມືອງ ເປັນປະທານທີ່ພິທີໄຂງານວາງສະແດງ. ເຂົ້າຮ່ວມພິທີໄຂຍັງມີທ່ານພົນຕີ ຈີ້ງວັນກວຽດ ຮອງຫົວໜ້າກົມໃຫຍ່ການເມືອງ ກອງທັບປະຊາຊົນຫວຽດນາມ.

ກ່າວຄໍາເຫັນທີ່ພິທີໄຂ, ທ່ານພົນຕີ ຫງວຽນງອກຕວ່ານ ໄດ້ເນັ້ນໜັກວ່າ ງານວາງສະແດງແມ່ນສຽງເວົ້າດ້ວຍຮູບພາບ, ເອກະສານ, ວັດຖຸພັນທີ່ສ່ອງແສງໃຫ້ເຫັນຄວາມສາມັກຄີ, ຄວາມສະໜິດຕິດພັນທີ່ແໜ້ນແຟ້ນ ແລະການພົວພັນສົມທົບກັນ, ໜູນຊ່ວຍປະສິດທິຜົນຂອງກໍາລັງຕໍາຫຼວດຫວຽດນາມ, ກໍາປູເຈຍ ແລະກໍາລັງປ້ອງກັນຄວາມສະຫງົບຂອງລາວ ໃນການຕໍ່ສູ້ປ້ອງກັນ, ສະກັດກັ້ນອາດຊະຍາກໍາ, ປະກອບສ່ວນຮັບປະກັນຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຢູ່ແຕ່ລະປະເທດ ແລະໃນພາກພື້ນ.

ບັນດາຜູ້ແທນຕັດແຖບຜ້າໄຂງານວາງສະແດງ. ພາບ: ຮວ່າງຫວູ້.

ດ້ວຍຮູບພາບ, ເອກະສານ, ວັດຖຸພັນ ແລະບັນດາຜະລິດຕະພັນສື່ສິ່ງພິມ ກວ່າ 700 ຢ່າງພົ້ນເດັ່ນ ໄດ້ຮັບການຄັດເລືອກມາວາງສະແດງ, ງານວາງສະແດງໄດ້ແນະນໍາໂດຍສັງເຂບກ່ຽວກັບປະຫວັດສາດ, ມູນເຊື້ອການພົວພັນສາມັກຄີມິດຕະພາບພ້ອມກັບບັນດາຜົນງານໃນການຮ່ວມມື, ສົມທົບກັນຕໍ່ສູ້ປ້ອງກັນ, ສະກັດກັ້ນອາດຊະຍາກໍາປະເພດຕ່າງໆຂອງກໍາລັງຕໍາຫຼວດຫວຽດນາມ, ກໍາປູເຈຍ ແລະກໍາລັງປ້ອງກັນຄວາມສະຫງົບຂອງລາວ ໃນກວ່າເຄິ່ງສະຕະວັດຜ່ານມາ.

ງານວາງສະແດງແມ່ນການເຄື່ອນໄຫວທີ່ແທດຈິງສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-ລາວ (5-9-1962 / 5-9-2022), 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມື ຫວຽດນາມ-ລາວ (18-7-1977 / 18-7-2022) ແລະ 55 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ-ກໍາປູເຈຍ (24-6-1967 / 24-6-2022). ງານວາງສະແດງເປີດປະຕູໄປຮອດວັນທີ 11 ກັນຍາ ປີ 2022.

ໂດຍ: ຈາງຫງວຽນ