ສືບຕໍ່ຊຸກຍູ້ການລົງທຶນຂອງໄທ ເຂົ້າ ຫວຽດນາມ
ກປ.ອອນໄລ - ຕາມນັກຂ່າວ ສໍານັກຂ່າວສານຫວຽດນາມ ປະຈໍາ ບາງກອກ, ຄະນະວິສາຫະກິດໃຫຍ່ຂອງໄທ ກໍາລັງກະກຽມມາຫວຽດນາມ ເພື່ອຊອກຫາໂອກາດລົງທຶນໃນເດືອນໜ້າ. ຂໍ້ມູນກ່ຽວກັບຄະນະວິສາຫະກິດນີ້ໂດຍຜູ້ອໍານວຍການໃຫຍ່ກຸ່ມບໍລິສັດ Asia Plus Group Holdings PCL ແຈ້ງໃຫ້ຊາບທີ່ເຫດການພົບປະຄະນະວິສາຫະກິດໄທ ທີ່ກະກຽມເຂົ້າຫວຽດນາມ ໂດຍ ກຸ່ມບໍລິສັດນີ້ ຈັດຕັ້ງໃນວັນທີ 26 ກໍລະກົດ.
ກ່າວຄໍາເຫັນທີ່ການພົບປະ, ທ່ານ ຟານຈີ໊ແທ່ງ ເອກອັກຄະລັດຖະທູດຫວຽດນາມ ປະຈໍາ ໄທ ໃຫ້ຮູ້ວ່າ ການລົງທຶນໂດຍກົງຈາກຕ່າງປະເທດ (FDI) ສວມບົດບາດສໍາຄັນໃນການພັດທະນາເສດຖະກິດຂອງຫວຽດນາມ. ຫວຽດນາມ ຖືການພັດທະນາແບບຍືນຍົງເປັນຈຸດສຸມ, ຕາມນັ້ນແລ້ວ ຈະສົ່ງເສີມບັນດາແຫຼ່ງ FDI ເຕັກໂນໂລຢີສູງ, ເປັນມິດກັບສິ່ງແວດລ້ອມໃນຫຼາຍຂົງເຂດ, ຄື: ພື້ນຖານໂຄງລ່າງ, ພະລັງງານທົດແທນ, ກະສິກໍາເຕັກໂນໂລຢີສູງ, ເອເລັກໂຕນິກ... ບັນດານັກລົງທຶນຕ່າງປະເທດເຂົ້າຫວຽດນາມ ຈະໄດ້ຮັບບຸລິມະສິດພິເສດ, ເງື່ອນໄຂສະດວກຜ່ານກົນໄກ, ນະໂຍບາຍຕ່າງໆ...
|
|
ບັນຍາກາດທີ່ການພົບປະ. ພາບ: ສໍານັກຂ່າວສານຫວຽດນາມ. |
ທ່ານເອກອັກຄະລັດຖະທູດ ຟານຈີ໊ແທ່ງ ຖືວ່າ ນີ້ແມ່ນຈຸດເວລາທີ່ເໝາະສົມ ເພື່ອໃຫ້ບັນດາວິສາຫະກິດໄທ ເລັ່ງຜັນຂະຫຍາຍການເຄື່ອນໄຫວລົງທຶນ, ດໍາເນີນທຸລະກິດຢູ່ຕະຫຼາດຫວຽດນາມ ພາຍຫຼັງ 2 ປີ ທີ່ຂາດຕິດຂາດຕອນຍ້ອນການແຜ່ລະບາດຂອງພະຍາດໂຄວິດ-19. ທ່ານ ຟານຈີ໊ແທ່ງ ສະເໜີບັນດາວິສາຫະກິດຕັ້ງໜ້າຊອກຮູ້ສະພາບແວດລ້ອມແຫ່ງການລົງທຶນຢູ່ຫວຽດນາມ, ຮຽກຮ້ອງການລົງທຶນເຂົ້າໃນບັນດາຂົງເຂດ ເຊິ່ງຫວຽດນາມ ມີຄວາມຕ້ອງການ, ຄື: ພະລັງງານທົດແທນ, ກະສິກໍາເຕັກໂນໂລຢີສູງ, ໂຄງລ່າງອຸດສາຫະກໍາ, ສິ່ງແວດລ້ອມ...
ສ່ວນທ່ານ Kongkiat Opaswongkarn ຜູ້ອໍານວຍການໃຫຍ່ກຸ່ມບໍລິສັດ Asia Plus Group Holdings PCL ຢັ້ງຢືນວ່າ ຫວຽດນາມ ກໍາລັງເປັນຈຸດພົ້ນເດັ່ນໃນການດຶງດູດ FDI, ພິເສດແມ່ນບັນດາແຫຼ່ງ FDI ທີ່ມີຄຸນນະພາບສູງ. ນອກນັ້ນ ທ່ານ Kongkiat ຍັງໄດ້ກ່າວແຈ້ງກ່ຽວກັບແຜນການຈັດຕັ້ງຄະນະວິສາຫະກິດໃຫຍ່ຂອງໄທ ໄປຢ້ຽມຢາມນະຄອນໂຮ່ຈີມິນ ເພື່ອເຊື່ອມຕໍ່ການລົງທຶນໃນເດືອນສິງຫາ. ຄາດວ່າ ຄະນະມີນັກທຸລະກິດປະມານ 40 ຄົນ ທ່ີມາຈາກບັນດາວິສາຫະກິດໄທ ທີ່ເຄື່ອນໄຫວໃນຂົງເຂດພະລັງງານ, ເຕັກໂນໂລຢີ, ກະສິກໍາ ແລະພື້ນຖານໂຄງລ່າງ.
ໂດຍ: ໄຊຊະນະ