ຫວຽດນາມ ຍາມໃດກໍ່ແມ່ນຄູ່ຮ່ວມມືສໍາຄັນແຖວໜ້າຂອງໂຮນລັງ ຢູ່ອາຊີ
ກປ.ອອນໄລ - ຕອນບ່າຍວັນທີ 14 ມັງກອນ, ທ່ານ ເຈິ່ນຕ໊ວນແອັງ ລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ໄດ້ປະຊຸມທາງໄກກັບທ່ານນາງ Sigrid Kaag ລັດຖະມົນຕີເສດຖະກິດພົວພັນຕ່າງປະເທດ ແລະຮ່ວມມືພັດທະນາໂຮນລັງ ພ້ອມດ້ວຍ CEO ຂອງ 13 ວິສາຫະກິດໃຫຍ່ໂຮນລັງ ເພື່ອແລກປ່ຽນສະພາບການຜັນຂະຫຍາຍການປະຕິບັດສັນຍາການຄ້າເສລີຫວຽດນາມ-ອີຢູ (EVFTA) ແລະຊຸກຍູ້ບັນດາການເຄື່ອນໄຫວຮ່ວມມືເສດຖະກິດການຄ້າສອງຝ່າຍ ແລະການລົງທຶນໃນຂົງເຂດອຸດສາຫະກໍາລະຫວ່າງສອງປະເທດ.
ທ່ານນາງລັດຖະມົນຕີ Sigrid Kaag ຢັ້ງຢືນວ່າ ຫວຽດນາມ ຍາມໃດກໍ່ແມ່ນຄູ່ຮ່ວມມືສໍາຄັນແຖວໜ້າຂອງໂຮນລັງ ຢູ່ອາຊີ. ໃນໄລຍະຜ່ານມາ, ສອງປະເທດໄດ້ຮ່ວມມືຢ່າງແໜ້ນແຟ້ນໃນຫຼາຍຂົງເຂດ, ໂດຍສະເພາະແມ່ນບັນດາຂົງເຂດອຸດສາຫະກໍາ, ການນໍາໃຊ້ພະລັງງານສະອາດ, ພະລັງງານຜະລິດຄືນໃໝ່, ເສດຖະກິດໝູນວຽນ... ມຸ່ງໄປເຖິງການພັດທະນາແບບຍືນຍົງ. ພິເສດ, ສັນຍາ EVFTA ໄດ້ເປີດບັນດາໂອກາດໃໝ່ໃຫຍ່ຫຼວງກວ່າເກົ່າໃຫ້ແກ່ວິສາຫະກິດສອງປະເທດ ແລະແມ່ນຈຸດເວລາທີ່ເໝາະສົມເພື່ອໃຫ້ສອງຝ່າຍພ້ອມກັນເພີ່ມທະວີການຮ່ວມມືອັນເລິກເຊິ່ງກວ່າ.
|
|
ທ່ານ ເຈິ່ນຕ໊ວນແອັງ ລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ. ພາບ: ສໍານັກຂ່າວສານຫວຽດນາມ. |
ທ່ານລັດຖະມົນຕີ ເຈິ່ນຕ໊ວນແອັງ ໄດ້ຊົມເຊີຍຕໍ່ຄວາມເອົາໃຈໃສ່ຂອງລັດຖະບານ ກໍຄືຂອງບັນດາກຸ່ມບໍລິສັດໃຫຍ່ຂອງໂຮນລັງສໍາລັບບັນດາຂົງເຂດຮ່ວມມືດ້ານການຄ້າ, ອຸດສາຫະກໍາ ແລະພະລັງງານ ກໍຄືບັນດານະໂຍບາຍຂອງລັດຖະບານຫວຽດນາມທີ່ມີຕໍ່ນັກລົງທຶນຕ່າງປະເທດ. ໂອກາດນີ້, ທ່ານ ເຈິ່ນຕ໊ວນແອັງ ໄດ້ອະທິບາຍບັນດາບັນຫາລະອຽດເຊິ່ງແຕ່ລະວິສາຫະກິດໂຮນລັງ ສົນໃຈ; ເຮັດແຈ້ງບັນດາເນື້ອໃນທີ່ກ່ຽວຂ້ອງເຖິງການປະຕິບັດ EVFTA (ພາສີ, ຊັບສິນທາງປັນຍາ, ການຄ້າການບໍລິການ...) ແລະເລື່ອງຫວຽດນາມ ສາມາດໜູນຊ່ວຍຫຍັງແດ່ໃນຍຸດທະສາດຂອງບັນດານັກລົງທຶນໂຮນລັງ ເພື່ອນໍາຫວຽດນາມ ກາຍເປັນສູນຜະລິດ ແລະບໍລິໂພກໃນພາກພື້ນອາຊຽນ.
ສິ້ນສຸດການປະຊຸມ, ລັດຖະມົນຕີສອງທ່ານ ຢັ້ງຢືນວ່າຈະອໍານວຍຄວາມສະດວກເພື່ອໃຫ້ວິສາຫະກິດສອງປະເທດໝູນໃຊ້ດີທີ່ສຸດບັນດາໂອກາດທີ່ເປີດອອກເມື່ອສັນຍາການຄ້າເສລີ EVFTA ມີຜົນສັກສິດ.
ໂດຍ: ຮວ່າງເຈື່ອງ