ວິສາຫະກິດສິງກະໂປ ເປີດກວ້າງການລົງທຶນເຂົ້າແຂວງດົ່ງນາຍ
ກປ.ອອນໄລ - ວັນທີ 3 ທັນວາ, ຄະນະປະຕິບັດງານຂອງສະຖານກົງສູນໃຫຍ່ສິງກະໂປ ປະຈໍາ ນະຄອນໂຮ່ຈີມິນ ນຳໂດຍທ່ານ Kho Ngee Seng Roy, ຫົວໜ້າສະຖານກົງສູນໃຫຍ່ສິງກະໂປ ປະຈໍາ ນະຄອນໂຮ່ຈີມິນ ໄດ້ມາຢ້ຽມຢາມ ແລະເຮັດວຽກກັບການນໍາແຂວງດົ່ງນາຍ.
ທີ່ການເຮັດວຽກ, ທ່ານ ຫງວຽນຟຸເກື່ອງ, ກໍາມະການສູນກາງພັກ, ເລຂາພັກແຂວງດົ່ງນາຍ ໃຫ້ຮູ້ວ່າ, ປະຈຸບັນມີວິສາຫະກິດຕ່າງປະເທດເກືອບ 1.500 ແຫ່ງທີ່ມາຈາກ 45 ປະເທດ, ເຂດແຄວ້ນລົງທຶນເຂົ້າແຂວງດົ່ງນາຍ, ໃນນັ້ນ, ສິງກະໂປ ລົງທຶນກວ່າ 70 ໂຄງການດ້ວຍຍອດຈຳນວນທຶນຈົດທະບຽນປະມານ 3,6 ຕື້ໂດລາສະຫະລັດ, ຢືນອັນດັບທີ 4 ໃນບັນດາປະເທດ, ເຂດແຄວ້ນ. ການນໍາແຂວງດົ່ງນາຍ ປາດຖະໜາວ່າບັນດາວິສາຫະກິດສິງກະໂປ ຈະສືບຕໍ່ລົງທຶນເຂົ້າແຂວງດົ່ງນາຍ ໃນບັນດາຂົງເຂດ, ຄື: ອະສັງຫາລິມະຊັບ, ການບໍລິການ, ການທ່ອງທ່ຽວ, ອຸດສາຫະກໍາເຕັກໂນໂລຢີສູງ...
|
|
ການນໍາແຂວງດົ່ງນາຍ ຖ່າຍຮູບເປັນທີ່ລະນຶກພ້ອມກັບຄະນະປະຕິບັດງານສະຖານກົງສູນໃຫຍ່ສິງກະໂປ ປະຈໍາ ນະຄອນໂຮ່ຈີມິນ. ພາບ: baodongnai.com.vn. |
ກ່າວຄໍາເຫັນທີ່ການເຮັດວຽກ, ທ່ານ Kho Ngee Seng Roy, ຫົວໜ້າສະຖານກົງສູນໃຫຍ່ສິງກະໂປ ປະຈໍາ ນະຄອນໂຮ່ຈີມິນ ແບ່ງປັນວ່າ: ໃນໄລຍະຈະມາເຖິງຈະມີຫຼາຍວິສາຫະກິດສິງກະໂປ ມາດົ່ງນາຍ ຊອກຮູ້ລະບຽບການເພື່ອລົງທຶນບັນດາໂຄງການໂຄງລ່າງຄົມມະນາຄົມ, ການບໍລິການ... ສະຖານກົງສູນໃຫຍ່ສິງກະໂປ ປະຈໍາ ນະຄອນໂຮ່ຈີມິນ ຈະເປັນຂົວເຊື່ອມຕໍ່ໜູນຊ່ວຍຂໍ້ມູນຂ່າວສານກ່ຽວກັບແຂວງດົ່ງນາຍ ເພື່ອຊ່ວຍບັນດາວິສາຫະກິດສິງກະໂປ ເລືອກເຟັ້ນຂົງເຂດລົງທຶນຢ່າງເໝາະສົມ.
ໂດຍ: ທະນາພອນ