ຫວຽດນາມ-ອາເມລິກາ ຊຸກຍູ້ການຮ່ວມມືດ້ານເສດຖະກິດ, ການຄ້າ ແລະການລົງທຶນ
ກປ.ອອນໄລ - ວັນທີ 17 ກັນຍາ, ຢູ່ຮ່າໂນ້ຍ, ສະມາຄົມຫວຽດນາມ-ອາເມລິກາ ສັງກັດສະຫະພັນບັນດາອົງການຈັດຕັ້ງມິດຕະພາບຫວຽດນາມ (VUFO) ໄດ້ສົມທົບກັບສະພານັກທຸລະກິດຫວຽດນາມ-ອາເມລິກາ (VABC) ຈັດຕັ້ງການໂອ້ລົມສົນທະນາກ່ຽວກັບການດຳເນີນທຸລະກິດຢູ່ຫວຽດນາມ ແລະອາເມລິກາ ດ້ວຍຫົວຂໍ້ “ລາຍການແນະນໍາກາລະໂອກາດລົງທຶນເຂົ້າເມືອງ Rockingham, ລັດ Virginia, ອາເມລິກາ”.
    |
 |
|
ທ່ານ ຫງວຽນເຕິມຈ໊ຽນ ປະທານສະມາຄົມຫວຽດນາມ-ອາເມລິກາ ກ່າວຄໍາເຫັນທີ່ການໂອ້ລົມສົນທະນາ. ພາບ: dangcongsan.vn. |
ກ່າວຄໍາເຫັນທີ່ການໂອ້ລົມສົນທະນາ, ທ່ານ ຫງວຽນເຕິມຈ໊ຽນ ປະທານສະມາຄົມຫວຽດນາມ-ອາເມລິກາ ໃຫ້ຂໍ້ສັງເກດວ່າ, ເຄີຍເປັນສັດຕູກັນໃນອະດີດຕະການ, ແຕ່ມາບັດນີ້ຫວຽດນາມ ແລະອາເມລິກາ ໄດ້ຫັນການພົວພັນເປັນປົກກະຕິ ແລະສ້າງຕັ້ງການພົວພັນຄູ່ຮ່ວມມືຮອບດ້ານ. ຕາມທ່ານ ຫງວຽນເຕິມຈ໊ຽນ ແລ້ວ, ປະຈຸບັນ, ການພົວພັນຮ່ວມມືຫວຽດນາມ-ອາເມລິກາ ພວມນັບມື້ນັບພັດທະນາຢ່າງເລິກເຊິ່ງກວ້າງຂວາງໃນຫຼາຍຂົງເຂດ, ພິເສດແມ່ນກ່ຽວກັບເສດຖະກິດ, ການຄ້າ ແລະການລົງທຶນ.
ສ່ວນທ່ານ David ຮຸຍໂຮ່, ຜູ້ຕາງໜ້າ VABC ໃຫ້ຮູ້ວ່າ, ເມືອງ Rockingham ແມ່ນເຂດເສດຖະກິດຈຸດສຸມຂອງລັດ Virginia. ທ່ານ David ຮຸຍໂຮ່ ເນັ້ນໜັກວ່າ, ຜ່ານການໂອ້ລົມສົນທະນາຄັ້ງນີ້, VABC ປາດຖະໜາຢາກໜູນຊ່ວຍວິສາຫະກິດຫວຽດນາມ ກ້າວເຂົ້າສູ່ຕະຫຼາດທີ່ກວ້າງໃຫຍ່ ແລະມີຄວາມສາມາດບົ່ມຊ້ອນຂອງອາເມລິກາ, ຜ່ານນັ້ນປະກອບສ່ວນຊຸກຍູ້ການພົວພັນຮ່ວມມືໃນບັນດາຂົງເຂດເສດຖະກິດ, ການຄ້າ ແລະການລົງທຶນລະຫວ່າງຫວຽດນາມ ແລະອາເມລິກາ.
ໂດຍ: ຄໍາແພງ