ເພີ່ມທະວີການຮ່ວມມືລະຫວ່າງນະຄອນໂຮ່ຈີມິນ ແລະນະຄອນຫາງໂຈວ
ກປ.ອອນໄລ - ວັນທີ 2 ກໍລະກົດ, ທ່ານນາງ ຫວໍທິຢຸງ, ຮອງເລຂາພັກນະຄອນໂຮ່ຈີມິນ ໄດ້ໃຫ້ການຕ້ອນຮັບທ່ານ Zhou Jiang Yong, ເລຂາພັກນະຄອນຫາງໂຈວ (ຈີນ) ພ້ອມກັບຄະນະປະຕິບັດງານ ທີ່ພວມມີການຢ້ຽມຢາມ ແລະເຮັດວຽກຢູ່ຫວຽດນາມ.
ທີ່ການຕ້ອນຮັບທ່ານ Zhou Jiang Yong, ທ່ານນາງ ຫວໍທິຢຸງ ເນັ້ນໜັກວ່າ, ນະຄອນໂຮ່ຈີມິນ ຍາມໃດກໍ່ຖືເປັນສໍາຄັນການພົວພັນກັບທ້ອງຖິ່ນຕ່າງໆຂອງຈີນ ເວົ້າລວມ ແລະແຂວງເຈີຈຽງ, ໃນນັ້ນມີນະຄອນຫາງໂຈວ ເວົ້າສະເພາະ.
|
|
ທ່ານນາງ ຫວໍທິຢຸງ, ຮອງເລຂາພັກນະຄອນໂຮ່ຈີມິນ ຕ້ອນຮັບທ່ານ Zhou Jiang Yong, ເລຂາພັກນະຄອນຫາງໂຈວ (ຈີນ). ພາບ: ສໍານັກຂ່າວສານຫວຽດນາມ. |
ການຢ້ຽມຢາມຂອງທ່ານ Zhou Jiang Yong ແລະຄະນະປະຕິບັດງານຈະປະກອບສ່ວນຮັດແໜ້ນການພົວພັນຮ່ວມມືລະຫວ່າງນະຄອນໂຮ່ຈີມິນ ແລະທ້ອງຖິ່ນຕ່າງໆຂອງຈີນ. ໃນໄລຍະຈະມາເຖິງ, ນະຄອນໂຮ່ຈີມິນ ແລະນະຄອນຫາງໂຈວ ກໍ່ຄືແຂວງເຈີຈຽງ ຈະເພີ່ມທະວີການແລກປ່ຽນຮ່ວມມື, ຂຸດຄົ້ນຄວາມສາມາດບົ່ມຊ້ອນດ້ານການທ່ອງທ່ຽວຂອງສອງທ້ອງຖິ່ນ. ນອກຈາກນັ້ນ, ນະຄອນໂຮ່ຈີມິນ ກໍ່ປາດຖະໜາຢາກຖອດຖອນບົດຮຽນໃນການພັດທະນາເສດຖະກິດ-ສັງຄົມຂອງນະຄອນຫາງໂຈວ.
|
|
ບັນຍາກາດທີ່ການຕ້ອນຮັບ. ພາບ: ສໍານັກຂ່າວສານຫວຽດນາມ. |
ສ່ວນທ່ານ Zhou Jiang Yong ສະແດງຄວາມປະທັບໃຈຕໍ່ການພັດທະນາຂອງນະຄອນໂຮ່ຈີມິນ ແລະປາດຖະໜາວ່າໃນໄລຍະຈະມາເຖິງ, ນະຄອນໂຮ່ຈີມິນ, ນະຄອນຫາງໂຈວ ແລະແຂວງເຈີຈຽງ ຈະເພີ່ມທະວີການຮ່ວມມືບໍ່ພຽງແຕ່ການພົບປະແລກປ່ຽນປະຊາຊົນ, ການພົບປະແລກປ່ຽນວັດທະນະທໍາເທົ່ານັ້ນ ຫາກຍັງພ້ອມກັນຊຸກຍູ້ການຮ່ວມມືດ້ານເສດຖະກິດອີກດ້ວຍ.
ໂດຍ: ຄໍາແພງ