ອີຢູ ແລະຫວຽດນາມ ຈະລົງນາມ FTA ແລະ IPA ໃນວັນທີ 30 ມິຖຸນາ ຢູ່ຮ່າໂນ້ຍ
ກປ.ອອນໄລ - ວັນທີ 25 ມິຖຸນາ, ສະພາລັດຖະມົນຕີສະຫະພາບເອີລົບ (ອີຢູ) ໄດ້ຮັບຮອງເອົາສັນຍາ 2 ສະບັບລະຫວ່າງອີຢູ ແລະຫວຽດນາມ ກ່ຽວກັບການຄ້າເສລີ (EVFTA) ແລະກ່ຽວກັບການປົກປ້ອງການລົງທຶນ (EVIPA), ເພື່ອເປີດຊ່ອງທາງໃຫ້ການລົງນາມສັນຍາສອງສະບັບນີ້.
ຕາມກະຊວງອຸດສາຫະກຳ ແລະການຄ້າຫວຽດນາມ ແລ້ວ, ດ້ວຍ 17 ພາກ, ອະນຸສັນຍາ 2 ສະບັບ ແລະບາງບົດບັນທຶກຊ່ວຍຈໍາພ້ອມກັບບັນດາເນື້ອໃນຕົ້ນຕໍລວມມີ: ການຄ້າສິນຄ້າ, ການຄ້າບໍລິການ, ການລົງທຶນ, ການປົກປ້ອງການຄ້າ, ການແກ່ງແຍ້ງ, ລັດວິສາຫະກິດ, ການຈັດຊື້ຂອງລັດຖະບານ, ຊັບສິນທາງປັນຍາ, ການຄ້າ ແລະການພັດທະນາແບບຍືນຍົງ, ບັນດາບັນຫານິຕິກຳ-ລະບອບລະບຽບການນັ້ນ, EVFTA ໄດ້ຮັບຖືວ່າແມ່ນສັນຍາຮອບດ້ານ, ມີຄຸນນະພາບສູງ ແລະຮັບປະກັນການດຸ່ນດ່ຽງກ່ຽວກັບຜົນປະໂຫຍດໃຫ້ທັງຫວຽດນາມ ແລະອີຢູ, ພ້ອມທັງເໝາະສົມກັບບັນດາຂໍ້ກຳນົດຂອງອົງການການຄ້າໂລກ (WTO) ກໍ່ຄືໄດ້ໃສ່ໃຈເຖິງການຜິດດ່ຽງກ່ຽວກັບລະດັບການພັດທະນາລະຫວ່າງສອງຝ່າຍ.
|
|
EVFTA ຈະແມ່ນກຳລັງໜູນຊຸກຍູ້ໃຫ້ແກ່ການສົ່ງອອກຂອງຫວຽດນາມ. ພາບ: baochinhphu.vn. |
ອີຢູ ໃຫ້ຂໍ້ສັງເກດວ່າ, EVFTA ແມ່ນຂໍ້ຕົກລົງການຄ້າເສລີ “ຄວາມມັກໃຫຍ່ໃຝ່ສູງທີ່ສຸດນັບແຕ່ກ່ອນມາຮອດປະຈຸບັນ” ເຊິ່ງ ອີຢູ ເຄີຍລົງນາມກັບປະເທດກໍາລັງພັດທະນາ, ໃນນັ້ນຈະລົບລ້າງພາສີເກືອບ 99% ລະຫວ່າງອີຢູ ແລະຫວຽດນາມ. ຄຽງຂ້າງເລື່ອງນໍາມາເຊິ່ງບັນດາກາລະໂອກາດເສດຖະກິດສໍາຄັນ, EVFTA ກໍ່ຮັບປະກັນການຄ້າ, ການລົງທຶນ ແລະການພັດທະນາແບບຍືນຍົງ ຍາມໃດກໍ່ຄຽງຄູ່ໄປພ້ອມໆກັນ, ດ້ວຍວິທີສ້າງຕັ້ງບັນດາມາດຕະຖານສູງທີ່ສຸດກ່ຽວກັບການປົກປ້ອງແຮງງານ, ຄວາມປອດໄພ, ປົກປັກຮັກສາສິ່ງແວດລ້ອມ ແລະຜູ້ບໍລິໂພກ.
ໃນຂະນະນັ້ນ, EVIPA ຈະຊ່ວຍປົກປັກຮັກສາ ແລະເພີ່ມການລົງທຶນຂອງອີຢູ ເຂົ້າຫວຽດນາມ. ສິ່ງນີ້ໝັ້ນໝາຍວ່າຈະນໍາຫວຽດນາມ ກາຍເປັນໜຶ່ງໃນບັນດາສູນການຄ້າ ແລະການລົງທຶນຂອງອີຢູ ຢູ່ອາຊີຕາເວັນອອກສ່ຽງໃຕ້.
ໂດຍ: ເຈິ່ນຮວ່ຽນ