ວິສາຫະກິດເອີຣົບ ສະໜັບສະໜູນການລົງນາມໃນສັນຍາ FTA ກັບຫວຽດນາມ ໂດຍໄວ
ກປ.ອອນໄລ - ໃນຂອບເຂດການຢ້ຽມຢາມ ແລະເຮັດວຽກຢູ່ສະຫະພາບເອີຣົບ (EU) ແລະລາຊະອານາຈັກແບນຊິກ, ວັນທີ 18 ມິຖຸນາ, ທ່ານ ເຈິ່ນຕ໊ວນແອັງ ລັດຖະມົນຕີກະຊວງອຸດສາຫະກຳ ແລະການຄ້າຫວຽດນາມ ໄດ້ມີການພົບປະກັບຜູ້ຕາງໜ້າຂອງບາງສະຫະສະມາຄົມວິສາຫະກິດເອີຣົບ ເພື່ອແນໃສ່ແລກປ່ຽນກ່ຽວກັບບັນດາຄວາມມານະພະຍາຍາມໃນການຊຸກຍູ້ສະພາເອີຣົບ ພິຈາລະນາມອບສິດໃຫ້ແກ່ຄະນະກຳມະການເອີຣົບ (EC) ລົງນາມໃນສັນຍາການຄ້າເສລີ ລະຫວ່າງຫວຽດນາມ ແລະອີຢູ (EVFTA) ແລະສັນຍາກ່ຽວກັບການປົກປ້ອງການລົງທຶນລະຫວ່າງສອງຝ່າຍ (EVIPA).
ທີ່ການພົບປະ, ທ່ານ ເຈິ່ນຕ໊ວນແອັງ ໄດ້ລາຍງານບັນດາການຜັນແປໃໝ່ສຸດທີ່ກ່ຽວຂ້ອງເຖິງ EVFTA ແລະ EVIPA. ທ່ານ ເຈິ່ນຕ໊ວນແອັງ ໃຫ້ຮູ້ວ່າ ກະຊວງອຸດສາຫະກຳ ແລະການຄ້າ ກໍ່ຄືບັນດາກະຊວງ, ຂະແໜງການຂອງລັດຖະບານຫວຽດນາມ ທີ່ມີຄວາມຮັບຜິດຊອບໃນການລົງນາມໃນບັນດາສັນຍາ ແລະຕໍ່ຈາກນັ້ນແມ່ນປະຕິບັດສັນຍາພາຍຫຼັງສະພາແຫ່ງຊາດຫວຽດນາມ ໃຫ້ສັດຕະຍາບັນ.
|
|
ທ່ານ ເຈິ່ນຕ໊ວນແອັງ ທີ່ການພົບປະກັບຜູ້ຕາງໜ້າຂອງບາງສະຫະສະມາຄົມວິສາຫະກິດເອີຣົບ. ພາບ: ສໍານັກຂ່າວສານຫວຽດນາມ. |
ໃນການພົບປະ, ຜູ້ຕາງໜ້າຂອງບັນດາສະຫະສະມາຄົມວິສາຫະກິດເອີຣົບ ໄດ້ແບ່ງປັນຄຳເຫັນ, ຕີລາຄາ ກໍ່ຄືມີແຜນການ ແລະແນວຄວາມຄິດຢ່າງລະອຽດເພື່ອພ້ອມກັບລັດຖະບານຫວຽດນາມ ແລະລັດຖະບານບັນດາປະເທດເອີຣົບ ຍູ້ໄວການລົງນາມ ແລະໃຫ້ສັດຕະຍາບັນບັນດາສັນຍາ. ຂໍ້ມູນແບ່ງປັນຂອງວິສາຫະກິດເອີຣົບ ບໍ່ພຽງແຕ່ກ່ຽວຂ້ອງເຖິງ FTA ເທົ່ານັ້ນ ຫາກຍັງລວມມີບັນຫາຕ່າງໆ ຄືບັນດາການຮ່ວມມືໃນຂອບເຂດທີ່ກວ້າງຂວາງກ່ວາ, ມີລັກສະນະຍືນຍົງ ແລະມີຄວາມໝາຍຍຸດທະສາດຕໍ່ການພົວພັນທາງດ້ານການຄ້າລະຫວ່າງຫວຽດນາມ - ອີຢູ ອີກດ້ວຍ.
ບັນດາສະຫະສະມາຄົມວິສາຫະກິດເອີຣົບ ໄດ້ຕັ້ງໜ້າສົມທົບກັບຝ່າຍຫວຽດນາມ ໃນການຈັດຕັ້ງບັນດາເຫດການໂຄສະນາໃຫ້ສັນຍາ ແລະຂົນຂວາຍບັນດາການນໍາຂອງ EP, EC ກໍ່ຄືເອກອັກຄະລັດຖະທູດບັນດາປະເທດສະມາຊິກ EU ເອົາໃຈໃສ່ ແລະສະໜັບສະໜູນເລື່ອງລົງນາມສັນຍາຜ່ານບັນດາການເຄື່ອນໄຫວພົບປະໂດຍກົງ ແລະສົ່ງຈົດໝາຍ.
ໂດຍ: ທະນາພອນ