ເປັນເຈົ້າການປ່ຽນແປງເພື່ອເປັນເຈົ້າຂອງວິວັດການປ່ຽນແປງ
ແຕ່ລະພື້ນຖານເສດຖະກິດລ້ວນແຕ່ມີໜຶ່ງ ຫຼື ສອງວິສາຫະກິດເປັນເສົາຄ້ຳ, ສ້າງລະບົບນິເວດໃຫ້ບັນດາວິສາຫະກິດອື່ນພ້ອມກັນພັດທະນາ. ເສົາຄ້ຳຍິ່ງມີຄວາມຍິ່ງໃຫຍ່, ພື້ນຖານເສດຖະກິດກໍ່ຍິ່ງມີຄວາມໝັ້ນຄົງເຂ້ັມແຂງ. Viettel ແມ່ນເສົາຄໍ້າຂອງພື້ນຖານເສດຖະກິດຫວຽດນາມ. ໃນບັນດາວິສາຫະກິດກອງທັບ ກໍຄືວິສາຫະກິດໃນທົ່ວປະເທດເວົ້າລວມ, Viettel ຍາມໃດກໍ່ມີຄຸນລັກສະນະສະເພາະ. ໃນຕະຫຼອດຊຸມປີຜ່ານມາ, ພະນັກງານຂອງ Viettel ຍາມໃດກໍ່ສະແດງໃຫ້ເຫັນຄຸນນະທາດ, ພູມປັນຍາ ແລະຄວາມມຸ່ງມາດປາດຖະໜາ. ຫຼາຍໜ້າທີ່ສຳຄັນ, ຫຼາຍວຽກງານຫຍຸ້ງຍາກ, ວຽກໃໝ່ທີ່ລັດ ແລະກອງທັບບໍ່ທັນຮູ້ວ່າຈະມອບໝາຍໃຫ້ໃຜນັ້ນ, Viettel ໄດ້ເປັນເຈົ້າການຮັບຜິດຊອບ.
|
|
ການນຳກະຊວງປ້ອງກັນປະເທດ ແລະການນຳ Viettel ປະຕິບັດພິທີການສະແດງເປົ້າໝາຍກໍ່ສ້າງສັງຄົມດີຈີຕອນຂອງ Viettel. ພາບ: ຫາຍລິງ. |
Viettel ໄດ້ປະຕິບັດກິດຈະການຫັນປ່ຽນດີຈີຕອນໂດຍໄວ. ເພື່ອຮອດປະຈຸບັນ, Viettel ບັນລຸໄດ້ບັນດາໝາກຜົນທໍາອິດຂອງການປະຕິວັດນັ້ນ: Viettel ແມ່ນວິສາຫະກິດນຳໜ້າໃນການຫັນປ່ຽນດີຈີຕອນຢູ່ຫວຽດນາມ, ມູນຄ່າເຄື່ອງໝາຍການຄ້າໃນຂົງເຂດໂທລະຄົມມະນາຄົມຢືນອັນດັບທີໜຶ່ງໃນອາຊີຕາເວັນອອກສ່ຽງໃຕ້ ແລະຢືນອັນດັບທີ 28 ໃນໂລກ. Viettel ແມ່ນແຫຼ່ງກໍາລັງແຮງເພື່ອໜູນຊ່ວຍລັດຖະບານໃນການກໍ່ສ້າງລັດຖະບານເອເລັກໂຕນິກ, ກ້າວໄປເຖິງແມ່ນລັດຖະບານດີຈີຕອນ, ເພື່ອຫັນລະບົບການບໍລິຫານຂອງລັດເປັນງ່າຍດາຍ, ສະຫຼາດ, ມີປະສິດທິຜົນສູງ.
ໝາກຜົນປີ 2019, Viettel ບັນລຸຍອດລາຍຮັບກວ່າ 251.000 ຕື້ດົ່ງ, ການເຕີບໂຕ 7,5% ເມື່ອທຽບໃສ່ກັບປີ 2018, ກວມເອົາ 50% ລາຍຮັບທົ່ວຂະແໜງໂທລະຄົມມະນາຄົມ, ຍາມໃດກໍ່ນອນໃນກຸ່ມວິສາຫະກິດແຖວໜ້າຂອງຂະແໜງ, ຮັບປະກັນວຽກເຮັດງານທຳ ແລະລາຍຮັບໃຫ້ຜູ້ອອກແຮງງານ. ຄຽງຂ້າງກັນນັ້ນ, ການເຄື່ອນໄຫວລົງທຶນອອກສູ່ຕ່າງປະເທດຂອງ Viettel ທີ່ມີປະສິດທິຜົນ, ແມ່ນຂົວເຊື່ອມຕໍ່ເພີ່ມທະວີສາຍພົວພັນລະຫວ່າງລັດຖະບານ, ວິສາຫະກິດ ແລະຊາວຫວຽດນາມ ກັບຫຼາຍປະເທດໃນໂລກ. ການເຄື່ອນໄຫວຄົ້ນຄວ້າຜະລິດອາວຸດຍຸດທະພັນເຕັກນິກ, ເຕັກໂນໂລຢີສູງໄດ້ມີບັນດາຜົນງານສຳຄັນ. Viettel ກໍ່ຕັ້ງໜ້າເຂົ້າຮ່ວມກໍ່ສ້າງຮາກຖານການເມືອງໃນບໍລິເວນ, ຮ່ວມແຮງຮ່ວມໃຈກໍ່ສ້າງຊົນນະບົດໃໝ່, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ. Viettel ແມ່ນຈຸດພົ້ນເດັ່ນໃນການປະຕິບັດແຜນນະໂຍບາຍສົມທົບຢ່າງແໜ້ນແຟ້ນລະຫວ່າງການປ້ອງກັນຊາດກັບເສດຖະກິດ, ວັດທະນະທຳ, ສັງຄົມ ແລະເສດຖະກິດ, ວັດທະນະທຳ, ສັງຄົມກັບການປ້ອງກັນຊາດ.
ບັນດາໝາກຜົນເຫຼົ່ານັ້ນໄດ້ສ້າງຄວາມໄວ້ເນື້ອເຊື່ອໃຈຢ່າງເລິກເຊິ່ງຕໍ່ກັບພັກ ແລະລັດ. ໃນພິທີສະເຫຼີມສະຫຼອງການລົງທຶນຂອງ Viettel ອອກສູ່ຕ່າງປະເທດ ຄົບຮອບ 10 ປີ, ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ໄດ້ໃຫ້ຂໍ້ສັງເກດວ່າ: “Viettel ໄດ້ໄປນໍາໜ້າ ແລະຕ້ອງແມ່ນຫຼັກແຫຼ່ງແກ່ນສານໃນບາດກ້າວຫັນປ່ຽນກ່ຽວກັບກຳລັງແກ່ງແຍ້ງ ແລະເຊື່ອມໂຍງຂອງບັນດາວິສາຫະກິດຫວຽດນາມ. ພວກເຮົາປາດຖະໜາວ່າຈະມີຫຼາຍວິສາຫະກິດ, ກຸ່ມບໍລິສັດ ຄື Viettel”. ເພື່ອເຮັດໄດ້ສິ່ງເຫຼົ່ານັ້ນ, ພວກເຮົາຕ້ອງມີບັນດາສະມາຊິກພັກຂອງ Viettel, ບັນດາພະນັກງານຂອງ Viettel ມານະພະຍາຍາມແຕ່ລະມື້ຢ່າງບໍ່ຢຸດຢັ້ງ.
ກາລະໂອກາດ, ສິ່ງທ້າທ້າຍຮຽກຮ້ອງຕ້ອງມີຍຸດທະສາດໃໝ່
ທ່ານພົນຈັດຕະວາ ຮວ່າງເຊີນ, ເລຂາຄະນະພັກ, ຮອງຜູ້ອຳນວຍການໃຫຍ່ກຸ່ມບໍລິສັດອຸດສາຫະກຳ-ໂທລະຄົມມະນາຄົມກອງທັບໃຫ້ຮູ້ວ່າ ອາຍຸການ 2015-2020 ເປັນຂີດໝາຍບາດກ້າວແຫ່ງການເຕີບໂຕຢ່າງກ້າວກະໂດດຂັ້ນ ກໍຄືຜົນສຳເລັດໃຫຍ່ຂອງ Viettel ໃນທຸກຂົງເຂດ.
ເພື່ອມີບັນດາຜົນງານດັ່ງກ່າວ, ທ່ານພົນຈັດຕະວາ ຮວ່າງເຊີນ ໃຫ້ຮູ້ວ່າ ຄະນະພັກກຸ່ມບໍລິສັດໄດ້ໃກ້ຊິດຕິດແທດກັບການຊີ້ນຳ, ນຳພາໂດຍກົງຂອງຄະນະພັກການທະຫານສູນກາງ, ກະຊວງປ້ອງກັນປະເທດ. ຈາກນັ້ນ, ກຸ່ມບໍລິສັດໄດ້ເປີດກວ້າງໂຄງປະກອບການຈັດຕັ້ງ, ຂອບຂະໜາດດ້ວຍຫຼາຍໜ້າທີ່ໃໝ່ທັງຂົງເຂດໂທລະຄົມມະນາຄົມ ແລະພັດທະນາອຸດສາຫະກຳການປ້ອງກັນຊາດ, ສືບຕໍ່ປະຕິບັດການສ້າງໂຄງປະກອບການຈັດຕັ້ງຄືນໃໝ່ຕອບສະໜອງຍຸດທະສາດພັດທະນາໃນໄລຍະໃໝ່. ໃນອາຍຸການ 2015-2020, ຄະນະປະຈໍາຄະນະພັກກຸ່ມບໍລິສັດ ໄດ້ອອກມະຕິສະບັບຕ່າງໆ, ໃນນັ້ນຕ້ອງເວົ້າເຖິງ: ມະຕິວ່າດ້ວຍການລົງທຶນສາກົນ, ມະຕິວ່າດ້ວຍຍຸດທະສາດຊັບພະຍາກອນມະນຸດ, ມະຕິວ່າດ້ວຍການສ້າງໂຄງປະກອບຄືນໃໝ່... ລ້ວນແຕ່ເປັນພະຍານຫຼັກຖານໃຫ້ກຳລັງແຮງຂອງຄວາມເຫັນດີເຫັນພ້ອມ.
ທ່ານພັນເອກພິເສດ ເຢືອງວັນຕວ່ານ ໃຫ້ຮູ້ວ່າ Viettel ພວມຢູ່ໃນໄລຍະໃໝ່, ຮຽກຮ້ອງຕ້ອງມີຍຸດທະສາດໃໝ່ດ້ວຍສິ່ງທ້າຍທາຍຫຼາຍຢ່າງໃໝ່, ກາລະໂອກາດ, ສະພາບການໃໝ່. Viettel ຖືກຜົນກະທົບຍ້ອນບັນດາການປ່ຽນແປງຂອງທ່າອ່ຽງລວມ, ຍ້ອນເຫດນັ້ນຕ້ອງເລືອກເອົາຖັນແຖວການນຳທີ່ເປັນແກ່ນສານເພື່ອປະຕິບັດຍຸດທະສາດໃໝ່ໃນໄລຍະໃໝ່. “ບັນດາສະຫາຍການນຳໃນຄະນະພັກກຸ່ມບໍລິສັດພ້ອມກັນປຶກສາຫາລື, ພ້ອມກັນເຮັດວຽກກັບບັນດາກົມກອງຮັບຜິດຊອບເພື່ອຊອກໄດ້ບັນດາເປົ້າໝາຍ, ທິດທາງເດີນໃໝ່, ບັນດາຂົງເຂດໃໝ່, ຂະແໜງອາຊີບໃໝ່ ແລະມາດຕະການໃໝ່”.
ໃນຮ່າງເອກະສານກອງປະຊຸມ ຄັ້ງທີ XIII ຂອງພັກ ໄດ້ຍົກອອກວິໄສທັດພັດທະນາປະເທດຊາດເຖິງປີ 2025, 2030, 2045. ໃນນັ້ນ, ມີການຍົກອອກວິທີການຂອງຫວຽດນາມ ເຖິງປີ 2025 ໃຫ້ກາຍເປັນປະເທດອຸດສາຫະກຳຕາມທິດທັນສະໄໝ, ມີລາຍຮັບປານກາງສູງໂດຍພື້ນຖານ; ເຖິງປີ 2030, ກາຍເປັນປະເທດອຸດສາຫະກຳຕາມທິດທັນສະໄໝ. ຮອດປີ 2045 ກາຍເປັນປະເທດອຸດສາຫະກໍາທັນສະໄໝ, ມີລາຍຮັບສູງ. ເປົ້າໝາຍນັ້ນໄດ້ຮຽກຮ້ອງໃຫ້ແຕ່ລະສຳນັກງານ, ກົມກອງ, ພະນັກງານ, ສະມາຊິກພັກແຕ່ລະຄົນໃນຖານະຕຳແໜ່ງຂອງຕົນຕ້ອງມານະພະຍາຍາມປະກອບສ່ວນກຳລັງເຫ່ືອແຮງ, ສະຕິປັນຍາຂອງຕົນເພື່ອໃຫ້ໝູ່ຄະນະເຮັດສຳເລັດໜ້າທີ່ຢ່າງດີເດັ່ນ, ປະກອບສ່ວນລວມເຂົ້າໃນການພັດທະນາຂອງປະເທດ. ໃນນັ້ນ, ບັນດາກົມກອງ, ຄື: Viettel ຕ້ອງສະແດງໃຫ້ເຫັນຢ່າງຈະແຈ້ງກ່ຽວກັບບົດບາດເປັນເສົາຄ້ຳດ້ານເສດຖະກິດ, ເຕັກໂນໂລຢີຂອງຕົນ, ປະກອບສ່ວນຫັນກອງທັບ ແລະປະເທດເປັນທັນສະໄໝ, ເພື່ອການພັດທະນາແບບຍືນຍົງຂອງປະເທດ, ຮັບປະກັນການປ້ອງກັນຊາດ, ປ້ອງກັນຄວາມສະຫງົບແຫ່ງຊາດໄວ້ໃຫ້ໝັ້ນຄົງເຂັ້ມແຂງ.
ໂດຍ: ແສງເດືອນ