Startup ຫວຽດນາມ ບືນຕົວຂຶ້ນກັບສາກົນ
ຕາມການລາຍງານ “ຮູບພາບເລີ່ມທຸລະກິດປະດິດຄິດສ້າງຢູ່ ຫວຽດນາມ 2019” ຂອງອົງການການຄ້າ ແລະການລົງທຶນສັງກັດລັດຖະບານອົດສະຕາລີ, ປະຈຸບັນ ຫວຽດນາມ ພວມຢືນຢູ່ອັນດັບທີ 3 ໃນພາກພື້ນອາຊີຕາເວັນອອກສ່ຽງໃຕ້ກ່ຽວກັບຈໍານວນ Startup ເຊິ່ງມີຫຼາຍກວ່າ 3.000 ແຫ່ງທີ່ພວມເຄື່ອນໄຫວຢູ່. ມີການລົງທຶນຫຼາຍລ້ານໂດລາສະຫະລັດໃຫ້ບັນດາ startup ຫວຽດນາມ ໄດ້ດໍາເນີນໃນປີ 2019. ໜຶ່ງໃນບັນດາບ້ວງເງິນລົງທຶນໃຫຍ່ທີ່ສຸດໄດ້ສະແດງໃຫ້ເຫັນການດຶງດູດຂອງ startup ຫວຽດນາມ, ເຊິ່ງລາຍລະອຽດແມ່ນບັນດາ startup ໃນຂົງເຂດ fintech, ຕົ້ນຕໍແມ່ນກອງເງິນທຶນ Vision Fund ຂອງ SoftBank ແລະກອງເງິນລົງທຶນແຫ່ງຊາດສິງກະໂປ GIC ລົງທຶນ 300 ລ້ານໂດລາສະຫະລັດໃຫ້ແກ່ VNPay. ດ້ວຍບ້ວງເງິນອຸປະຖໍານີ້, VNPay ໄດ້ເຂົ້າໄປຢູ່ໃນບັນຊີລາຍຊື່ກຸ່ມບັນດາ “ກິເລນ”.
|
|
ຜູ້ຕາງໜ້າຂອງ Abivin ຮັບລາງວັນທີໜຶ່ງໃນການແຂ່ງຂັນ Startup World Cup 2019 (ຢູ່ San Francisco, ອາເມລິກາ) ດ້ວຍລາງວັນ 1.000.000 ໂດລາສະຫະລັດ. ພາບ: qdnd.vn. |
ພ້ອມກັນນັ້ນ, ບັນດາ startup ໄດ້ມີຄວາມໝັ້ນໃຈໄປຕ່າງປະເທດ, ເຂົ້າຮ່ວມສະໜາມແຂ່ງຂັນສາກົນ. ພົ້ນເດ່ັນແມ່ນ Abivin-startup ສະໜອງຊອບແວຄຸ້ມຄອງລະບົບສະໜອງການຂົນສົ່ງດີທີ່ສຸດ, ເປັນຕາງໜ້າທໍາອິດຂອງ ຫວຽດນາມ ທີ່ເອົາຊະນະຫຼາຍ startup ທີ່ມາຈາກກວ່າ 40 ປະເທດໃນໂລກເພື່ອໄປຊີງຊະນະເລີດຢູ່ການແຂ່ງຂັນ Startup World Cup 2019 (ຈັດຕັ້ງຢູ່ San Francisco, ອາເມລິກາ) ແລະຍາດໄດ້ລາງວັນ 1.000.000 ໂດລາສະຫະລັດ. ທ່ານນາງ ຫງວຽນຮວ່າງແອັງ, ຜູ້ອໍານວຍການບໍລິຫານທັງເປັນຜູ້ສ້າງຕັ້ງ Abivin, ແບ່ງປັນວ່າ: “ການເດີນທາງໄປພິຊິດ Startup World Cup 2019 ແມ່ນບຸນວາດສະໜາ. ເພື່ອບັນລຸໄດ້ຜົນສໍາເລັດທີ່ບໍ່ຄາດຄິດໃນຄັ້ງນີ້ແມ່ນຕ້ອງການຫຼາຍປັດໄຈທີ່ສຸດ, ລວມມີທ່າແຮງຂອງຖັນແຖວພະນັກງານຫຼັກແຫຼ່ງຢູ່ Abivin, ປັດໄຈຕະຫຼາດ ແລະພິເສດແມ່ນຍ້ອນມີການເຊື່ອມຕໍ່ຂອງກະຊວງວິທະຍາສາດ ແລະເຕັກໂນໂລຢີເພື່ອໃຫ້ພວກຂ້າພະເຈົ້າກາຍເປັນຜູ້ຕາງໜ້າຂອງ ຫວຽດນາມ ໄປເຂົ້າຮ່ວມການແຂ່ງຂັນ”.
ທ່ານ ຈູງອັກແອັງ ລັດຖະມົນຕີກະຊວງວິທະຍາສາດ ແລະເຕັກໂນໂລຢີ ໃຫ້ຂໍ້ສັງເກດວ່າ, ຂະໜາດຂອງການລົງທຶນທີ່ນັບມື້ນັບເພີ່ມຂື້ນນັ້ນໄດ້ສະແດງໃຫ້ເຫັນວ່າຄວາມສາມາດບົ່ມຊ້ອນຂອງຫວຽດນາມ ຈະສ້າງ “ກິເລນ” ໃໝ່ຕື່ມອີກ.
ທ່ານ ຟ້າມວັນຮົ່ງ, ຫົວໜ້າສະຖາບັນຍຸດທະສາດ ແລະນະໂຍບາຍວິທະຍາສາດ ແລະເຕັກໂນໂລຢີ ສັງກັດກະຊວງວິທະຍາສາດ ແລະເຕັກໂນໂລຢີ ໃຫ້ຮູ້ວ່າ, ບັນດາວິສາຫະກິດຫວຽດນາມ ນັບມື້ນັບຮັບຮູ້ຢ່າງຈະແຈ້ງກວ່າກ່ຽວກັບບົດບາດຂອງວິທະຍາສາດ, ເຕັກໂນໂລຢີ ແລະການປ່ຽນແປງໃໝ່ຫົວຄິດປະດິດສ້າງໃນການພັດທະນາແບບຍືນຍົງ ແລະເພີ່ມທະວີການລົງທຶນໃຫ້ວິທະຍາສາດ ແລະເຕັກໂນໂລຢີ. ຫຼາຍວິສາຫະກິດ, ກຸ່ມບໍລິສັດໃຫຍ່ພາຍໃນປະເທດ, ຄື: ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel), ກຸ່ມບໍລິສັດ Vingroup, ກຸ່ມບໍລິສັດນໍ້າມັນອາຍແກັຣ (PVN)... ໄດ້ລົງທຶນໃຫ້ແກ່ການຄົ້ນຄວ້າ ແລະພັັດທະນາເຕັກໂນໂລຢີ, ເລີ່ມທຸລະກິດຢ່າງມີຫົວຄິດປະດິດຄິດສ້າງ, ສ້າງຕັ້ງສະຖາບັນຄົ້ນຄວ້າ, ມະຫາວິທະຍາໄລຂອງວິສາຫະກິດ.
ຕ້ອງມີສະພາບແວດລ້ອມດ້ານນິຕິກໍາສະດວກກວ່າ
ຕາມທ່ານ ຟ້າມວັນຮົ່ງ ແລ້ວ, ໄປຄຽງຄູ່ກັບບັນດາຜົນງານທີ່ບັນລຸໄດ້, ວິທະຍາສາດ, ເຕັກໂນໂລຢີ ແລະການປ່ຽນແປງໃໝ່ຫົວຄິດປະດິດຄິດສ້າງຍັງມີຂໍ້ຈໍາກັດຕ່າງໆໃນການປະກອບສ່ວນຕໍ່ກັບການພັດທະນາແບບຍືນຍົງຢູ່ຫວຽດນາມ.
ກ່ຽວກັບເສດຖະກິດ, ວິທະຍາສາດ, ເຕັກໂນໂລຢີ ແລະການປ່ຽນແປງໃໝ່ຫົວຄິດປະດິດຄິດສ້າງຍັງບໍ່ທັນມີການປ່ຽນແປງພື້ນຖານວັດຖຸເຕັກນິກຂອງພື້ນຖານເສດຖະກິດຢ່າງແທ້ຈິງເທື່ອ... ກ່ຽວກັບສັງຄົມວິທະຍາສາດ, ເຕັກໂນໂລຢີ ແລະການປ່ຽນແປງໃໝ່ຫົວຄິດປະດິດສ້າງຍັງບໍ່ທັນຮັບປະກັນການຫັນຕົວເມືອງໃຫ້ຍືນຍົງ, ຮັດແຄບໄລຍະຫ່າງລະຫວ່າງຄວາມຮັ່ງມີ-ທຸກຍາກ, ປັບປຸງຄຸນນະພາບການດໍາລົງຊີວິດ, ເພີ່ມທະວີຄຸນຄ່າແຮງງານຂອງມະນຸດ, ຍົກສູງຄຸນນະພາບການສຶກສາໄດ້ເທື່ອ. ກ່ຽວກັບສະພາບແວດລ້ອມ, ວິທະຍາສາດ, ເຕັກໂນໂລຢີ ແລະການປ່ຽນແປງໃໝ່ຫົວຄິດປະດິດຄິດສ້າງຍັງບໍ່ທັນປະກອບສ່ວນສ້າງຄວາມເປັນເຈົ້າການໃນການຮັບມືກັບການປ່ຽນແປງຂອງດິນຟ້າອາກາດ ແລະການປົກປັກຮັກສາສິ່ງແວດລ້ອມຢ່າງແທ້ຈິງເທື່ອ.
ກ່ຽວກັບວິສາຫະກິດ, ຜູ້ຕາງໜ້າຂອງ Viettel ຖືວ່າ, ປະຈຸບັນບັນດານະໂຍບາຍຂອງກະຊວງວິທະຍາສາດ ແລະເຕັກໂນໂລຢີຂອງລັດໄດ້ອອກແບບຕົ້ນຕໍແມ່ນຮັບໃຊ້ການຄຸ້ມຄອງການເຄື່ອນໄຫວວິທະຍາສາດ ແລະເຕັກໂນໂລຢີນໍາໃຊ້ງົບປະມານແຫ່ງລັດຢູ່ບັນດາຫົວໜ່ວຍພາລະກິດວິທະຍາສາດ ແລະເຕັກໂນໂລຢີພາກລັດ, ໃນຂະນະນັ້ນທີ່ບັນດານະໂຍບາຍໃຫ້ແກ່ວິສາຫະກິດຍັງຂາດເຂີນ.
ຄຽງຂ້າງນັ້ນ, ທັດສະນະທີ່ຖືການລົງທຶນໃຫ້ໜ້າທີ່ຄົ້ນຄວ້າ ແລະພັດທະນາ (R&D) ເປັນຕົ້ນແມ່ນໂຄງການລົງທຶນພັດທະນາພວມເຮັດຊັກຊ້າໃນວິວັດການຄົ້ນຄວ້າຢູ່ວິສາຫະກິດລັດເມື່ອຊື້ອຸປະກອນ, ເຄື່ອງຈັກ, ວັດຖຸຮັບໃຊ້ໜ້າທີ່ຄົ້ນຄວ້າຜ່ານການຮັບເໝົາ.
ໂດຍ: ເກື່ອງດັ້ງ