Viettel ປະຕິບັດການໂທ 5G ຄັ້ງທໍາອິດໃນອຸປະກອນໂດຍ Viettel ຄົ້ນຄວ້າ, ຜະລິດເອງ
ກປ.ອອນໄລ - ວັນທີ 17 ມັງກອນ, ທີ່ສໍານັກງານບໍລິສັດໃຫຍ່ອຸດສາຫະກຳເຕັກໂນໂລຢີສູງຮວ່າລາກ (ນະຄອນຮ່າໂນ້ຍ), ກຸ່ມບໍລິສັດອຸດສາຫະກໍາ-ໂທລະຄົມມະນາຄົມກອງທັບ (Viettel) ໄດ້ປະຕິບັດການໂທ 5G ໂດຍ Viettel ຄົ້ນຄວ້າ, ຜະລິດເອງ.
ທີ່ເຫດການ, ທ່ານ ຫງວຽນແມ້ງຮຸ່ງ ລັດຖະມົນຕີກະຊວງຖະແຫຼງຂ່າວ ແລະສື່ສານຫວຽດນາມ, ທ່ານ ຈູງອັກແອັງ ລັດຖະມົນຕີກະຊວງວິທະຍາສາດ ແລະເຕັກໂນໂລຢີຫວຽດນາມ, ໄດ້ປະຕິບັດການໂທ video ທໍາອິດທີ່ນໍາໃຊ້ສາຍສົ່ງຂໍ້ມູນເຊື່ອມຕໍ່ 5G ໃນອຸປະກອນຮັບສັນຍານ ແລະກະຈາຍຄື້ນ gNodeB ໂດຍ Viettel ຄົ້ນຄວ້າ ແລະຜະລິດເອງ, ລວມມີທັງອຸປະກອນຮາດແວ ແລະຊອບແວ.
|
|
ທ່ານ ຫງວຽນແມ້ງຮຸ່ງ ລັດຖະມົນຕີກະຊວງຖະແຫຼງຂ່າວ ແລະສື່ສານຫວຽດນາມ, ທ່ານ ຈູງອັກແອັງ ລັດຖະມົນຕີກະຊວງວິທະຍາສາດ ແລະເຕັກໂນໂລຢີຫວຽດນາມ ປະຕິບັດການໂທ 5G ດ້ວຍອຸປະກອນ ແລະຊອບແວໂດຍ Viettel ຄົ້ນຄວ້າ, ຜະລິດເອງ. ພາບ: ໂຮ່ກວາງເຟືອງ. |
ຖັນແຖວວິສະວະກອນຂອງ Viettel ໄດ້ພັດທະນາລະບົບອຸປະກອບ gNodeB 5G ໃນໄລຍະ 6 ເດືອນ (ແຕ່ເດືອນມິຖຸນາ-ທັນວາ 2019) ດ້ວຍພື້ນຖານບົດຮຽນມາຈາກວິວັດການຄົ້ນຄວ້າເອງພັດທະນາສະຖານີຮັບສັນຍານ ແລະກະຈາຍຄື້ນ BTS ໃຫ້ 4G – eNodeB ແລະວິວັດການຄົ້ນຄວ້າກ່ອນ 5G. ຄືແນວນັ້ນ, ພາຍຫຼັງເປັນເວລາ 8 ເດືອນນັບແຕ່ວັນທີ Viettel ປະຕິບັດການໂທ 5G ທຳອິດດ້ວຍອຸປະກອນນໍາເຂົ້າຂອງຄູ່ຮ່ວມມືໃນເດືອນພຶດສະພາ 2019, ຫວຽດນາມ ໄດ້ເປັນເຈົ້າຂອງເຕັກໂນໂລຢີເຄືອຂ່າຍ 5G ຢ່າງເປັນທາງການ.
ປະຈຸບັນ, ໃນໂລກມີ 5 ບໍລິສັດໄດ້ຜະລິດສໍາເລັດບັນດາອຸປະກອນເຄືອຂ່າຍໃຫ້ 5G ລວມມີ: Ericsson, Nokia, Huawei, Samsung ແລະ ZTE. Viettel ຈະແມ່ນບໍລິສັດສະໜອງການຜະລິດອຸປະກອນທີ 6 ໃນໂລກ. ໃນຈໍານວນບັນດາບໍລິສັດສະໜອງດັ່ງກ່າວ, ມີແຕ່ບໍລິສັດ Viettel ເທົ່ານັ້ນ, ທັງແມ່ນບໍລິສັດຂຸດຄົ້ນໂທລະຄົມມະນາຄົມ, ທັງມີຄວາມສາມາດຜະລິດບັນດາອຸປະກອນເຄືອຂ່າຍ.
|
|
ບັນດາຜູ້ແທນຮັບຟັງການແນະນໍາກ່ຽວກັບລະບົບ 5G Viettel. ພາບ: ໂຮ່ກວາງເຟືອງ. |
ກ່ອນໜ້ານັ້ນ, ວັນທີ 28 ທັນວາ 2019, ທີ່ກອງປະຊຸມສະຫຼຸບວຽກງານປີ 2019 ຂອງກະຊວງຖະແຫຼງຂ່າວ ແລະສື່ສານຫວຽດນາມ, Viettel ໄດ້ສະເໜີຕົວອຸປະກອນສະຖານີຮັບສັນຍານ ແລະກະຈາຍຄື້ນ 5G - gNodeB. ເລື່ອງຄົ້ນຄວ້າເອງ ແລະຜະລິດອຸປະກອນ 5G ຈະຊ່ວຍໃຫ້ Viettel ເປັນເຈົ້າການໃນການຜັນຂະຫຍາຍ 5G ໃຫ້ເຄືອຂ່າຍມືຖືຂອງຕົນ ແລະບັນດາການບໍລິການ, ແນໃສ່ຊ່ວຍໃຫ້ລູກຄ້າທີ່ນໍາໃຊ້ການບໍລິການ 5G ດ້ວຍຄຸນນະພາບດີທີ່ສຸດ.
ໂດຍ: ເຈິ່ນຮວ່ຽນ