ໄຂງານຕະຫຼາດນັດສາກົນສິນຄ້າອຸດສາຫະກໍາຫວຽດນາມ 2019
ກປ.ອອນໄລ - ວັນທີ 8 ຕຸລາ, ທີ່ສູນວາງສະແດງສາກົນ I.C.E, ຮ່າໂນ້ຍ, ບໍລິສັດຫຸ້ນສ່ວນສູນຕະຫຼາດນັດວາງສະແດງຫວຽດນາມ ໄດ້ຈັດຕັ້ງພິທີໄຂງານຕະຫຼາດນັດສາກົນສິນຄ້າອຸດສາຫະກໍາຫວຽດນາມ 2019 (VIIF’2019).
ງານຕະຫຼາດນັດປີນີ້ດຶງດູດກວ່າ 350 ວິສາຫະກິດສະເພາະກ່ຽວກັບຂົງເຂດອຸດສາຫະກໍາທີ່ມາຈາກຫຼາຍປະເທດຄື: ຫວຽດນາມ, ສ. ເກົາຫຼີ, ສປ. ຈີນ, ຍີ່ປຸ່ນ, ລັດເຊຍ...
|
|
ບັນດາຜູ້ແທນຕັດແຖບຜ້າ. ພາບ: ລາຢຸຍ. |
ນອກຈາກນັ້ນ, ທີ່ງານຕະຫຼາດນັດຍັງດໍາເນີນບັນດາລາຍການສົ່ງເສີມການຄ້າ, ເຊື່ອມຈອດການພົວພັນດ້ານການຄ້າເພື່ອແນໃສ່ສ້າງໂອກາດເພື່ອໃຫ້ບັນດາວິສາຫະກິດທັງຢູ່ພາຍໃນ ແລະຕ່າງປະເທດແລກປ່ຽນ, ຮ່ວມມືດໍາເນີນທຸລະກິດຢ່າງເລິກເຊິ່ງກວ້າງຂວາງ ແລະກອງປະຊຸມສຳມະນາຕ່າງໆ ເພື່ອແນໃສ່ຊອກຫາມາດຕະການຊຸກຍູ້ຂະແໜງອຸດສາຫະກໍາພັດທະນາແບບຍືນຍົງ.
ກ່າວຄໍາເຫັນທີ່ງານຕະຫຼາດນັດ, ທ່ານ ຕ້າກວາງດົງ, ຮອງລັດຖະມົນຕີກະຊວງວັດທະນະທໍາ, ກິລາ ແລະການທ່ອງທ່ຽວຫວຽດນາມ ໃຫ້ຮູ້ວ່າ: ຫວຽດນາມ ເລີ່ມກ້າວເຂົ້າສູ່ໄລຍະເຊື່ອມໂຍງເຂົ້າພື້ນຖານເສດຖະກິດສາກົນຢ່າງເລິກເຊິ່ງກວ້າງຂວາງ. ການປະຕິວັດອຸດສາຫະກໍາ 4.0 ສາມາດນຳມາໃຫ້ຫວຽດນາມ ຫຼາຍກາລະໂອກາດເພື່ອຍູ້ໄວການຫັນເປັນອຸດສາຫະກໍາ, ທັນສະໄໝ; ພ້ອມທັງກໍ່ນຳເອົາສິ່ງທ້າທາຍມາໃຫ້ວິວັດການພັດທະນາ. ຕໍ່ໜ້າບັນດາກາລະໂອກາດ ແລະສິ່ງທ້າທາຍໃໝ່, ບັນດາວິສາຫະກິດຫວຽດນາມ ເວົ້າລວມ ແລະວິສາຫະກິດເຄື່ອນໄຫວໃນຂົງເຂດອຸດສາຫະກໍາເວົ້າສະເພາະຄວນຂົນຂວາຍຕາມທິດຮັບໃຊ້ຕະຫຼາດພາຍໃນປະເທດ ແລະສ້າງກຳລັງຄວາມສາມາດຜະລິດໃໝ່ເພື່ອກຳແໜ້ນບັນດາກາລະໂອກາດສົ່ງອອກໃນສະພາບແວດລ້ອມແຫ່ງການແກ່ງແຍ້ງຢ່າງສະເໝີພາບ.
ໂດຍ: ເກື່ອງດັ້ງ