ຫວຽດນາມ ມານະພະຍາຍາມຮັບປະກັນຄວາມສະເໝີພາບກ່ຽວກັບກາລະໂອກາດໃຫ້ແກ່ແມ່ຍິງ
ກປ.ອອນໄລ - ວັນທີ 4 ກໍລະກົດ, ທີ່ນະຄອນ Basel, ປະເທດສະວິດ, ທ່ານນາງ ດັ້ງທິງອັກທີ້ງ, ຮອງປະທານປະເທດ ນໍາໜ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມສຸດຍອດແມ່ຍິງທ່ົວໂລກ ປີ 2019 ພາຍໃຕ້ຫົວຂໍ້ “ແມ່ຍິງ-ສ້າງຄໍານິຍາມຜົນສໍາເລັດຄືນໃໝ່”. ກອງປະຊຸມປີນີ້ດຶງດູດການເຂົ້າຮ່ວມຂອງຜູ້ແທນ 1.600 ຄົນ ທີ່ມາຈາກກວ່າ 70 ປະເທດ ແລະເຂດແຄ້ວນ.
ກ່າວຄໍາເຫັນທີ່ພິທີໄຂ, ທ່ານນາງ ດັ້ງທິງອັກທີ້ງ ຕີລາຄາສູງບັນດາການປະກອບສ່ວນຂອງກອງປະຊຸມສຸດຍອດແມ່ຍິງທ່ົວໂລກ ໃນການຊຸກຍູ້ຄວາມສະເໝີພາບລະຫວ່າງຍິງ-ຊາຍ ແລະຍົກສູງບົດບາດຂອງແມ່ຍິງທັງຢູ່ໃນປະເທດ ແລະສາກົນ. ທ່ານນາງ ດັ້ງທິງອັກທີ້ງ ລາຍງານບັນດາຜົນງານຂອງແມ່ຍິງຫວຽດນາມໃນຂົງເຂດຕ່າງໆ.
ທ່ານນາງ ດັ້ງທິງອັກທີ້ງ ຮຽກຮ້ອງການຮ່ວມມືລະຫວ່າງບັນດາປະເທດ, ອົງການຈັດຕັ້ງ ແລະວິສາຫະກິດຕ່າງໆໃນການສ້າງກອບນິຕິກໍາຮັບປະກັນຄວາມສະເໝີພາບກ່ຽວກັບກາລະໂອກາດໃຫ້ແກ່ແມ່ຍິງ ແລະໜູນຊ່ວຍແມ່ຍິງປັບຕົວໃຫ້ເໝາະສົມກັບສັງກາດດີຈີຕອນໃຫ້ດີກວ່າ.
|
|
ທ່ານນາງ ດັ້ງທິງອັກທີ້ງ, ຮອງປະທານປະເທດຫວຽດນາມ ກ່າວຄໍາເຫັນທີ່ພິທີໄຂ. ພາບ: ສໍານັກຂ່າວສານຫວຽດນາມ. |
ທ່ານນາງ ດັ້ງທິງອັກທີ້ງ ຮຽກຮ້ອງໃຫ້ແມ່ຍິງຈົ່ງມານະພະຍາຍາມເພື່ອເສີມຂະຫຍາຍຄວາມສາມາດບົ່ມຊ້ອນ, ກໍາແໜ້ນເຕັກໂນໂລຢີ, ເປັນເຈົ້າການຮໍ່າຮຽນເພື່ອສາມາດຕອບສະໜອງໄດ້ບັນດາຄວາມຮຽກຮ້ອງຕ້ອງການຂອງວຽກງານດ້ວຍຄຸນນະພາບສູງ ແລະການຫັນປ່ຽນແຮງງານໃນສະໄໝດີຈີຕອນ.
ທ່ານນາງ ດັ້ງທິງອັກທີ້ງ ຢ້ັງຢືນວ່າ ບັນດາຄວາມມານະພະຍາຍາມຂອງຫວຽດນາມໃນຂົງເຂດນີ້, ໃນນັ້ນມີແຜນນະໂຍບາຍຕ່າງໆ ສ້າງເງື່ອນໄຂສະດວກໃຫ້ແກ່ແມ່ຍິງໃນການດໍາເນີນທຸລະກິດ, ສົ່ງເສີມແມ່ຍິງເຂົ້າຮ່ວມບັນດາຂົງເຂດວິທະຍາສາດ, ເຕັກໂນໂລຢີ, ເຕັກນິກ, ກະສິກໍາຄຸນນະພາບສູງ...
ໂດຍ: ທູຈາງ