ພັດທະນາການຮ່ວມມືຮອບດ້ານສອງປະເທດ
ໃນໄລຍະມໍ່ໆມານີ້, ການນໍາຂັ້ນສູງສອງປະເທດ ຫວຽດນາມ-ລາວ ສືບຕໍ່ມີບັນດາການພົບປະເນື່ອງໃນໂອກາດການຢ້ຽມຢາມສອງຝ່າຍ ຫຼື ການພົບປະຢູ່ເວທີປາໄສພາກພື້ນ ແລະສາກົນ. ການພົບປະເຫຼົ່ານັ້ນໄດ້ປະກອບສ່ວນຊຸກຍູ້ປັບປຸງການພົວພັນສອງປະເທດ. ຫວ່າງແລ້ວນີ້, ໂດຍຮັບຄໍາເຊີນຂອງທ່ານ ໂຕເລິມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະພັນລະຍາ, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ແລະພັນລະຍາ ໄດ້ມີການຢ້ຽມຢາມທາງລັດຖະກິດຫວຽດນາມ, ແຕ່ວັນທີ 10 ຫາວັນທີ 13 ກັນຍາ 2024.
ການຢ້ຽມຢາມທາງລັດຖະກິດຫວຽດນາມ ຂອງທ່ານເລຂາທິການໃຫຍ່, ປະທານປະເທດລາວ ດໍາເນີນພາຍຫຼັງທີ່ຄະນະບໍລິຫານງານສູນກາງພັກກອມມູນິດຫວຽດນາມ ເລືອກຕັ້ງທ່ານ ໂຕເລິມ ເປັນເລຂາທິການໃຫຍ່ພັກກອມມູນິດຫວຽດນາມ. ນີ້ແມ່ນການເຄື່ອນໄຫວການທູດສຳຄັນພິເສດຕໍ່ກັບສອງພັກ, ສອງລັດ; ດໍາເນີນໃນສະພາບການສອງພັກ, ສອງລັດ ພວມຕັ້ງໜ້າປະຕິບັດມະຕິກອງປະຊຸມໃຫຍ່ຂອງແຕ່ລະພັກ, ກະກຽມກອງປະຊຸມໃຫຍ່ພັກທຸກຂັ້ນມຸ່ງເຖິງກອງປະຊຸມໃຫຍ່ ຄັ້ງທີ XII ຂອງພັກປະຊາຊົນ ປະຕິວັດລາວ ແລະກອງປະຊຸມໃຫຍ່ ຄັ້ງທີ XIV ຂອງພັກກອມມູນິດຫວຽດນາມ ເປັນຢ່າງດີ. ນີ້ແມ່ນໜຶ່ງໃນບັນດາຂີດໝາຍສໍາຄັນໃນປະຫວັດແຫ່ງການພົວພັນສອງປະເທດ, ປະກອບສ່ວນຊຸກຍູ້ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານ ຫວຽດນາມ-ລາວ ໃຫ້ພັດທະນາຂຶ້ນສູ່ລະດັບສູງໃໝ່, ນັບມື້ນັບເຂົ້າສູ່ລວງເລິກ, ມີປະສິດທິຜົນ, ແທດຈິງ, ນຳເອົາຄວາມຈະເລີນຮຸ່ງເຮືອງມາໃຫ້ປະຊາຊົນແຕ່ລະປະເທດ, ປະກອບສ່ວນເຂົ້າສັນຕິພາບ, ສະຖຽນລະພາບ, ການຮ່ວມມື, ພັດທະນາຢູ່ພາກພື້ນ ແລະໃນໂລກ.
    |
 |
|
ບັນຍາກາດທີ່ການຕ້ອນຮັບ. ພາບ: ທຸທາວ |
ກ່ຽວກັບການຮ່ວມມືເສດຖະກິດ, ການຄ້າ, ການລົງທຶນລະຫວ່າງສອງປະເທດໄດ້ຮັບການຊຸກຍູ້ ແລະບັນລຸໄດ້ບາງໝາກຜົນທີ່ໜ້າຮັບຮູ້. ສອງຝ່າຍໄດ້ຕັ້ງໜ້າຜັນຂະຫຍາຍຂໍ້ຕົກລົງຍຸດທະສາດວ່າດ້ວຍການຮ່ວມມືຫວຽດນາມ-ລາວ ໄລຍະ 2021-2030 ແລະສັນຍາຮ່ວມມື ຫວຽດນາມ-ລາວ ໄລຍະ 2021-2025; ບັນດາສັນຍາລະຫວ່າງສອງລັດຖະບານ ແລະຂໍ້ຕົກລົງຮ່ວມມືຢູ່ກອງປະຊຸມຄະນະກໍາມະການ ລະຫວ່າງລັດຖະບານ ຄັ້ງທີ 46; ສືບຕໍ່ເຊັນເອກະສານຮ່ວມມື, ສ້າງແລວນິຕິກໍາຄົບຊຸດເພື່ອຊຸກຍູ້ການຮ່ວມມື. ສອງຝ່າຍໄດ້ສົມທົບກັນແລກປ່ຽນບົດຮຽນກ່ຽວກັບວຽກງານຄຸ້ມຄອງບໍລິຫານເສດຖະກິດມະຫາພາກ...
ກ່ຽວກັບການລົງທຶນຂອງຫວຽດນາມ ຢູ່ ລາວ, ມາຮອດປະຈຸບັນ ຫວຽດນາມ ມີ 256 ໂຄງການລົງທຶນຢູ່ລາວ ດ້ວຍຍອດຈຳນວນທຶນກວ່າ 5,5 ຕື້ໂດລາສະຫະລັດ, ທຶນປະຕິບັດສະສົມບັນລຸ 2,8 ຕື້ໂດລາສະຫະລັດ. ໃນ 7 ເດືອນຂອງປີ 2024, ມີ 6 ໂຄງການໄດ້ຮັບອະນຸຍາດໃໝ່, ດ້ວຍເງິນລົງທຶນບັນລຸ 36,7 ລ້ານໂດລາສະຫະລັດ, ເພີ່ມຂຶ້ນ 39% ເມື່ອທຽບໃສ່ໄລຍະດຽວກັນຂອງປີ 2023. ຫຼາຍໂຄງການລົງທຶນຂອງຫວຽດນາມ ເຄື່ອນໄຫວຢ່າງມີປະສິດທິຜົນ, ປະກອບສ່ວນພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ ແລະຍົກສູງລາຍຮັບໃຫ້ຜູ້ອອກແຮງງານນັບພັນຄົນ, ເພີ່ມແຫຼ່ງລາຍຮັບໃຫ້ງົບປະມານຂອງລາວ, ໂດຍສະເພາະແມ່ນໃນຂົງເຂດໂທລະຄົມມະນາຄົມ, ທະນາຄານ, ປູກຝັງ ແລະປຸກແຕ່ງຢ່າງພາລາ, ຜະລິດ ແລະປຸງແຕ່ງສະບຽງອາຫານ ແລະທັນຍາຫານ, ນ້ຳນົມ...
ຊຸກຍູ້ການພົວພັນຮ່ວມມື ອານຢາງ-ລາວ
ບົນພື້ນຖານການພົວພັນອັນດີງາມຂອງສອງປະເທດຫວຽດນາມ-ລາວ, ໃນຊຸມປີຜ່ານມາ, ແຂວງອານຢາງ ໄດ້ມີການພົວພັນຮ່ວມມືກັບສອງແຂວງຈໍາປາສັກ (ປີ 2003) ແລະສະຫວັນນະເຂດ (ປີ 2009) ຂອງລາວ. ແຂວງອານຢາງ ແລະສອງແຂວງເພື່ອນລາວໄດ້ຊຸກຍູ້ການຮ່ວມມືຕົ້ນຕໍແມ່ນໃນຂົງເຂດກະສິກໍາ, ການຄ້າ-ການບໍລິການ, ການສຶກສາ ແລະບໍາລຸງສ້າງ. ແຕ່ປີ 2007 ມາຮອດປະຈຸບັນ, ອານຢາງ ໄດ້ບໍາລຸງສ້າງໃຫ້ນັກສຶກສາລາວ 27 ຄົນທີ່ມາຈາກບັນດາແຂວງຈໍາປາສັກ ແລະສະຫວັນນະເຂດ, ລົງເລິກຂະແໜງປູກຝັງ, ສິນໃນນໍ້າ, ເຕັກນິກສິ່ງແວດລ້ອມ ແລະຄຸ້ມຄອງດໍາເນີນທຸລະກິດ. ແຂວງຈໍາປາສັກ ກໍ່ບຸລິມະສິດທຶນການສຶກສາ 9 ທຶນໃຫ້ພະນັກງານ, ພາລະກອນແຂວງອານຢາງ ຮຽນພາສາລາວ ຢູ່ສູນສອນພາສາລາວ ໃນແຂວງຈໍາປາສັກ.
ທີ່ການຕ້ອນຮັບທ່ານ ພອນສີ ບຸນມີໄຊ ຫົວໜ້າກົງສູນໃຫຍ່ລາວ ປະຈຳ ນະຄອນໂຮ່ຈີມິນ ໄດ້ເຂົ້າຢ້ຽມຂໍ່ານັບ, ທ່ານ ໂຮ່ວັນມື່ງ ປະທານຄະນະກໍາມະການປະຊາຊົນແຂວງອານຢາງ ໄດ້ສະແດງຄວາມເຊື່ອໝັ້ນ ແລະປາດຖະໜາວ່າ: “ສາຍພົວພັນແບບພິເສດ, ຫາຍາກລະຫວ່າງ ຫວຽດນາມ-ລາວ ສືບຕໍ່ໄດ້ເພີ່ມພູນຄູນສ້າງບົນພື້ນຖານເພື່ອເປົ້າໝາຍລວມຂອງສອງປະເທດ, ດ້ວຍຈິດໃຈສາກົນທີ່ປອດໄສ, ນໍາການປະຕິວັດສອງປະເທດຜ່ານຜ່າສິ່ງທ້າທາຍ, ອຸປະສັກເທື່ອລະກ້າວ. ນີ້ແມ່ນສິ່ງທີ່ລໍ້າຄ່າ, ແມ່ນພື້ນຖານໜັກແໜ້ນເພື່ອໃຫ້ລຸ້ນຕ່າງໆຂອງ ຫວຽດນາມ-ລາວ ໃນປະຈຸບັນ ແລະອະນາຄົດສືບຕໍ່ເສີມຂະຫຍາຍນໍ້າໃຈສາມັກຄີ, ສ້າງການພົວພັນສະເໝີພາບ, ເປັນເຈົ້າຕົນເອງ, ມິດຕະພາບ, ການຮ່ວມມືລະຫວ່າງສອງປະເທດ. ອໍານາດການປົກຄອງແຂວງອານຢາງ ຍາມໃດກໍ່ສະໜັບສະໜູນ ແລະສ້າງທຸກເງື່ອນໄຂສະດວກ, ຊຸກຍູ້ການພົວພັນຮ່ວມມືລະຫວ່າງແຂວງອານຢາງ ກັບບັນດາຄູ່ຮ່ວມມືລາວໃນໄລຍະຈະມາເຖິງ”.
ຕາງໜ້າພັກ ແລະລັດ ແຫ່ງ ສປປ ລາວ, ທ່ານ ພອນສີ ບຸນມີໄຊ ສະແດງຄວາມຮູ້ບຸນຄຸນຕໍ່ການຊ່ວຍເຫຼືອອັນລໍ້າຄ່າທັງດ້ານຈິດໃຈ ແລະວັດຖຸຂອງຫວຽດນາມ. ທ່ານ ພອນສີ ບຸນມີໄຊ ຢັ້ງຢືນວ່າ ຈະພ້ອມກັບພະນັກງານ, ພາລະກອນສະຖານກົງສູນໃຫຍ່ ແຫ່ງ ສປປ ລາວ ຢູ່ນະຄອນໂຮ່ຈີມິນ ມານະພະຍາຍາມກາຍເປັນຂົວເຊື່ອມຕໍ່ເພື່ອປັບປຸງ ແລະພັດທະນາການພົວພັນມິດຕະພາບ, ການຮ່ວມມື ແລະນໍ້າໃຈສາມັກຄີແບບພິເສດຂອງສອງພັກ, ສອງລັດ ແລະປະຊາຊົນ ຫວຽດນາມ-ລາວ. ພ້ອມທັງປາດຖະໜາຢາກສືບຕໍ່ໄດ້ຮັບການຊ່ວຍເຫຼືອ, ໜູນຊ່ວຍຈາກການນໍາແຂວງອານຢາງ ເພື່ອຊຸກຍູ້ການຮ່ວມມືລະຫວ່າງຫວຽດນາມ-ລາວ ເວົ້າລວມ, ລະຫວ່າງແຂວງອານຢາງ ກັບບັນດາທ້ອງຖິ່ນ, ວິສາຫະກິດຂອງ ລາວ ໃນໄລຍະຈະມາເຖິງ.
ໂດຍ: ໄຊນີດາ