ບົດເພງດອກຈໍາປາຢູ່ເຂດດິນແດນແຫ່ງບໍ່ແຮ່

ບຸນປີໃໝ່ລາວ, ຂ້າພະເຈົ້າໄດ້ມີໂອກາດໄປນໍາລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ຫງວຽນຮ່ົງຢຽນ ທີ່ໄປຢ້ຽມຢາມ ແລະເຮັດວຽກຢູ່ປະເທດເພື່ອນມິດລາວ. 8 ເດືອນຕໍ່ມາ, ໃນຊຸມວັນໃກ້ຈະຮອດບຸນປີໃໝ່ປະຈໍາຊາດຂອງຫວຽດນາມ, ຂ້າພະເຈົ້າຈຶ່ງມີໂອກາດໄດ້ພົບປະກັບພວກອ້າຍນ້ອງຂະແໜງອຸດສາຫະກໍາ ແລະການຄ້າສອງປະເທດຢູ່ເຂດດິນແດນບໍ່ແຮ່ກວາງນິງ.

ຈາກບັນດາຄໍາເວົ້າຂອງລຸ້ນພໍ່ລຸ້ນອ້າຍໃນປະຫວັດສາດຈົນເຖິງຄໍາຊີ້ນໍາຂອງນາຍົກລັດຖະມົນຕີສອງສະຫາຍ

ໃນເວລາ 8 ເດືອນ ກ່ອນນີ້, ໃນບົດຂຽນຂອງຕົນ, ຂ້າພະເຈົ້າໄດ້ປຽບທຽບການໄປປະຕິບັດງານ ຂອງສະຫາຍລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ຫງວຽນຮົ່ງຢຽນ ເໝືອນດັ່ງເປັນການ “ເປີດທາງ” ໃຫ້ແກ່ດ້ານການຄ້າ ແລະອຸດສາຫະກໍາສອງປະເທດພັດທະນາຕື່ມອີກໃນທ່າມກາງບຸນປີໃໝ່ລາວ-ລະດູດອກຈໍາປາ ບານ.

ສະນັ້ນ, ມີພຽງແຕ່ 8 ເດືອນຕໍ່ມາ, ພວກຂ້າພະເຈົ້າຈຶ່ງໄດ້ເຫັນກັບຕາຕໍ່ການເປີດທາງນັ້ນໄດ້ນຳມາເຊິ່ງໝາກຜົນຫຼາຍຢ່າງເມື່ອເຂົ້າຮ່ວມເຫດການໂດຍກະຊວງອຸດສາຫະກໍາ ແລະການຄ້າຫວຽດນາມ ເປັນປະທານຈັດຕັ້ງກອງປະຊຸມຮ່ວມມືພັດທະນາຂະແໜງອຸດສາຫະກໍາ ແລະການຄ້າ-ພະລັງງານ ແລະບ່ໍແຮ່ຫວຽດນາມ-ລາວ ປີ 2022 ແລະເຊີນຄະນະຜູ້ແທນກະຊວງອຸດສາຫະກໍາ ແລະການຄ້າລາວ ກັບກະຊວງພະລັງງານ ແລະບໍ່ແຮ່ລາວ ມາເຂົ້າຮ່ວມຢູ່ຫວຽດນາມ ດ້ວຍຜູ້ແທນ 117 ຄົນ.

ກອງປະຊຸມປີນີ້ມີຄວາມໝາຍພິເສດ ເພາະວ່າແມ່ນກອງປະຊຸມຄັ້ງທໍາອິດທີ່ໄດ້ຈັດຕັ້ງຄືນໃໝ່ພາຍຫຼັງຖືກຕັດຕອນຍ້ອນພະຍາດໂຄວິດ-19, ພ້ອມທັງແມ່ນ ການເຄື່ອນໄຫວທີ່ມີຄວາມໝາຍຂໍ່ານັບຮັບຕ້ອນສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດຫວຽດນາມ-ລາວ (1962-2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມືຫວຽດນາມ-ລາວ (1977-2022).

ນີ້ແມ່ນການພົບປະລະຫວ່າງຜູ້ຕາງໜ້າຂະແໜງອຸດສາຫະກໍາ ແລະການຄ້າສອງ ປະເທດ ພັດວ່າໄດ້ຈັດຕັ້ງຢູູ່ແຂວງກວາງນິງ ເຂດດິນແດນບໍ່ແຮ່, ເໝືອນເປັນການເຕືອນຄວາມຊົງຈຳກ່ຽວກັບໄລຍະທາງປະຫວັດສາດທີ່ຄ້າຍຄືກັນຂອງສອງປະເທດ.

ສະຫາຍ ຫງວຽນຮົ່ງຢຽນ ລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ກ່າວຄໍາເຫັນທີ່ກອງປະຊຸມຮ່ວມມື, ພັດທະນາຂະແໜງອຸດສາຫະກໍາ ແລະການຄ້າ, ພະລັງງານ ແລະບໍ່ແຮ່ຫວຽດນາມ-ລາວ 2022. ພາບ: congthuong.vn

ໃນການພົບປະ, ການນໍາສາມກະຊວງລ້ວນແຕ່ເວົ້າເຖິງຄວາມຊົງຈໍາ, ບັນດາຄໍາຊີ້ນໍາທີ່ເປັນປະຫວັດສາດ. ໃນພິທີສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ (5-9-1962/5-9-2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມືຫວຽດນາມ-ລາວ (18-7-1977/18-7-2022), ການນໍາສອງປະເທດຫວຽດນາມ-ລາວ ໄດ້ຢ້ຳຄືນສານກ່ຽວກັບການພົວພັນແບບພິເສດຫວຽດນາມ-ລາວ ທີ່ການນໍາຜູ້ຍິ່ງໃຫຍ່ ນັ້ນແມ່ນປະທານໂຮ່ຈີມິນ, ປະທານ ໄກສອນ ພົມວິຫານ ແລະປະທານ ສຸພານຸວົງ ເປັນຜູ້ກໍ່ຕັ້ງ; ໄດ້ເພີ່ມພູນຄູນສ້າງ, ຮັກສາ, ດ້ວຍຢາດເຫື່ອ, ກຳລັງແຮງ ແລະເລືອດເນື້ອຂອງທະຫານ ແລະປະຊາຊົນລຸ້ນຕ່າງໆຂອງສອງປະເທດ; ກາຍເປັນຊັບສົມບັດອັນລໍ້າຄ່າ, ສາຍພົວພັນ “ມີໜຶ່ງບໍ່ມີສອງ” ໃນປະຫວັດສາດໂລກ.

ແລະມາຮອດທຸກວັນນີ້, ເພື່ອເສີມຂະຫຍາຍການພົວພັນອັນດີງາມນັ້ນໃຫ້ຂຶ້ນສູ່ລະດັບສູງໃໝ່, ມີຫຼາຍວຽກຕ້ອງໄດ້ເຮັດ, ໃນນັ້ນແມ່ນດ້ານເສດຖະກິດຕ້ອງນໍາໜ້າໄປກ່ອນ. ເດືອນ ເມສາ 2022, ເມື່ອໄປຕ້ອນຮັບສະຫາຍ ພັນຄໍາ ວິພາວັນ, ນາຍົກລັດຖະມົນຕີແຫ່ງ ສປປ ລາວ ນໍາສະຫາຍລັດຖະມົນຕີ ຫງວຽນຮ່ົງຢຽນ, ສະຫາຍ ນາຍົກລັດຖະມົນຕີລາວ ໄດ້ຕີລາຄາສູງຕໍ່ຄວາມສາມາດບົ່ມຊ້ອນການຮ່ວມມືດ້ານການຄ້າ ແລະອຸດສາຫະກໍາລະຫວ່າງສອງປະເທດ.

ສະຫາຍປາດຖະໜາຢາກໃຫ້ຂະແໜງອຸດສາຫະກໍາ ແລະການຄ້າສອງປະເທດຕ້ອງມີການປຶກສາຫາລືນໍາກັນຢ່າງລະອຽດ, ມີ “ບັນຊີລາຍຊື່” ບັນດາສິນຄ້າທີ່ສອງຝ່າຍຕ້ອງການເພື່ອຊຸກຍູ້ກະແສ່ສິນຄ້າ ແລະວົງເງິນການຄ້າສອງສົ້ນຈະເພີ່ມຂຶ້ນຢ່າງບໍ່ຢຸດຢັ້ງ, ຍິ່ງໄປກວ່ານັ້ນແມ່ນໃຫ້ທົບ 10 ເທົ່ອຄືໃນປະຈຸບັນ. ກ່ຽວກັບບັນຫາພະລັງງານສອງຝ່າຍກໍ່ຕ້ອງຮ່ວມມືໃຫ້ມີປະສິດທິຜົນ.

ພາຍຫຼັງ 8 ເດືອນ, ປະຈຸບັນ, ໃນການພົບປະທີ່ອົບອຸ່ນລະຫວ່າງສະຫາຍ ຫງວຽນຮົ່ງຢຽນ ລັດຖະມົນຕີ ກະຊວງອຸດສາຫະກໍາ ແລະການຄ້າຫວຽດນາມ ແລະສະຫາຍ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະການຄ້າລາວ ກັບສະຫາຍ ດາວວົງ ພອນແກ້ວ ລັດຖະມົນຕີກະຊວງ ພະລັງງານ ແລະບໍ່ແຮ່ລາວ, ລັດຖະມົນຕີສາມສະຫາຍອາດຈະລາຍງານຕໍ່ການນໍາສອງປະເທດກ່ຽວກັບບັນດາໝາກຜົນທີ່ເປັນໜ້າສົ່ງເສີມ. ໃນວັນທີ່ຄະນະຜູ້ແທນເຂົ້າຢ້ຽມຂໍ່ານັບສະຫາຍນາຍົກລັດຖະມົນຕີ ຟ້າມມິງຈິ໊ງ, ນາຍົກລັດຖະມົນຕີໄດ້ຮັບຮູ້ບັນດາຕົວເລກ, ຄື: ເປົ້າໝາຍສູ້ຊົນຍົກວົງເງິນການຄ້າໃຫ້ເພີ່ມຂຶ້ນແຕ່ 10-15%ຕໍ່ປີໄດ້ຮັບການຮັກສາມາແຕ່ປີ 2012 ຈົນມາຮອດປະຈຸບັນ, ຮັກສາລະດັບວົງເງິນການຄ້າສູງກວ່າ 1 ຕື້ໂດລາສະຫະລັດ ມາແຕ່ປີ 2016. ປີ 2022, ວົງເງິນການຄ້າສອງຝ່າຍຫວຽດນາມ-ລາວ ຄາດວ່າຈະບັນລຸ 1,66 ຕື້ໂດລາສະຫະລັດ, ເພີ່ມຂຶ້ນ 21,3% ເມື່ອທຽບໃສ່ປີ 2021.

ສະຫາຍ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະບໍ່ແຮ່ລາວ. ພາບ: congthuong.vn

ສະຫາຍ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະບໍ່ແຮ່ລາວ ໃຫ້ຮູ້ວ່າ, ຕອນເຊົ້າວັນທີ 24 ທັນວາ, ກ່ອນທີ່ດໍາເນີນກອງປະຊຸມ, ສະຫາຍ ນາຍົກລັດຖະມົນຕີ ໄດ້ໂທຫາສະຫາຍລັດຖະມົນຕີ ຫງວຽນຮ່ົງຢຽນ ເພື່ອຖາມລະອຽດກ່ຽວກັບຄວາມສາມາດບົ່ມຊ້ອນໃນການຮ່ວມມືດ້ານພະລັງງານ ແລະແຮ່ທາດຂອງຫວຽດນາມ ແລະລາວ. ລັດຖະມົນຕີ ຫງວຽນຮົ່ງຢຽນ ຢັ້ງຢືນວ່າ ການຮ່ວມມືໃນຂົງເຂດດັ່ງກ່າວຍັງມີຄວາມສາມາດບົ່ມຊ້ອນໃຫຍ່ຫຼວງຢູ່. ສິ່ງດັ່ງກ່າວນີ້ຍິ່ງເປັນການຢັ້ງຢືນເຖິງຄວາມເອົາໃຈໃສ່ຢ່າງເລິກເຊິ່ງຂອງການນໍາພັກ, ລັດ, ລັດຖະບານຫວຽດນາມ ທີ່ມີຕໍ່ການພົວພັນແບບພິເສດ, ຮອບດ້ານລະຫວ່າງຫວຽດນາມ ແລະລາວ.

ເຖິງຢ່າງໃດກໍ່ຕາມ, ເພື່ອໃຫ້ຄວາມສາມາດບົ່ມຊ້ອນການຮ່ວມມືນີ້ນໍາສອງປະເທດພັດທະນາ, ສະຫາຍ ລັດຖະມົນຕີ ຫງວຽນຮົ່ງຢຽນ ຍັງມີຄວາມກັງວົນວ່າ: ໃນປີ 2022, ຫວຽດນາມ ສືບຕໍ່ບັນລຸຕົວເລກປະທັບໃຈກ່ຽວກັບວົງເງິນສົ່ງອອກດ້ວຍມູນຄ່າກວ່າ 700 ຕື້ໂດລາສະຫະລັດ. ກັບອ້າຍນ້ອງຄີງ, ເພື່ອນມິດສະຫາຍທີ່ຮັກແພງ, ສັດຊື່ບໍລິສຸດຕົວເລກ 1,66 ຕື້ໂດລາສະຫະລັດໃນປີ 2022 ແມ່ນຍັງໜ້ອຍຢູ່. ຍ້ອນເຫດນັ້ນ, ສະຫາຍລັດຖະມົນຕີ ຫງວຽນຮົ່ງຢຽນ ຖືວ່າ, ປະຈຸບັນແມ່ນເວລາທີ່ພວກເຮົາຕ້ອງພ້ອມກັນຄົ້ນຄວ້າກົນໄກນະໂຍບາຍ ແລະກະທໍາສ້າງເງື່ອນໄຂສະດວກ, ອີງໃສ່ຄວາມສາມາດບົ່ມຊ້ອນທີ່ເປັນທ່າແຮງຂອງສອງປະເທດເພື່ອໃຫ້ວິສາຫະກິດສອງປະເທດແຊກຊຶມເຂົ້າຕະຫຼາດໃຫ້ເລິກເຊິ່ງກວ່າອີກ. ສະຫາຍ ລັດຖະມົນຕີ ຫງວຽນຮົ່ງຢຽນ ສະເໜີໃຫ້ຝ່າຍລາວ ເປີດປະຕູໃຫ້ກວ້າງກວ່າອີກເພື່ອໃຫ້ວິສາຫະກິດຫວຽດນາມ ມີເງື່ອນໄຂສຳພັດ, ແຊກແຊງເຂົ້າຕະຫຼາດ. ບັນດາວິສາຫະກິດຫວຽດນາມ ໄປລົງທຶນຢູ່ລາວ ບໍ່ແມ່ນເພື່ອເປົ້າໝາຍນຳມາເຊິ່ງກຳໄລເທົ່ານັ້ນ ແຕ່ດ້ວຍເປົ້າໝາຍສູງສຸດແມ່ນເຮັດໃຫ້ສອງປະເທດຫວຽດນາມ-ລາວ ອ້າຍນ້ອງຮັ່ງມີຂຶ້ນຕື່ມ.

ສະຫາຍ ຫງວຽນຮ່ົງຢຽນ ລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ກັບສະຫາຍ ມະໄລທອງ ກົມມະສິດ  ລັດຖະມົນຕີກະຊວງອຸດສາຫະກໍາ ແລະການຄ້າລາວ (ເບື້ອງຂວາ). ພາບ: congthuong.vn

ເວທີປາໄສຮ່ວມມືຢູ່ເຂດດິນແດນບໍ່ແຮ່

ຕອນບ່າຍວັນທີ 24 ທັນວາ, ທີ່ແຂວງກວາງນິງ, ພະນັກງານຂະແໜງອຸດສາຫະກໍາ ແລະການຄ້າ, ພະລັງງານ ແລະບໍ່ແຮ່ຂອງສອງປະເທດຫຼາຍຮ້ອຍຄົນໄດ້ເຂົ້າຮ່ວມກອງປະຊຸມຮ່ວມມື, ພັດທະນາຂະແໜງອຸດສາຫະກໍາ ແລະການຄ້າ, ພະລັງງານ ແລະບໍ່ແຮ່ຫວຽດນາມ-ລາວ 2022.

ກ່າວຄໍາເຫັນໄຂກອງປະຊຸມ, ສະຫາຍ ລັດຖະມົນຕີ ຫງວຽນຮ່ົງຢຽນ ເນັ້ນໜັກເຖິງຜົນງານໃນຂົງເຂດພະລັງງານຕື່ມອີກ, ໜຶ່ງໃນບັນດາໝາກຜົນຮ່ວມມືທີ່ພົ້ນເດັ່ນນັ້ນແມ່ນສອງຝ່າຍໄດ້ເຊັນ ແລະຜັນຂະຫຍາຍບົດບັນທຶກຊ່ວຍຈໍາລະຫວ່າງລັດຖະບານຫວຽດນາມ ແລະລັດຖະບານລາວ ກ່ຽວກັບການຮ່ວມມືພັດທະນາບັນດາໂຄງການເຂື່ອນໄຟຟ້ານໍ້າຕົກຢູ່ລາວ, ຕິດຕັ້ງລະບົບໄຟຟ້າ ແລະຊື້ຂາຍໄຟຟ້າລະຫວ່າງສອງປະເທດຢ່າງມີປະສິດທິຜົນ. ຕາມນັ້ນແລ້ວ, ເລື່ອງຊຸກຍູ້ການນໍາເຂົ້າໄຟຟ້າຈາກລາວ ເຂົ້າມາຫວຽດນາມ ໄດ້ດໍາເນີນຢ່າງຮີບດ່ວນ, ລື່ນກາຍຄວາມຄືບໜ້າທີ່ວາງອອກ (ມາຮອດປະຈຸບັນ, ລັດຖະບານຫວຽດນາມ ອະນຸມັດຜ່ານແຜນນະໂຍບາຍນໍາເຂົ້າໄຟຟ້າຈາກລາວ ບັນລຸປະມານ 90% ສະມັດຕະພາບຄໍາໝັ້ນສັນຍາຮອດປີ 2025). ແຫຼ່ງໄຟຟ້ານີ້ໃນຊຸມປີຜ່ານມາໄດ້ປະກອບສ່ວນສໍາຄັນເຂົ້າໃນວຽກງານຮັບປະກັນແຫຼ່ງສະໜອງໄຟຟ້າໃຫ້ແກ່ການພັດທະນາເສດຖະກິດ-ສັງຄົມຂອງຫວຽດນາມ. ຄຽງຂ້າງກັນນັ້ນ, ລາວໄດ້ດຶງດູດຫຼາຍວິສາຫະກິດຫວຽດນາມ ເຂົ້າຮ່ວມການລົງທຶນໃນຂົງເຂດເຂື່ອນໄຟຟ້ານໍ້າຕົກ ແລະແຮ່ທາດ. ຍ້ອນເຫດນັ້ນ, ຍາມໃດລາວ ກໍ່ແມ່ນປະເທດນໍາໜ້າໃນບັນດາປະເທດ, ເຂດແຄວ້ນເຊິ່ງຫວຽດນາມ ມີການລົງທຶນອອກຕ່າງປະເທດ.

ລັດຖະມົນຕີກະຊວງອຸດສາຫະກໍາ ແລະການຄ້າຫວຽດນາມ ປະດັບຫຼຽນໄຊມິດຕະພາບໃຫ້ພະນັກງານປະເທດລາວ. ພາບ: congthuong.vn

ກ່າວຄໍາເຫັນທີ່ກອງປະຊຸມ, ສະຫາຍ ລັດຖະມົນຕີ ດາວວົງ ພອນແກ້ວ ໃຫ້ຮູ້ວ່າ: ປະຈຸບັນ ລັດຖະບານສອງປະເທດໄດ້ເຫັນດີເປັນເອກະພາບຕໍ່ແຜນການຮ່ວມມືແລກປ່ຽນການຊື້ຂາຍໄຟຟ້າດ້ວຍເປົ້າໝາຍໄລຍະ 2021-2025 ແມ່ນ 3000 MW ແລະຮອດປີ 2030 ຕ້ອງໃຫ້ບັນລຸ 5.000 MW. ປະຈຸບັນ ລາວມີ 25 ໂຄງການທີ່ມີສັນຍາຊື້ຂາຍໄຟຟ້າກັບກຸ່ມບໍລິສັດໄຟຟ້າຫວຽດນາມ ດ້ວຍກຳລັງຕິດຕັ້ງປະມານ 2,180 MW, ໃນນັ້ນມີ 2 ໂຄງການໄດ້ຜະລິດໄຟຟ້າຂາຍດ້ວຍກໍາລັງຕິດຕັ້ງແມ່ນ 572 MW ແລະບັນດາໂຄງການຍັງເຫຼືອກໍາລັງຢູ່ໃນໄລຍະກໍ່ສ້າງດ້ວຍຍອດກໍາລັງຕິດຕັ້ງແມ່ນ 1,608 MW.

ກ່ຽວກັບຂົງເຂດບໍ່ແຮ່ ແລະແຮ່ທາດ, ສະຫາຍ ລັດຖະມົນຕີ ດາວວົງ ພອນແກ້ວ ໃຫ້ຮູ້ວ່າ: ໃນໄລຍະຜ່ານມາ, ມີ 10 ບໍລິສັດຂອງຫວຽດນາມ ດໍາເນີນການສໍາຫຼວດທໍລະນີສາດ. ນອກຈາກນັ້ນ ຍັງມີ 18 ບໍລິສັດພວມຂຸດຄົ້ນ, ປຸງແຕ່ແຮ່ທາດ. ໃນຂະນະນັ້ນ, ສະຫາຍ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະການຄ້າລາວ ກໍ່ສະແດງຄວາມຂອບອົກຂອບໃຈມາຍັງພັກ, ລັດ ແລະປະຊາຊົນຫວຽດນາມ ຍາມໃດກໍ່ສະໜັບສະໜູນ, ຄຽງບ່າຄຽງໄຫຼ່ພ້ອມກັບພັກ, ລັດ ແລະປະຊາຊົນລາວ ບັນດາເຜົ່າ, ສະແດງໃຫ້ເຫັນອາລົມຈິດຄວາມຮັກແພງແບບພິເສດ ແລະການຊ່ວຍເຫຼືອອັນລ້ຳຄ່າຂອງພັກ, ລັດ ແລະປະຊາຊົນຫວຽດນາມ ທີ່ມີຕໍ່ລາວ.

ສະຫາຍ ຮອງລັດຖະມົນຕີ ເຈິ່ນກ໊ວກແຄ໊ງ ປະດັບຫຼຽນໄຊມິດຕະພາບໃຫ້ພະນັກງານຂອງລາວ. ພາບ: congthuong.vn

ລັດຖະມົນຕີໃຫ້ຂໍ້ສັງເກດວ່າໃນໄລຍະຜ່ານມາ, ວົງເງິນການຄ້າລະຫວ່າງສອງປະເທດໄດ້ຮັບການເຕີບໂຕຢ່າງຕັ້ງໜ້າ ແຕ່ຍັງບໍ່ສົມກັບຄວາມສາມາດບົ່ມຊ້ອນ ແລະການພົວພັນດ້ານການເມືອງລະຫວ່າງສອງຝ່າຍ; ສະຫາຍ ຢັ້ງຢືນວ່າ ກະຊວງອຸດສາຫະກໍາ ແລະການຄ້າລາວ ຈະເພີ່ມທະວີການຮ່ວມມືກັບຝ່າຍຫວຽດນາມ ເພື່ອຕັ້ງໜ້າຜັນຂະຫຍາຍບັນດາການກໍານົດທິດ, ຊຸກຍູ້ການພົວພັນຢ່າງແຮງກວ່າ, ໂດຍສະເພາະແມ່ນການຄ້າຂ້າມຊາຍແດນ, ແລກປ່ຽນສິນຄ້າປະເພດຕ່າງໆເຊິ່ງສອງຝ່າຍມີທ່າແຮງ ແລະມີຄວາມຕ້ອງການ, ໃນນັ້ນ ມີຂົງເຂດພະລັງງານ ແລະບໍ່ແຮ່.

ຊ່ວຍເພື່ອນກໍ່ແມ່ນຊ່ວຍຕົນເອງ

ຕອນບ່າຍວັນດຽວກັນ, ພາຍຫຼັງກອງປະຊຸມຄົບຄະນະຢ່າງເປັນທາງການ, ສອງຝ່າຍໄດ້ມີການແລກປ່ຽນກ່ຽວກັບຜົນການຮ່ວມມືສອງຝ່າຍໃນຂົງເຂດອຸດສາຫະກໍາ-ການຄ້າ ແລະພະລັງງານສອງປະເທດ, ໃນນັ້ນ ສຸມໃສ່ບັນຫາຄຸ້ມຄອງສິນຄ້າ, ສ້າງຂໍ້ມູນສະຖິຕິ, ສ່ົງອອກສິນຄ້າ, ສະໜອງນໍ້າມັນ, ພັດທະນາພະລັງງານ. ມີເຖິງສອງກອງປະຊຸມສໍາມະນາໂດຍບັນດາກົມຂອງສາມກະຊວງຜັນຂະຫຍາຍກ່ຽວກັບມາດຕະການຮ່ວມມືພັດທະນາກ່ຽວກັບອຸດສາຫະກໍາ ແລະການຄ້າ, ກ່ຽວກັບບໍ່ແຮ່ ແລະພະລັງງານ.

ສອງກອງປະຊຸມສໍາມະນາໄດ້ດໍາເນີນໄປຢ່າງຄຶກຄື້ນ, ຈິງໃຈຈົນເຮັດໃຫ້ທຸກຄົນລືມໂມງເວລາ. ນັບທັງລັດຖະມົນຕີ ຫງວຽນຮົ່ງຢຽນ ບອກໃຫ້ປ່ຽນໄປສູ່ລາຍການອື່ນ, ແຕ່ທຸກຄົນຍັງມົວເມົາປຶກສາຫາລືຈົນຊ້າກວ່າເວລາທີ່ຄາດຄະເນ. ນອກຈາກເລື່ອງເຂື່ອນໄຟຟ້ານໍ້າຕົກ, ເລື່ອງຂຸດຄົ້ນແຮ່ທາດ, ເລື່ອງພັດທະນາເສັ້ນທາງຊື້ຂາຍໄຟຟ້າມາຫວຽດນາມ ແລ້ວນັ້ນ ຝ່າຍເພື່ອນລາວ ຍັງມີຄວາມສົນໃຈເຖິງບົດຮຽນ, ວິທີເຮັດຂອງຫວຽດນາມ ເພື່ອຜ່ານຜ່າໄລຍະສັບສົນທາງດ້ານພະລັງງານ, ການຂາດເຂີນນໍ້າມັນຍ້ອນຜົນກະທົບທາງດ້ານພູມສາດການເມືອງທົ່ວໂລກ ເຊິ່ງປະເທດເພື່ອນພວມປະສົບກັບຄວາມຫຍຸ້ງຍາກ, ໄດ້ ແລະຈະຕ້ອງໄດ້ຮັບການການຊ່ວຍເຫຼືອຈາກຫວຽດນາມ ຫຼາຍກວ່າອີກ. ເຂົາເຈົ້າກໍ່ຢາກ “ຖາມ” ຫຼາຍບັນຫາກ່ຽວກັບການເຮັດໃຫ້ລາຄາເປັນປົກກະຕິ, ຄຸ້ມຄອງຕະຫຼາດ, ພັດທະນາຕະຫຼາດພາຍໃນ ແລະກວ້າງກວ່າແມ່ນເຮັດແນວໃດເພື່ອໃຫ້ຫວຽດນາມ ບືນຕົວຂຶ້ນໃນຄວາມຫຍຸ້ງຍາກຂັດສົນໃຫ້ໄດ້ຢູ່ໃນທອັບແຖວໜ້າພາກພື້ນກ່ຽວກັບການພັດທະນາ, ຟື້ນຟູເສດຖະກິດ?  ເຮັດແນວໃດເພື່ອໃຫ້ການສົ່ງອອກຍາມໃດກໍ່ໄດ້ຢູ່ໃນທອັບແຖວໜ້າໂລກ, ອຸດສາຫະກໍາຍາມໃດກໍ່ແມ່ນກຳລັງໜູນນໍາໜ້າໃນການພັດທະນາ?

ລັດຖະມົນຕີກະຊວງພະລັງງານ ແລະບໍ່ແຮ່ລາວ ຕາງໜ້າພັກ, ລັດ, ລັດຖະບານລາວ ປະດັບຫຼຽນໄຊມິດຕະພາບ ໃຫ້ບັນດາພະນັກງານຂະແໜງອຸດສາຫະກໍາ ແລະການຄ້າຫວຽດນາມ. ພາບ: congthuong.vn

ລັດຖະມົນຕີກະຊວງພະລັງງານ ແລະບໍ່ແຮ່ລາວ ໄດ້ຕາງໜ້າພັກ, ລັດ, ລັດຖະບານລາວ ປະດັບຫຼຽນໄຊມິດຕະພາບ ໃຫ້ບັນດາພະນັກງານຂະແໜງອຸດສາຫະກໍາ ແລະການຄ້າຫວຽດນາມ ໃນທ່າມກາງກອງປະຊຸມສໍາມະນາພວມດໍາເນີນໄປຢ່າງຄຶກຄື້ນນັ້ນ ການນໍາສາມກະຊວງຂອງສອງປະເທດ ແລະການນໍາແຂວງກວາງນິງ ກໍ່ມີການເຮັດວຽກຢ່າງແທດຈິງທີ່ສຸດ. ກວາງນິງ-ເຂດດິນແດນບໍ່ພຽງແຕ່ມີຊື່ສຽງເປັນເຂດດິນແດນບໍ່ແຮ່, ເປັນເຂດອູ່ຂອງບັນດາຂະແໜງອຸດສາຫະກໍາແຮ່ທາດຂອງຫວຽດນາມ ເທົ່ານັ້ນ ແຕ່ໃນຊຸມປີຜ່ານມາເຂດດິນແດນດັ່ງກ່າວຍັງໄດ້ເປັນແບບຢ່າງຂອງການພັດທະນາ ແລະການຫັນປ່ຽນຕາມຮູບແບບ “ເສດຖະກິດສີຂຽວ” ອີກດ້ວຍ. ທີ່ກອງປະຊຸມໃຫຍ່ ຄັ້ງທີ XIII ຂອງພັກ, ສະຫາຍ ຫງວຽນຊວນກີ໊ ເລຂາພັກແຂວງກວາງນິງ ເຄີຍແບ່ງປັນບົດຮຽນລໍ້າຄ່າຫຼາຍຢ່າງເພື່ອພັດທະນາໄວ ແລະຍືນຍົງ. ຫຼາຍແນວຄວາມຄິດນັ້ນ ວັນນີ້ໄດ້ສະຫາຍເລຂາພັກແຂວງ ກ່າວໃນບົດປະກອບຄໍາເຫັນເຮັດໃຫ້ການນໍາສາມກະຊວງຂອງຂະແໜງອຸດສາຫະກໍາ ແລະການຄ້າສອງປະເທດມີຄວາມສົນໃຈຫຼາຍ .

ສະຫາຍ ຫງວຽນຊວນກີ໊ ໃຫ້ຮູ້ວ່າ, ການຮ່ວມມືລະຫວ່າງແຂວງກວາງນິງ ກັບສາມແຂວງພາກເໜືອລາວ: ຫົວພັນ, ຫຼວງພະບາງ, ໄຊຍະບູລີ ໃນຫຼາຍຂົງເຂດຄືການສຶກສາ-ກໍ່ສ້າງ, ການທ່ອງທ່ຽວ, ການຄ້າຜ່ານມາມີການພັດທະນາເປັນຢ່າງດີ ແລະສະຫາຍ ປາດຖະໜາວ່າໃນໄລຍະຈະມາເຖິງ, ການຮ່ວມມືລະຫວ່າງແຂວງກວາງນິງ ກັບບັນດາແຂວງຂອງລາວ ຈະສືບຕໍ່ມີຫຼາຍບາດກ້າວພັດທະນາໃໝ່.

ລັດຖະມົນຕີກະຊວງອຸດສາຫະກໍໍາ ແລະການຄ້າ ມອບຂອງຂວັນທີ່ລະນຶກໃຫ້ການນໍາຝ່າຍລາວ ແລະແຂວງກວາງນິງ. ພາບ: congthuong.vn

ການພັດທະນາຂອງແຂວງກວາງນິງ ຜ່ານຄໍາເວົ້າຂອງສະຫາຍເລຂາພັກແຂວງ ເຮັດໃຫ້ຂ້າພະເຈົ້າຄິດເຖິງຮູບພາບເຮືອບິນນຳສົ່ງຄະນະປະຕິບັດງານລາວ ມີຮູບດອກຈໍາປາ ທີ່ລົງຈອດຢູ່ສະໜາມບິນເວິນໂດນ ໃນຕອນບ່າຍມື້ວານຄືດັ່ງພະຍານຫຼັກຖານທີ່ພິສູດໃຫ້ເຫັນຈິນຕະນາການບຸກທະລຸພັດທະນາ. ສື່ມວນຊົນເຄີຍຍົກເລື່ອງສະຫາຍນາຍົກລັດຖະມົນຕີຫວຽດນາມ ຟ້າມມິງຈິ໊ງ ເມື່ອດໍາລົງຕໍາແໜ່ງເປັນເລຂາພັກແຂວງກວາງນິງ ໄດ້ພ້ອມກັບການນໍາຂອງແຂວງປະຕິບັດຈິນຕະນາການບຸກທະລຸ, ຕີລາຄາຄຸນນະພາບກັບນັກຊ່ຽວຊານ ເສດຖະກິດແຖວໜ້າຂອງຕ່າງປະເທດຢ່າງມີວິທະຍາສາດເພື່ອເລືອກທິດເດີນທີ່ຖືກຕ້ອງ, ສອດຄ່ອງກັບທ້ອງຖິ່ນ, ຈາກນັ້ນແມ່ນສ້າງກໍາລັງໜູນນໍາພາຂະບວນການພັດທະນາ.

ມີອີກເລື່ອງໜຶ່ງທີ່ໜ້າຈັບໃຈມີຈຸດລວມທັງຢູ່ລາວ ແລະແຂວງກວາງນິງ. ນັກຄົ້ນຄວ້າ Paul Collier ເຄີຍເວົ້າວ່າ: “ຖ້າຫາກເຈົ້າມີທະເລ, ເຈົ້າຈົ່ງຮັບໃຊ້ໂລກ; ຖ້າຫາກເຈົ້າບໍ່ຕິດກັບທະເລ, ເຈົ້າຈົ່ງຮັບໃຊ້ປະເທດບ້ານໃກ້ເຮືອນຄຽງຂອງຕົນ”. ຫວຽດນາມ ໄດ້ສ້າງ “ນິທານແຫ່ງສະຕະວັດທີ XXI”, ມີໜຶ່ງບໍ່ມີສອງໃນໂລກເມື່ອຊ່ວຍລາວ ຈາກປະເທດທີ່ບໍ່ມີທາງອອກສູ່ທະເລໄດ້ກາຍເປັນປະເທດມີທະເລດ້ວຍໂຄງການເຊື່ອມຕໍ່ກັບທ່າກໍາປັ່ນ ຫວູງອ໊າງ ກັບລາວ. ປະຈຸບັນ ແຂວງກວາງນິງ ກໍ່ໄດ້ ແລະກໍາລັງຜັນຂະຫຍາຍມະຕິສົມທົບກັນລະຫວ່າງ 4 ແຂວງກວາງນິງ, ຫາຍຟ່ອງ, ຫາຍເຢືອງ, ບັ໊ກຢາງ... ເພື່ອຊ່ວຍປະເທດເພື່ອນມິດທີ່ບໍ່ມີທາງອອກສູ່ທະເລສາມາດພັດທະນາເສດຖະກິດທາງທະເລ. ສັດຈະທຳ “ຊ່ວຍເພື່ອນແມ່ນຊ່ວຍຕົນເອງ” ເຊິ່ງປະທານໂຮ່ຈີມິນ ເຄີຍຕັກເຕືອນວັນນີ້ໄດ້ກາຍເປັນເລື່ອງລາວບໍ່ພຽງແຕ່ໃນການພົວພັນສາກົນ.

ການນໍາແຂວງກວາງນິງ ມອບຂອງຂວັນລະນຶກໃຫ້ລັດຖະມົນຕີ ກະຊວງອຸດສາຫະກໍາ ແລະການຄ້າລາວ. ພາບ: congthuong.vn

ການນໍາແຂວງກວາງນິງ ມອບຂອງຂວັນລະນຶກໃຫ້ລັດຖະມົນຕີກະຊວງພະລັງງານ ແລະບໍ່ແຮ່ລາວ. ພາບ: congthuong.vn

ຕອນຄໍ່າ, ໃນການພົບປະທີ່ເຕັມໄປດ້ວຍນໍ້າໃຈອ້າຍນ້ອງສັດຊື່, ຈິງໃຈ, ບົດເພງດອກຈໍາປາໄດ້ສະແດງໃຫ້ເຫັນວາດຊົງ, ທາດແທ້ຄຸນສົມບັດຂອງອ້າຍນ້ອງລາວ ດັງກ້ອງຂຶ້ນ. ຫວ່າງມໍ່ໆມານີ້, ສະຫາຍ ເລຂາທິການໃຫຍ່ ຫງວຽນຝູຈ້ອງ ໄດ້ຢ້ຳຄືນຄໍາເວົ້າຂອງປະທານ ສຸພານຸວົງທີ່ວ່າ: “ນ້ຳໃຈຫວຽດ-ລາວສູງກວ່າພູຜາ, ຍາວກວ່າແມ່ນໍ້າ, ກວ້າງກວ່າທະເລ, ໃສແຈ້ງກວ່າເດືອນເພັງ, ຫອມກວ່າດອກໄມ້ທີ່ຫອມກວ່າໝູ່ໝົດ”.

ການນໍາບັນດາກະຊວງ, ຂະແໜງການ, ທ້ອງຖິ່ນຂອງສອງປະເທດຖ່າຍຮູບລະນຶກສະແດງໃຫ້ເຫັນອາລົມຈິດມິດຕະພາບແບບພິເສດ, ຮອບດ້ານລະຫວ່າງຫວຽດນາມ ແລະລາວ “ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ”. ພາບ: congthuong.vn

ຄວາມມານະພະຍາຍາມຂອງຂະແໜງອຸດສາຫະກໍາ ແລະການຄ້າຂອງສອງປະເທດວັນນີ້ໄດ້ປະກອບສ່ວນເຮັດໃຫ້ນ້ຳໃຈເລິກເຊິ່ງສູງກວ່າພູຜາ, ຍາວກວ່າແມ່ນໍ້າ ນັ້ນ, ຄືດັ່ງ ດອກຈໍາປາ ໃນວັນນີ້ໄດ້ເບັ່ງບານຢູ່ເຂດດິນແດນບໍ່ແຮ່ຫວຽດນາມ ໃຫ້ຮຸ່ງເຮືອງເຫຼືອງເຫຼື້ອມຕື່ມອີກ. ຍ້ອນວ່ານັ້ນແມ່ນດອກໄມ້ທີ່ເຊື່ອມສາຍສຳພັນຂອງຜູ້ຄົນທີ່ກໍາລັງຢູ່ແຖວໜ້າຂອງຂະແໜງເສດຖະກິດຂອງສອງປະເທດ, ເພີ່ມພູນຄູນສ້າງໃຫ້ດອກໄມ້ປະເພດນີ້ ມີຄວາມສົດໃສ, ສວຍງາມ, ຫອມຫວນຕື່ມອີກ.

ໂດຍ: ດັ້ງເກື່ອງ