ພ້ອມກັບການພັດທະນານັບມື້ນັບເຂົ້າສູ່ລວງເລິກໃນການພົວພັນລະຫວ່າງສອງປະເທດ, ການພົວພັນລະຫວ່າງສອງແຂວງແທັງຮ໊ວາ-ຫົວພັນ ກໍ່ມີຫຼາຍຂີດໝາຍພົ້ນເດັ່ນ. ໃນນັ້ນ, ການພົວພັນດ້ານການເມືອງໄດ້ເປັນແກ່ນສານຫຼັກແຫຼ່ງ, ສວມບົດບາດກຳນົດທິດສັງລວມໃນການພົວພັນລະຫວ່າງສອງທ້ອງຖິ່ນ.
ສາມາດຢັ້ງຢືນໄດ້ວ່າ ຫາຍາກທີ່ຈະມີການພົວພັນໃດໄດ້ສ້າງຂຶ້ນໃນໄລຍະສົງຄາມຄືກັບການພົວພັນລະຫວ່າງສອງແຂວງແທັງຮ໊ວາ-ຫົວພັນ. ຈາກນັ້ນ, ການພົວພັນໄດ້ຜ່ານຜ່າການທົດສອບຫຼາຍສິ່ງທ້າທາຍຮ້າຍແຮງທີ່ສຸດ, ການພົວພັນດັ່ງກ່າວໄດ້ກາຍເປັນຄວາມໄວ້ເນື້ອເຊື່ອໃຈ, ບໍລິສຸດຜຸດຜ່ອງ ແລະເຕັມໄປດ້ວຍໄມຕີຈິດມິດຕະພາບ. ເມື່ອຫວນຄືນປະຫວັດສາດໃນຊຸມປີ 1946-1949, ຮັບຮູ້ກ່ຽວກັບທີ່ຕັ້ງຍຸດທະສາດຂອງເຂດຊາຍແດນ, ຄະນະພັກແຂວງແທັງຮ໊ວາ ໄດ້ນຳພາບັນດາກຳລັງປະກອບອາວຸດສົມທົບກັບທະຫານຫຼວງ ແລະຄະນະປະຕິບັດງານກຳລັງປະກອບອາວຸດທາງທິດຕາເວັນຕົກ, ເປີດບັ້ນຮົບເລເລີ້ຍ, ເພື່ອປົດປ່ອຍ, ເປີດຊ່ອງທາງຊາຍແດນຫວຽດນາມ-ລາວ ແລະກໍ່ສ້າງແລວທາງຍຸດທະສາດເຊື່ອມຕໍ່ແນວຫຼັງ ແທັງຮ໊ວາ ກັບຖານທີ່ໝັ້ນຫວຽດບັ໊ກ. ໃນບັ້ນຮົບນີ້, ແທັງຮ໊ວາ ໄດ້ສົມທົບກັນຢ່າງແໜ້ນ ແຟ້ນກັບທະຫານປະເທດລາວ ບຸກໂຈມຕີປົດປ່ອຍບັນດາເມືອງຊຳໃຕ້, ຊຽງຄໍ້ ແລະສ້າງເງື່ອນໄຂ ເພື່ອໃຫ້ເພື່ອນກໍ່ສ້າງຖານທີ່ໝັ້ນປະຕິວັດພາກເໜືອລາວ. ພິເສດ, ແທັງຮ໊ວາ ກໍ່ເປັນກຽດກາຍເປັນຖານທີ່ໝັ້ນໂດຍກົງຂອງການປະຕິວັດລາວ, ເມື່ອລັດຖະບານຕໍ່ຕ້ານລາວ ປ່ຽນບ່ອນເຮັດວຽກຈາກຕວຽນກວາງ ໄປຢູ່ ແທັງຮ໊ວາ (ປີ 1950). ດ້ວຍນ້ຳໃຈສະຫາຍສະໜິດຕິດພັນ, ອົງຄະນະພັກ ແລະປະຊາຊົນບັນດາເຜົ່າແທັງຮ໊ວາ ໄດ້ຊ່ວຍເຫຼືອຢ່າງສຸດຈິດສຸດໃຈ, ປົກປັກຮັກສາ ແລະຮັບປະກັນບັນດາເງື່ອນໄຂຈຳເປັນເພື່ອໃຫ້ລັດຖະ ບານຕໍ່ຕ້ານລາວ ເຄື່ອນໄຫວໃນໄລຍະຢູ່ແທັງຮ໊ວາ.
|
|
ພິທີເຊັນຂໍ້ຕົກລົງຮ່ວມມືລະຫວ່າງແຂວງແທັງຮ໊ວາ ແລະແຂວງຫົວພັນ ປີ 2022. ພາບ: ຟອງຊັ໊ກ. |
ເມື່ອບັ້ນຮົບດ້ຽນບຽນຝູ ສິ້ນສຸດລົງດ້ວຍໄຊຊະນະ, ພ້ອມກັບທົ່ວປະເທດ, ອົງຄະນະພັກ ແລະປະຊາຊົນແທັງຮ໊ວາ ໄດ້ສຸມໃສ່ແກ້ໄຂຜົນຮ້າຍຢ້ອນຫຼັງຈາກສົງຄາມ, ຟື້ນຟູການຜະລິດ ແລະສ້າງຊີວິດການເປັນຢູ່ຂອງປະຊາຊົນໃຫ້ເປັນປົກກະຕິ. ເດືອນຕຸລາ 1955, ແທັງຮ໊ວາ ເລີ່ມລົງມືກໍ່ສ້າງເສັ້ນທາງຫຼວງ 217; ຈົນຮອດປີ 1961 ໄດ້ຊ່ວຍເພື່ອນກໍ່ສ້າງເສັ້ນທາງ 217B, ເຊື່ອມຕໍ່ເສັ້ນທາງ 217 ຈາກນາແມວ (ແທັງຮ໊ວາ) ໄປຮອດຊໍາເໜືອ ແລະເຊື່ອມຕໍ່ເຂດທົ່ງພຽງ, ເຂດພູດອຍຂອງແຂວງແທັງຮ໊ວາ ກັບແຂວງຫົວພັນ. ກໍ່ໃນໄລຍະນີ້, ອົງຄະນະພັກ ແລະປະຊາຊົນແຂວງແທັງຮ໊ວາ ໄດ້ກໍ່ສ້າງໂຮງຮຽນຢູ່ເມືອງເກີ໊ມທຸຍ ເພື່ອຕ້ອນຮັບພະນັກງານຍິງ 200 ຄົນ ແລະເຍົາວະຊົນ 200 ຄົນຂອງປະເທດເພື່ອລາວ ຈາກເຂດເຕົ້າໂຮມຊຳເໜືອ-ຜົ້ງສາລີ ມາຮ່ໍາຮຽນ.
ສາມາດເວົ້າວ່າ ໃນການຕໍ່ສູ້ທີ່ຍືດເຍື້ອຍາວນານຕ້ານພວກລ່າເມືອງຂຶ້ນຝລັ່ງ ແລະຈັກກະພັດອາເມລິກາ ຮຸກຮານ, ອົງຄະນະພັກ ແລະປະຊາຊົນແຂວງແທັງຮ໊ວາ ໄດ້ລະດົມກຳລັງຄົນ, ກຳລັງຊັບ, ປະກອບສ່ວນເສີມກຳລັງໃຫ້ບັນດາສະໜາມຮົບ. ພິເສດ, ພະນັກງານ, ນັກຮົບຫຼາຍໝື່ນຄົນຂອງແຂວງແທັງຮ໊ວາ ໄດ້ສະໝັກໄປສູ້ຮົບ, ຮັບໃຊ້ການສູ້ຮົບຢູ່ປະເທດເພື່ອນ; ຫຼາຍພັນຄົນໄດ້ເສຍສະຫຼະຊີວິດ, ປະກອບເລືອດເນື້ອຂອງຕົນພ້ອມກັບປະເທດເພື່ອນນຳການສູ້ຮົບກ້າວໄປເຖິງໄຊຊະນະ.
ພ້ອມກັນນັ້ນ, ໃນຕະຫຼອດວິວັດການສູ້ຮົບ ແລະກໍ່ສ້າງບ້ານເກີດເມືອງນອນ, ສອງແຂວງແທັງຮ໊ວາ ແລະຫົວພັນ ໄດ້ເຮັດພາລະໜ້າທີ່ເປັນຂົວເຊື່ອມຕໍ່ມິດຕະພາບລະຫວ່າງສອງພັກ, ສອງລັດ ແລະປະຊາຊົນສອງປະເທດ, ປະກອບສ່ວນສຳຄັນເຂົ້າພາລະກິດສ້າງສາ ແລະປົກປັກຮັກສາປະເທດຂອງສອງຊາດ. ປະຕິບັດກິດຈະການປ່ຽນແປງໃໝ່ຂອງແຕ່ລະປະເທດ, ການພົວພັນຮ່ວມມືຮອບດ້ານການນຳສອງປະເທດ, ສອງແຂວງໄດ້ສືບຕໍ່ເສີມຂະຫຍາຍ. ບົນພື້ນຖານເນື້ອໃນຂອງສົນທິສັນຍາມິດຕະພາບ ແລະການຮ່ວມມື, ສອງແຂວງໄດ້ເຊັນບົດບັນທຶກວ່າດ້ວຍການຮ່ວມມືຫຼາຍສະບັບໃນຂົງເຂດເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ບຳລຸງສ້າງພະນັກງານ. ທຸກໆປີ, ສອງແຂວງໄດ້ຈັດຕັ້ງບັນດາຄະນະຜູ້ແທນຂັ້ນສູງເພື່ອຢ້ຽມຢາມກັນ, ເພື່ອເພີ່ມທະວີນ້ຳໃຈມິດຕະພາບກວ່າອີກ, ຕີລາຄາຄືນປະສິດທິຜົນຂອງບັນດາຂໍ້ຕົກລົງຮ່ວມມືທີ່ໄດ້ວາງອອກ, ພ້ອມທັງປັບປຸງເນື້ອໃນຮ່ວມມືໃໝ່ສຳລັບໃນໄລຍະຕໍ່ໄປ.
ກ້າວເຂົ້າສູ່ປີ 2022 - ປີທີ່ມີຄວາມໝາຍພິເສດທີ່ສຸດ, ເປັນຂີດໝາຍແຫ່ງບາດກ້າວສໍາຄັນໃນການພົວພັນຮ່ວມມືລະຫວ່າງສອງປະເທດ ຫວຽດນາມ-ລາວ ແລະສອງແຂວງ ແທັງຮ໊ວາ-ຫົວພັນ. ໂດຍເຈືອຈານເຂົ້າກັບບັນຍາກາດສະເຫຼີມສະຫຼອງບັນດາເຫດການໃຫຍ່, ຄື: 60ປີແຫ່ງວັນສ້າງຕັ້ງການພົວພັນທາງການທູດຫວຽດນາມ-ລາວ (5-9-1962 / 5-9-2022), 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມືຫວຽດນາມ-ລາວ (18-7-1977 / 18-7-2022), 55 ປີແຫ່ງວັນເຊັນບົດບັນທຶກວ່າດ້ວຍການຮ່ວມມືລະຫວ່າງສອງແຂວງແທັງຮ໊ວາ-ຫົວພັນ (4-1967 / 4-2022), ແຕ່ກາງເດືອນເມສາ 2022, ຄະນະຜູ້ແທນຂັ້ນສູງແຂວງແທັງຮ໊ວາ ນຳໂດຍສະຫາຍ ໂດມິງຕ໊ວນ, ຮອງເລຂາພັກແຂວງ, ປະທານຄະນະກຳມະການແຂວງ ໄດ້ໄປຢ້ຽມຢາມ, ເຮັດວຽກ ແລະອວຍພອນປີໃໝ່ລາວ ຢູ່ແຂວງຫົວພັນ, ປະເທດ ສປປ ລາວ. ໃນບັນຍາກາດທີ່ເຕັມໄປດ້ວຍນ້ຳໃຈໄມຕີຈິດມິດຕະພາບ, ຫຼາຍທິດທາງໃຫຍ່ໃນການພົວພັນລະຫວ່າງສອງທ້ອງຖິ່ນໃນໄລຍະຈະມາເຖິງການນຳສອງຝ່າຍໄດ້ປຶກສາຫາລື ແລະເຫັນດີເປັນເອກະພາບດ້ວຍບົດບັນທຶກການຮ່ວມມືທີ່ມີຄວາມໝາຍເລິກເຊິ່ງ, ປະກອບສ່ວນເພີ່ມພູນຄູນສ້າງໃຫ້ແກ່ການພົວພັນບໍລິສຸດຜຸດຜ່ອງ, ໃສແຈ້ງລະຫວ່າງສອງແຂວງແທັງຮ໊ວາ-ຫົວພັນ ໃຫ້ນັບມື້ນັບແໜ້ນແຟ້ນ, ນັບມ້ືນັບເຂົ້າສູ່ລວງເລິກ ແລະນຳມາເຊິ່ງໝາກຜົນແທດຈິງ, ຮອບດ້ານ.
ໃນນັ້ນ, ຈຸດສຸມແມ່ນການຮ່ວມມືດ້ານການເມືອງ, ການພົວພັນຕ່າງປະເທດ, ຄື: ສອງແຂວງສືບຕໍ່ຍູ້ແຮງວຽກງານໂຄສະນາ, ສຶກສາມູນເຊື້ອໃຫ້ພະນັກງານ, ສະມາຊິກພັກ, ປະຊາຊົນ, ໂດຍສະເພາະແມ່ນຄົນຮຸ່ນໜຸ່ມຂອງສອງຝ່າຍຮັບຮູ້ຢ່າງເລິກເຊິ່ງກ່ຽວກັບມູນເຊື້ອ ແລະເພີ່ມພູນຄູນສ້າງໃຫ້ການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດຫວຽດນາມ-ລາວ, ສອງແຂວງ ແທັງຮ໊ວາ-ຫົວພັນ ນັບມື້ນັບພັດທະນາ. ສືບຕໍ່ເສີມຂະຫຍາຍບົດບາດໃນການຮ່ວມມືແຮກສ່ຽວ ແລະໜູນຊ່ວຍ, ຊ່ວຍເຫຼືອປະຊາຊົນຢູ່ສອງຟາກຊາຍແດນພັດທະນາເສດຖະກິດ, ຫຼຸດຜ່ອນຄວາມທຸກຍາກແບບຍືນຍົງ, ສ້າງເຂດຊາຍແດນແທັງຮ໊ວາ-ຫົວພັນ ແຫ່ງສັນຕິພາບ, ສະຖຽນລະພາບ ແລະພັດທະນາ.
ອີງໃສ່ການພົວພັນທີ່ເປັນມູນເຊື້ອອັນດີງາມ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດຫວຽດນາມ-ລາວ ເວົ້າລວມ; ພ້ອມທັງອີງໃສ່ການພົວພັນທີ່ໄດ້ຮັບການຝຶກຝົນຫຼໍ່ຫຼອມຜ່ານສົງຄາມ ແລະໂດຍສະເພາະແມ່ນຜົນສຳເລັດຂອງການ ຮ່ວມມືຮອບດ້ານທີ່ບັນລຸໄດ້ໃນຕະຫຼອດ 5 ທົດສະວັດຜ່ານມາ, ພວກເຮົາຫວັງວ່າ ການພົວພັນບໍລິສຸດຜຸດຜ່ອງ, ໃສແຈ້ງລະຫວ່າງສອງແຂວງແທັງຮ໊ວາ-ຫົວພັນ ຈະມີອະນາຄົດພັດທະນາທີ່ສົດໃສ ແລະໝັ້ນໝາຍວ່າຈະບັນລຸໄດ້ຜົນງານອັນດີງາມຫຼາຍຢ່າງ.
ໂດຍ: ແສງເດືອນ