ການນຳຂັ້ນສູງພັກ, ລັດລາວ ຕ້ອນຮັບຄະນະຜູ້ແທນຂັ້ນສູງຄະນະໂຄສະນາສຶກສາສູນກາງພັກກອມມູນິດຫວຽດນາມ
ກປ.ອອນໄລ - ໃນຂອບເຂດການຢ້ຽມຢາມ ແລະເຮັດວຽກຢູ່ລາວ ຢ່າງເປັນທາງການ, ຕອນບ່າຍວັນທີ 25 ເມສາ, ຢູ່ນະຄອນຫຼວງວຽງຈັນ, ສະຫາຍ ຫງວຽນຈ້ອງເຫງ້ຍ, ເລຂາທິການສູນກາງພັກ, ຫົວໜ້າຄະນະໂຄສະນາສຶກສາສູນກາງພັກ ພ້ອມຄະນະ ໄດ້ຮັບການຕ້ອນຮັບຢ່າງອົບອຸ່ນ, ສະໜິດສະໜົມຈາກທ່ານ ທອງລຸນ ສີສຸລິດ, ເລຂາທິການໃຫຍ່, ປະທານປະເທດລາວ, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ, ພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ ຕາມລຳດັບ.
ທີ່ບັນດາການຕ້ອນຮັບ, ສະຫາຍ ຫງວຽນຈ້ອງເຫງ້ຍ ອວຍພອນບັນດາຜົນງານອັນໃຫຍ່ຫຼວງ, ຮອບດ້ານທີ່ມີຄວາມໝາຍປະຫວັດສາດ ເຊິ່ງ ລາວ ຍາດມາໄດ້ພາຍຫຼັງ 35 ປີແຫ່ງການປ່ຽນແປງໃໝ່ ແລະບັນດາໝາກຜົນສຳຄັນພາຍຫຼັງຜັນຂະຫຍາຍປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ເປັນເວລາກວ່າ 1 ປີ. ພ້ອມທັງຢັ້ງຢືນວ່າ ພັກ, ລັດ ແລະປະຊາຊົນຫວຽດນາມ ສະໜັບສະໜູນກິດຈະການປ່ຽນແປງໃໝ່ຮອບດ້ານຂອງລາວ.
ບັນດາສະຫາຍການນຳພັກ, ລັດ ລາວ ສະເໜີສອງປະເທດສືບຕໍ່ສົມທົບກັນຢ່າງແໜ້ນແຟ້ນ, ເພີ່ມທະວີການແລກປ່ຽນບັນດາບັນຫາທິດສະດີ ແລະພຶດຕິກຳຕົວຈິງຂອງການຮ່ວມມືກໍ່ສ້າງພະນັກງານ; ແບ່ງປັນຂໍ້ມູນຂ່າວສານ, ບົດຮຽນໃນວຽກງານກໍ່ສ້າງພັກ ປະກອບສ່ວນປະຕິບັດມະຕິກອງປະຊຸມໃຫຍ່ຂອງແຕ່ລະພັກ; ສົມທົບກັນຢ່າງແໜ້ນແຟ້ນໃນການຈັດຕັ້ງບັນດາການເຄື່ອນໄຫວແທດຈິງ, ມີຄວາມໝາຍດ້ວຍເນື້ອໃນເລິກເຊິ່ງ, ເໝາະສົມ ແລະມີກຳລັງແຜ່ຂະຫຍາຍເພື່ອສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ 2022.
|
|
ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ຕ້ອນຮັບສະຫາຍ ຫງວຽນຈ້ອງເຫງ້ຍ ຢູ່ສຳນັກງານສູນກາງພັກ ປະຊາຊົນ ປະຕິວັດ ລາວ, ໃນຕອນບ່າຍວັນທີ 25 ເມສາ. ພາບ: ຊວນເຊີນ. |
ບັນດາການນຳພັກ, ລັດລາວ ໃຫ້ຮູ້ວ່າ ຈະຊີ້ນຳບັນດາຄະນະ, ກະຊວງ, ຂະແໜງການທີ່ກ່ຽວຂ້ອງຂອງລາວ ເອົາໃຈໃສ່ເຖິງບັນດາປູຊະນີຍະສະຖານປະຫວັດສາດ, ສັນຍາລັກແຫ່ງການພົວພັນຂອງສອງປະເທດ, ຄື: ປູຊະນີຍະສະຖານສາຍພູຫຼວງຕາເວັນຕົກ, ທາງໂຮ່ຈິມິນ, ຖືນີ້ແມ່ນສັນຍາລັກ, ແມ່ນພະຍານຫຼັກຖານທີ່ມີຊີວິດຊີວາໃຫ້ແກ່ການພົວພັນສາມັກຄີຫວຽດນາມ-ລາວ. ສ່ວນທ່ານພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດລາວ ເນັ້ນໜັກວ່າ ກະຊວງປ້ອງກັນປະເທດລາວ ພວມມີແຜນການສົມທົບກັບກະຊວງປ້ອງກັນປະເທດ ແລະບັນດາອົງການທີ່ກ່ຽວຂ້ອງຂອງຫວຽດນາມ ເພື່ອສ້າງຮູບເງົາເອກະສານກ່ຽວກັບປູສະນີຍະສະຖານປະຫວັດສາດນີ້.
ໂດຍ: ສົມເພັດ