ສູນກາງຊາວໜຸ່ມກອມມູນິດໂຮ່ຈີມິນ ມອບເງິນຈຳນວນ 170.000.000 ດົງໃຫ້ແກ່ສູນກາງຊາວໜຸ່ມປະຊາຊົນປະຕິວັດລາວ
ວັນທີ 9 ມີນາ 2021 ທີ່ສະຖານທູດແຫ່ງ ສປປ ລາວ ປະຈຳ ສສ ຫວຽດນາມ ສະຫາຍ ຫງວຽນງອກເລືອງ ເລຂາຄະນະບໍລິຫານງານສູນກາງຊາວໜຸ່ມກອມມູນິດໂຮ່ຈີມິນ, ປະທານສະຫະພັນຊາວໜຸ່ມຕະລຸມບອນ ໄດ້ນຳເອົາເງິນຈຳນວນ 170.000.000 ດົງ (ໜຶ່ງຮ້ອຍເຈັດສີບລ້ານດົງ) ມາມອບໃຫ້ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ເພື່ອສົ່ງຕໍ່ໃຫ້ສູນກາງຊາວໜຸ່ມປະຊາຊົນປະຕິວັດລາວ ໂດຍການເຂົ້າຮ່ວມເປັນສັກຂີພິຍານຂອງຄະນະການນຳສະຖານທູດລາວ ທີ່ຮ່າໂນ້ຍ ພ້ອມດ້ວຍພະນັກງານ ຂອງທັງສອງຝ່າຍລາວ-ຫວຽດນາມ.
ສະຫາຍ ຫງວຽນງອກເລືອງ ເລຂາຄະນະບໍລິຫານງານສູນກາງຊາວໜຸ່ມກອມມູນິດໂຮ່ຈີມິນ ໃຫ້ຮູ້ວ່າ ສູນກາງຊາວໜຸ່ມກອມມູນິດໂຮ່ຈີມິນ ແລະສູນກາງຊາວໜຸ່ມປະຊາຊົນປະຕິວັດລາວ ໄດ້ມີສາຍພົວພັນ ເຊິ່ງກັນ ແລະກັນມາຕັ້ງແຕ່ດຶກດຳບັນສອງຝ່າຍໄດ້ມີການແລກປ່ຽນຄະນະຜູ້ແທນຂັ້ນສູງ ແລະມີການແລກປ່ຽນຝຶກອົບຮົມທາງດ້ານວິຊາການຫຼາຍຮຸ້ນຢ່າງເປັນປົກກະຕິ, ແຕ່ໄລຍະຜ່ານມາໄດ້ເກີດມີການລະບາດພະຍາດໂຄວິດ-19, ຈຶ່ງບໍ່ສາມາດແລກປ່ຽນຄະນະໄປມາຫາກັນໄດ້. ເຖິງແນວໃດກໍຕາມເງິນຈຳນວນທີ່ນຳມາມອບຄັ້ງນີ້ ແມ່ນເພື່ອປະກອບສ່ວນເຂົ້າໃນການຊ່ວຍເຫຼືອ ແລະຊຸກຍູ້ບັນດາກິດຈະກຳແລກປ່ຽນຊາວໜຸ່ມ, ນັກສຶກສາລາວ-ຫວຽດນາມ ຢູ່ ສປປ ລາວ.
|
|
ສູນກາງຊາວໜຸ່ມກອມມູນິດໂຮ່ຈີມິນ ມອບເງິນຈຳນວນ 170.000.000 ດົງໃຫ້ແກ່ສູນກາງຊາວໜຸ່ມປະຊາຊົນປະຕິວັດລາວ. ພາບ: lnr.org.la |
ໃນໂອກາດນີ້ ສະຫາຍ ແສງເພັດ ຮຸ່ງບຸນຍວງ ໄດ້ກ່າວວ່າ ການຊ່ວຍເຫຼືອຄັ້ງນີ້ເປັນການສະ ແດງເຖິງນໍ້າໃຈມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ ອ້າຍນ້ອງ ທີ່ເວລາໃດກໍໄດ້ໃຫ້ການຊ່ວຍເຫຼືອເຊິ່ງກັນ ແລະກັນຕະຫຼອດມາ ໂດຍສະເພາະແມ່ນສູນກາງຊາວໜຸ່ມກອມມູນິດໂຮ່ຈີມິນ ແລະສູນກາງຊາວໜຸ່ມປະຊາຊົນປະຕິວັດລາວ.
ພ້ອມດຽວກັນນັ້ນ, ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຮູ້ບຸນຄຸນ ແລະຂອບອົກຂອບໃຈຢ່າງຈິງໃຈມາຍັງສະຫາຍ ຫງວຽນງອກເລືອງ ເລຂາຄະນະບໍລິຫານງານສູນກາງຊາວໜຸ່ມກອມມູນິດໂຮ່ຈີມິນ, ປະທານສະຫະພັນຊາວໜຸ່ມຕະລຸມບອນ ພ້ອມດ້ວຍຄະນະ ທີ່ມອບເງິນຊ່ວຍເຫຼືອດັ່ງກ່າວນີ້ໃຫ້ແກ່ສູນກາງຊາວໜຸ່ມປະຊາຊົນປະຕິວັດລາວ ແລະກໍໄດ້ຢືນຢັນວ່າ ຈະນຳເອົາເງິນຈຳນວນດັ່ງກ່າວນີ້ໄປມອບຕໍ່ໃຫ້ພາກສ່ວນທີ່ກ່ຽວຂ້ອງ ເພື່ອນຳໃຊ້ໃຫ້ຖືກຕ້ອງຕາມຈຸດປະສົງ ແລະມີປະສິດທິຜົນສູງ.
ໂດຍ: ວສລ