ສຳນັກຂ່າວສານຫວຽດນາມ-ລາວ ສືບຕໍ່ເພີ່ມທະວີການຮ່ວມມື

ຕອນເຊົ້າວັນທີ 20 ພະຈິກ, ຢູ່ສໍານັກງານ KPL, ທີ່ນະຄອນຫຼວງວຽງຈັນ, ຄະນະຜູ້ແທນສຳນັກຂ່າວສານຫວຽດນາມ ໂດຍທ່ານນາງ ຫວູຫວຽດຈາງ ຜູ້ອໍານວຍການໃຫຍ່ ເປັນຫົວໜ້າຄະນະ ແລະຄະນະຜູ້ແທນ KPL ໂດຍທ່ານ ວັນນະສິນ ສິມມະວົງ ຜູ້ອໍານວຍການໃຫຍ່ ເປັນຫົວໜ້າຄະນະ ໄດ້ດໍາເນີນການພົບປະເຈລະຈາ.

ທ່ານນາງ ຫວູຫວຽດຈາງ ຜູ້ອໍານວຍການໃຫຍ່ສໍານັກຂ່າວສານຫວຽດນາມ ກ່າວຄໍາເຫັນທີ່ການພົບປະເຈລະຈາ. ພາບ: ສໍານັກຂ່າວສານຫວຽດນາມ

ທີ່ການພົບປະເຈລະຈາ, ທ່ານນາງ ຫວູຫວຽດຈາງ ຂອບໃຈ KPL ໄດ້ສ້າງເງື່ອນໄຂສະດວກໃຫ້ສຳນັກຂ່າວສານຫວຽດນາມ ໃນຫຼາຍຂົງເຂດ, ຢັ້ງຢືນວ່າ ການຊຸກຍູ້ການພົວພັນຮ່ວມມືກັບ KPL ແມ່ນໜຶ່ງໃນບັນດາບຸລິມະສິດແຖວໜ້າໃນການພົວພັນຕ່າງປະເທດຂອງສຳນັກຂ່າວສານຫວຽດນາມ; ພ້ອມທັງຂອບໃຈ KPL ທີ່ໄດ້ໜູນຊ່ວຍ, ຊ່ວຍເຫຼືອນັກຂ່າວສຳນັກຂ່າວສານຫວຽດນາມ ປະຈຳ ນະຄອນຫຼວງວຽງຈັນ ປະຕິບັດໜ້າທີ່ໂຄສະນາເຫດການສຳຄັນນີ້ກໍ່ຄືການເຄື່ອນໄຫວວິຊາການໃນບໍລິເວນເປັນຢ່າງດີ.

ທ່ານ ວັນນະສິນ ສິມມະວົງ ຜູ້ອໍານວຍການໃຫຍ່ສໍານັກຂ່າວສານປະເທດລາວ ກ່າວຄໍາເຫັນທີ່ການພົບປະເຈລະຈາ. ພາບ: ສໍານັກຂ່າວສານຫວຽດນາມ

ສ່ວນທ່ານ ວັນນະສິນ ສິມມະວົງ ໄດ້ຕີລາຄາສູງຕໍ່ການພົວພັນຮ່ວມມືນັບມື້ນັບພັດທະນາອັນດີງາມລະຫວ່າງສອງສໍານັກຂ່າວສານບົນພື້ນຖານສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດລາວ-ຫວຽດນາມ, ກໍ່ຄືສອງສໍານັກຂ່າວສານຂອບໃຈຢ່າງຈິງໃຈຕໍ່ສຳນັກຂ່າວສານຫວຽດນາມ ທີ່ຍາມໃດກໍ່ໜູນຊ່ວຍ, ຊ່ວຍເຫຼືອ KPL ບົນຈິດໃຈສະຫາຍ, ຮ່ວມອາຊີບອັນສະໜິດສະໜົມ, ປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະພັດທະນາປະເທດຊາດ.

ບັນຍາກາດທີ່ການພົບປະເຈລະຈາ. ພາບ: ສໍານັກຂ່າວສານຫວຽດນາມ

ກ່ຽວກັບທິດທາງ ແລະແຜນການເພີ່ມທະວີການຮ່ວມມືດ້ານວິຊາການ ໄລຍະ 2024-2025, ສໍາລັບວຽກງານຂໍ້ມູນຂ່າວສານ, ສອງຝ່າຍໄດ້ເຫັນດີເປັນເອກະພາບເພີ່ມທະວີການແລກປ່ຽນຂໍ້ມູນຂ່າວສານ (ເອກະສານ/ຮູບພາບ) ແນໃສ່ເປີດກວ້າງການໂຄສະນາຂໍ້ມູນຂ່າວສານໃນທຸກຂົງເຂດ, ການເມືອງ, ການທູດ, ເສດຖະກິດ, ວັດທະນະທຳ, ສັງຄົມ... ຂອງແຕ່ລະປະເທດ, ປະກອບສ່ວນຊຸກຍູ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານຫວຽດນາມ-ລາວ.

ສິ້ນສຸດການພົບປະເຈລະຈາ, ທ່ານນາງ ຫວູຫວຽດຈາງ ໄດ້ມອບອຸປະກອນເຕັກນິກ ແລະຄອມພິວເຕີຈຳນວນໜຶ່ງໃຫ້ KPL ເພື່ອຮັບໃຊ້ໃຫ້ການຜະລິດຂ່າວ, ບົດກໍ່ຄືຍົກສູງຄຸນນະພາບຮູບພາບ; ທ່ານນາງ ຫວູຫວຽດຈາງ ແລະທ່ານ ວັນນະສິນ ສິມມະວົງ ກໍ່ໄດ້ລົງນາມໃນບົດບັນທຶກການຮ່ວມມືໃນໄລຍະຈະມາເຖິງ.

ໂດຍ: ເຈິ່ນຮວ່ຽນ