ປິດຊຸດຝຶກອົບຮົມວຽກງານຊາວໜຸ່ມກອງທັບໃຫ້ແກ່ພະນັກງານກອງທັບປະຊາຊົນລາວ

ຊຸດຝຶກອົບຮົມວິຊາການວຽກງານຊາວໜຸ່ມກອງທັບປີ 2024 ມີພະນັກງານກອງທັບປະຊາຊົນລາວ ເຂົ້າຮ່ວມ 20 ຄົນ. ໃນເວລາ 30 ວັນທີ່ຝຶກອົບຮົມ (ແຕ່ວັນທີ 2-31 ກໍລະກົດ), ບັນດານັກສໍາມະນາກອນໄດ້ຮັບການແນະນໍາ 16 ຫົວເລື່ອງສະເພາະກ່ຽວກັບບັນດາເນື້ອໃນ: ແນວທາງ, ນະໂຍບາຍການຕ່າງປະເທດຂອງພັກ, ລັດຫວຽດນາມ ແລະການພົວພັນ ຫວຽດນາມ-ລາວ; ມາດຕະການກໍ່ສ້າງ, ທະວີຄູນຮູບແບບການໂຄສະນາສຶກສາກົດໝາຍໃຫ້ແກ່ຊາວໜຸ່ມຢູ່ກົມກອງຮາກຖານ; ແນະນຳການຈັດຕັ້ງກອງປະຊຸມໃຫຍ່ຂອງຄະນະຊາວໜຸ່ມທຸກຂັ້ນ; ບັນຫາພື້ນຖານກ່ຽວກັບຫຼັກການຈັດຕັ້ງ, ເຄື່ອນໄຫວຂອງຄະນະຊາວໜຸ່ມກອມມູນິດໂຮ່ຈີມິນ; ທັກສະໃນການຈັດຕັ້ງການເຄື່ອນໄຫວຫັນເປັນລະຄອນເວທີໃຫ້ພະນັກງານສະມາຊິກຊາວໜຸ່ມ; ວິທີຈິນຕະນາການຢ່າງມີຫົວຄິດປະດິດສ້າງໃນການຈັດຕັ້ງການເຄື່ອນໄຫວວຽກງານຄະນະຊາວໜຸ່ມ ແລະຂະບວນການຊາວໜຸ່ມຕໍ່ໜ້າການກະທົບຂອງການປະຕິວັດອຸດສາຫະກຳ 4.0...

ບັນດານັກສໍາມະນາກອນທີ່ເຂົ້າຮ່ວມການຝຶກອົບຮົມຖ່າຍຮູບເປັນທີ່ລະນຶກທີ່ພິທີປິດ. ພາບ: ເລແອງເຕິ່ນ

ນອກຈາກການຮໍ່າຮຽນຢູ່ໃນຫ້ອງຮຽນ ແລະການຄົ້ນຄວ້າດ້ວຍຕົນເອງ, ການພົບປະເຈລະຈາ, ການແລກປ່ຽນແລ້ວ, ຄະນະຈັດຕັ້ງ ກໍ່ໄດ້ຈັດຕັ້ງໃຫ້ນັກສໍາມະນາກອນໄປທັດສະນະສຶກສາ, ລົງຕົວຈິງ, ແລກປ່ຽນບົດຮຽນ, ວິທີເຮັດທີ່ດີ, ມີປະສິດທິຜົນຂອງການເຄື່ອນໄຫວວຽກງານພັກ ແລະພັດທະນາຊາວໜຸ່ມຢູ່ບັນດາອົງການ, ກົມກອງກອງທັບປະຊາຊົນຫວຽດນາມ; ຢ້ຽມຊົມທັດສະນີຍະພາບ, ເຂດຮ່ອງຮອຍປະຫວັດສາດຂອງຫວຽດນາມ ຈຳນວນໜຶ່ງ, ສ້າງກາລະໂອກາດທີ່ດີເພື່ອໃຫ້ນັກສຳມະນາກອນມີການສົມທຽບລະຫວ່າງທິດສະດີ ແລະພຶດຕິກໍາຕົວຈິງ.

ໃນໄລຍະທີ່ດຳເນີນການຝຶກອົບຮົມ, ນັກສໍາມະນາກອນກອງທັບປະຊາຊົນລາວ ຍາມໃດກໍ່ປະຕິບັດລັດຖະທຳມະນູນ, ກົດໝາຍຂອງລັດ, ລະບຽບ, ຂໍ້ກຳນົດຂອງກອງທັບປະຊາຊົນຫວຽດນາມ ແລະຄະນະຈັດຕັ້ງຢ່າງເຂັ້ມງວດ; ຮັບປະກັນຈໍານວນຜູ້ເຂົ້າຮ່ວມການຝຶກອົບຮົມ ແລະການເຄື່ອນໄຫວຖືກຕາມລາຍການທີ່ຊຸດຝຶກອົບຮົມໄດ້ວາງອອກ. ຮັບປະກັນຄວາມປອດໄພໃນທຸກດ້ານຢ່າງເດັດຂາດ. ສິ້ນສຸດການຝຶກອົບຮົມ, ນັກສຳມະນາກອນຂອງກອງທັບປະຊາຊົນລາວ 100% ໄດ້ຮັບໃບຢັ້ງຢືນຈາກຄະນະຈັດຕັ້ງ.

ໂດຍ: ຈາງຫງວຽນ