ທູດລາວ ປະຈຳ ສສ ຫວຽດນາມ ເຊັນປື້ມໄຫວ້ອາໄລສະຫາຍ ເຈືອງວີ້ງຈ້ອງ
ຕອນເຊົ້າວັນທີ 21 ກຸມພາ 2021, ຄະນະນຳສະຖານເອກອັກຄະລັດຖະທູດລາວ ນຳໂດຍສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ໄດ້ເຂົ້າວາງພວງມາລາ ແລະເຊັນປຶ້ມເພື່ອອາໄລເຖິງດວງວິນຍານຂອງສະຫາຍ ເຈືອງວີ້ງຈ້ອງ ອະດີດກຳມະການກົມການເມືອງ, ອະດີດຮອງນາຍົກລັດຖະມົນຕີ ແຫ່ງ ສສ.ຫວຽດ ນາມ.
|
|
ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດລາວ ປະຈຳຫວຽດນາມ ເຊັນປຶ້່ມໄຫວ້ອາໄລ ສະຫາຍ ເຈືອງວີ້ງຈ້ອງ. ພາບ: lnr.org.la. |
ສະຫາຍ ເຈືອງວີ້ງຈ້ອງ ໄດ້ປະກອບສ່ວນອັນສຳຄັນເຂົ້າຮ່ວມຂະບວນການຕໍ່ສູ້ຕ້ານພວກຈັກກະພັດຜູ້ຮຸກຮານ ເພື່ອພາລະກິດທ້ອນໂຮມປະເທດຊາດເປັນເອກະພາບ, ສະຫາຍໄດ້ອຸດທິດຊີວິດເພື່ອພາລະກິດປົກປັກຮັກສາ ແລະສ້າງສາປະເທດຊາດຂອງປະຊາຊົນຫວຽດນາມອ້າຍນ້ອງ, ສະຫາຍເປັນເພື່ອນສະໜິດສະໜົມທີ່ໃກ້ຊິດຂອງພັກ, ລັດ ແລະປະຊາຊົນລາວ.
ສະຫາຍ ແສງເພັດ ຮຸ່ງບຸນຍວງ ໄດ້ສະແດງຄວາມໂສກເສົ້າເສຍດາຍ ແລະອາໄລອາວອນຢ່າງສຸດຊຶ້ງຕໍ່ການຈາກໄປຂອງ ສະຫາຍ ເຈືອງວີ້ງຈ້ອງ ເຊິ່ງການຈາກໄປຂອງສະຫາຍບໍ່ພຽງແຕ່ເປັນການສູນເສຍອະດີດຜູ້ນໍາພັກ-ລັດ, ຜູ້ມີຄວາມປີຊາສາມາດ ທີ່ປ່ຽມລົ້ນໄປດ້ວຍປະສົບການຂອງພັກ, ລັດ ແລະປະຊາຊົນຫວຽດນາມ ແຕ່ຍັງເປັນການສູນເສຍເພື່ອນມິດຜູ້ໃກ້ຊິດສະໜິດ ສະໜົມຂອງພັກ, ລັດ ແລະປະຊາຊົນລາວ.
ນະໂອກາດແຫ່ງຄວາມໂສກເສົ້າເສຍດາຍນີ້, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ.ຫວຽດນາມ ໄດ້ແບ່ງເບົາຄວາມທຸກໂສກ, ຄວາມອາໄລອາວອນຢ່າງສຸດຊຶ້ງຮ່ວມກັບລັດຖະບານ ແລະປະຊາຊົນຫວຽດນາມ ຕະຫລອດຮອດ ຄອບຄົວ, ຍາດຕິພີ່ນ້ອງ ແລະເພື່ອນມິດຂອງສະຫາຍ ເຈືອງວີ້ງຈ້ອງ ມານະໂອກາດນີ້ດ້ວຍ.
ຂ່າວ: ຂປລ