ວົງເງິນສົ່ງອອກ-ນໍາເຂົ້າລະຫວ່າງ ຫວຽດນາມ - ລາວ ກັບມາມີທ່າອ່ຽງເພີ່ມຂຶ້ນ
ກປ.ອອນໄລ - ມູນຄ່າວົງເງິນສົ່ງອອກ-ນໍາເຂົ້າລະຫວ່າງຫວຽດນາມ ແລະລາວ ໄດ້ກັບມາມີທ່າອ່ຽງເພີ່ມຂຶ້ນ, ພາຍຫຼັງຖືກຊຸດໂຊມຍ້ອນຜົນສະທ້ອນຈາກພະຍາດໂຄວິດ-19 ມາເປັນເວລາເຄິ່ງປີກວ່າ.
ຜູ້ຕາງໜ້າຫ້ອງການການຄ້າຫວຽດນາມ ປະຈໍາ ລາວ ໃຫ້ຮູ້ວ່າ ຮອດໝົດເດືອນກັນຍາ, ວົງເງິນການຄ້າສອງສົ້ນລະຫວ່າງຫວຽດນາມ ແລະລາວ ບັນລຸເກືອບ 740 ລ້ານໂດລາສະຫະລັດ. ເຖິງວ່າມີການຫຼຸດລົງເມື່ອທຽບໃສ່ກັບໄລຍະດຽວກັນຂອງປີກາຍກໍຕາມແຕ່ລະດັບຄວາມໄວໄດ້ຊັກຊ້າລົງ ແລະມີທ່າອ່ຽງເພີ່ມຂຶ້ນໃນທ້າຍປີ. ໃນນັ້ນ, ວົງເງິນສົ່ງອອກຈາກຫວຽດນາມ ໄປຍັງລາວ ແມ່ນເກືອບ 423 ລ້ານໂດລາສະຫະລັດ, ນໍາເຂົ້າຈາກລາວແມ່ນ 316 ລ້ານກວ່າໂດລາສະຫະລັດ.
|
|
ຮາກຖານປຸງແຕ່ງກ້ວຍແຫ່ງໜຶ່ງຢູ່ ລາວ. ພາບ: vov.vn. |
ການເຄື່ອນໄຫວສົ່ງອອກ-ນໍາເຂົ້າລະຫວ່າງສອງປະເທດກັບມາມີທ່າອ່ຽງເພີ່ມຂຶ້ນແມ່ນຍ້ອນມີບັນດາລະບຽບການຜ່ານດ່ານຢູ່ບາງດ່ານຊາຍແດນສາກົນ, ດ່ານທ້ອງຖິ່ນໄດ້ຮັບການຜ່ອນຜັນເພາະວ່າທັງສອງປະເທດລ້ວນແຕ່ສາມາດຄວບຄຸມພະຍາດໂຄວິດ-19 ໄດ້ເປັນຢ່າງດີ. ໃນປີນີ້ສອງປະເທດກໍາລັງມານະພະຍາຍາມຊຸກຍູ້ການຄ້າສອງຝ່າຍໃຫ້ເພີ່ມຂຶ້ນແຕ່ 10-15% ເມື່ອທຽບໃສ່ປີກາຍ, ອາດຈະບັນລຸ 1 ຕື້ໂດລາສະຫະລັດ ຕາມແຜນການທີ່ວາງອອກ.
ລາວ ສົ່ງອອກໄປຍັງຫວຽດນາມສ່ວນຫຼາຍແມ່ນແຮ່ທາດ, ຜະລິດຕະພັນໄມ້ ແລະຜະລິດຕະພັນກະເສດ, ຄື: ຢາງພາລາ, ກາເຟ, ສາລີ, ມັນຕົ້ນ, ເຂົ້າສານ, ສັດລ້ຽງ ແລະນໍາເຂົ້າຈາກຫວຽດນາມແມ່ນນໍ້າມັນແອັດຊັງ, ຝຸ່ນ, ເຫຼັກກ້າ, ເຄື່ອງຈັກ, ອຸປະກອນໄຟຟ້າ, ວັດສະດຸກໍ່ສ້າງ ແລະເຄື່ອງອາໄຫຼ່. ຫວຽດນາມ ຍັງແມ່ນຄູ່ຮ່ວມມືການຄ້າໃຫຍ່ອັນດັບ 3 ຂອງລາວ ແລະແມ່ນນັກລົງທຶນຕ່າງປະເທດໃຫຍ່ອັນດັບ 3 ຢູ່ລາວ, ຖັດຈາກໄທ ແລະຈີນ.
ໂດຍ: ໄຊຊະນະ