ເພີ່ມທະວີການຮ່ວມມືລະຫວ່າງສອງຫ້ອງວ່າການສໍານັກງານນາຍົກລັດຖະມົນຕີຫວຽດນາມ-ລາວ
ກປ.ອອນໄລ - ໂດຍໄດ້ຮັບຄໍາເຊີນຂອງທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີລາວ, ທ່ານ ມາຍຕ໊ຽນຢຸງ, ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີຫວຽດນາມ ນໍາໜ້າຄະນະຜູ້ແທນຫວຽດນາມ ໄດ້ໄປຢ້ຽມຢາມ ແລະເຮັດວຽກຢູ່ລາວ ໃນລະຫວ່າງວັນທີ 19-20 ກໍລະກົດ.
ຕອນຄໍ່າວັນທີ 19 ກໍລະກົດ, ຢູ່ນະຄອນຫຼວງວຽງຈັນ, ຄະນະໄດ້ຮັບການຕ້ອນຮັບຢ່າງສະໜິດສະໜົມຈາກທ່ານ ທອງລຸນ ສີສຸລິດ ນາຍົກລັດຖະມົນຕີລາວ. ເຂົ້າຮ່ວມການຕ້ອນຮັບຍັງມີທ່ານ ຫງວຽນບ໊າຮຸ່ງ ເອກອັກຄະລັດຖະທູດຫວຽດນາມ ປະຈໍາລາວ.
ທີ່ການຕ້ອນຮັບ, ທ່ານ ມາຍຕ໊ຽນຢຸງ ເນັ້ນໜ້ັກວ່າ, ຫວຽດນາມ ຍາມໃດກໍ່ເອົາໃຈໃສ່ຕິດຕາມ ແລະປາດຖະໜາວ່າ ປະເທດລາວ ຈະພັດທະນາເປັນປົກກະຕິ ແລະວັດທະນາຖາວອນ, ປະຊາຊົນລາວ ມີຊີວິດອີ່ມໜຳສຳລານ ແລະມີຄວາມຜາສຸກ.
|
|
ທ່ານ ທອງລຸນ ສີສຸລິດ ນາຍົກລັດຖະມົນຕີລາວ ຕ້ອນຮັບທ່ານ ມາຍຕ໊ຽນຢຸງ, ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີຫວຽດນາມ. ພາບ: ສໍານັກຂ່າວສານຫວຽດນາມ. |
ສ່ວນທ່ານ ທອງລຸນ ສີສຸລິດ ຢືນຢັນວ່າ ການຢ້ຽມຢາມ ແລະເຮັດວຽກຂອງຄະນະຈະປະກອບສ່ວນເພີ່ມທະວີ ແລະຮັດແໜ້ນການພົວພັນແບບພິເສດລະຫວ່າງສອງພັກ, ສອງລັດ ແລະປະຊາຊົນສອງປະເທດເວົ້າລວມ, ກໍ່ຄືລະຫວ່າງຫ້ອງວ່າການສໍານັກງານນາຍົກລັດຖະມົນຕີສອງປະເທດ ຫວຽດນາມ-ລາວ ເວົ້າສະເພາະ.
ທ່ານ ທອງລຸນ ສີສຸລິດ ສະເໜີສອງຫ້ອງວ່າການ ສືບຕໍ່ສົມທົບກັນ, ແລກປ່ຽນບົດຮຽນໃນທຸກຂົງເຂດ; ເພີ່ມທະວີການຮ່ວມມືກໍ່ສ້າງພະນັກງານ ເພື່ອຮັບປະກັນວຽກງານເປັນເສນາທິການໃຫ້ມີປະສິດທິຜົນ, ຮັບໃຊ້ວຽກງານຊີ້ນໍາ, ບໍລິຫານຂອງລັດຖະບານ, ນາຍົກລັດຖະມົນຕີ. ທ່ານ ທອງລຸນ ສີສຸລິດ ໄດ້ສະແດງຄວາມປິຕິຊົມຊື່ນຕໍ່ບັນດາຜົນງານໃນເບື້ອງຕົ້ນຂອງຫວຽດນາມ ໃນການພັດທະນາລັດຖະບານເອເລັກໂຕນິກ; ສະແດງຄວາມປາດຖະໜາວ່າ ຫວຽດນາມ ຈະແບ່ງປັນບົດຮຽນກັບລາວໃນການພັດທະນາລັດຖະບານເອເລັກໂຕນິກ ແລະໃຫ້ຮູ້ວ່າ ຈະຊີ້ນໍາຫ້ອງວ່າການສໍານັກງານນາຍົກລັດຖະມົນຕີລາວ ເລືອກເຟັ້ນພະນັກງານ ເພື່ອຈັດສົ່ງມາຫວຽດນາມ ຖອດຖອນບົດຮຽນກ່ຽວກັບການກໍ່ສ້າງລັດຖະບານເອເລັກໂຕນິກ, ພ້ອມທັງສະເໜີສອງຫ້ອງວ່າການສົມທົບກັນກໍ່ສ້າງໂຄງການທີ່ກ່ຽວຂ້ອງໃນຂົງເຂດນີ້.
ໂດຍ: ເຈິ່ນຮວ່ຽນ