ກ່ຽວກັບເຫດກຳປັ່ນຫາປາ QNg 96416 TS ຢູ່ເຂດຮວ່າງຊາ:
ຮຽກຮ້ອງຈີນ ສືບສວນ, ກວດກາ ແລະສົມທົບກັນແກ້ໄຂ
ກປ.ອອນໄລ - ຂໍ້ມູນເບື້ອງຕົ້ນກ່ຽວຂ້ອງເຖິງເຫດກໍາປັ່ນຫາປາໝາຍເລກ QNg 96416 TS ຈາກ ບັນດາອົງການກ່ຽວຂ້ອງໃຫ້ຮູ້ວ່າ: ວັນທີ 10 ມີຖຸນາ ໃນຂະນະເດີນທາງຫ່າງຈາກທາງທິດໃຕ້ເກາະໂກລິນ ຂຶ້ນກັບໝູ່ເກາະຮວ່າງຊາ ຂອງຫວຽດນາມ ປະມານ 7 ໄມທະເລ, ກຳປັ່ນຫາປາໝາຍເລກ QNg 96416 TS ຖືກກໍາປັ່ນເຫຼັກທີ່ມີໝາຍເລກ 4006 ແລະເຮືອກາໂນລຳໜຶ່ງຂອງຈີນ ເຂົ້າມາໃກ້ພາໃຫ້ເກີດຄື້ນແຮງ ເຮັດໃຫ້ຊາວປະມົງ 16 ຄົນພ້ອມກັບວັດຖຸ, ອຸປະກອນຫຼາຍຢ່າງໃນເຮືອຫາປາຂອງຫວຽດນາມ ຖືກຕົກລົງທະເລ; ກຳປັ່ນຫາປາມີຄວາມສ່ຽງຈະຈົມນ້ຳ.
ບາງຄົນຈາກກຳປັ່ນຂອງຈີນ ໄດ້ເຂົ້າກຳປັ່ນຫາປາຂອງຫວຽດນາມ ດູດນ້ຳອອກ ແລະນຳຊາວປະມົງຫວຽດນາມ ກັບຄືນກຳປັ່ນຂອງຕົນ. ກ່ອນທີ່ອອກຈາກກຳປັ່ນຫາປາຂອງຫວຽດນາມ, ຝ່າຍຈີນ ໄດ້ໃຊ້ຄວາມຮຸນແຮງບັງຄັບໃຫ້ກັບຕັນເຮືອຫາປາແປະໂປ້ມືໃສ່ເອກະສານເປັນພາສາຕ່າງປະເທດ ແລະຢືດເອົາສິນໃນນ້ຳ, ອຸປະກອນຫາປາ ແລະອຸປະກອນຂອງກຳປັ່ນ QNg 96416 TS ຈໍານວນຫຼາຍ.
|
|
ທ່ານນາງ ເລທິທູຮັ່ງ ໂຄສົກກະຊວງການຕ່່າງປະເທດຫວຽດນາມ. ພາບ: tuoitre.vn. |
ວັນທີ 10 ມິຖຸນາ, ກົມກົງສູນ, ກະຊວງການຕ່າງປະເທດ ແລະສະຖານທູດຫວຽດນາມ ປະຈຳ ປັກກິ່ງ ໄດ້ແລກປ່ຽນກັບຝ່າຍ ຈີນ ຢືນຢັນອະທິປະໄຕຂອງຫວຽດນາມ ສຳລັບໝູ່ເກາະຮວ່າງຊາ, ຮຽກຮ້ອງຝ່າຍ ຈີນ ດຳເນີນການສືບສວນ, ກວດກາຂ່າວກ່ຽວຂ້ອງເຖິງເຫດດັ່ງກ່າວ ແລະແຈ້ງຜົນການກວດກາໃຫ້ບັນດາອົງການກ່ຽວຂ້ອງຂອງຫວຽດນາມ ເພື່ອສືບຕໍ່ສົມທົບກັນແກ້ໄຂ.
ວັນທີ 12 ມິຖຸນາ, ກຳປັ່ນໝາຍເລກ QNg 96416TS ແລະຊາວປະມົງທຸກຄົນຢູ່ກຳປັ່ນໄດ້ກັບມາທ່າກຳປັ່ນຊາກີ່, ແຂວງກວ໋າງຫງາຍ ຢ່າງປອດໄພ. ປະຈຸບັນ, ບັນດາຊາວປະມົງ ກຳລັງແຍກປ່ຽວຢູ່ສູນການແພດບິ່ງເຊິນ, ກວ໋າງຫງາຍ, ຕາມຂໍ້ກຳນົດກ່ຽວກັບການປ້ອງກັນ, ຕ້ານພະຍາດໂຄວິດ-19. ປະຈຸບັນບັນດາອົງການກ່ຽວຂ້ອງຂອງຫວຽດນາມ ພວມຕັ້ງໜ້າເກັບກຳ ແລະກວດກາຂໍ້ມູນ ແລະຈະສືບຕໍ່ມີບັນດາມາດຕະການປະຊາສຳພັນກັບຝ່າຍຈີນ, ເດັດດ່ຽວປົກປັກຮັກສາອະທິປະໄຕກໍ່ຄືສິດ ແລະຜົນປະໂຫຍດອັນຊອບທຳຂອງຊາວປະມົງຫວຽດນາມ.
ໂດຍ: ແສງເດືອນ