ຫວຽດນາມ ຄັດຄ້ານ ຈີນ ຫ້າມຫາປາຢູ່ທະເລຕາເວັນອອກ
ກປ.ອອນໄລ - ວັນທີ 4 ພຶດສະພາ, ເມື່ອຕອບຄໍາຖາມຂອງນັກຂ່າວກ່ຽວກັບເລື່ອງ ຈີນ ຫ້າມຫາປາ ແຕ່ວັນທີ 1 ພຶດສະພາ ຫາວັນທີ 16 ສິງຫາ 2019 ຢູ່ເຂດທະເລຕາເວັນອອກ, ໃນນັ້ນລວມມີບາງເຂດທະເລຂອງຫວຽດນາມ, ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດຫວຽດນາມ ຢັ້ງຢືນວ່າ:
“ຫວຽດນາມ ມີພະຍານຫຼັກຖານດ້ານນິຕິກໍາ ແລະປະຫວັດສາດຢ່າງພຽງພໍ ເພື່ອຢັ້ງຢືນອະທິປະໄຕຂອງຕົນສໍາລັບໝູ່ເກາະຮວ່າງຊາ ແລະເຈື່ອງຊາ, ກໍຄືບັນດາສິດອັນຊອບທໍາສໍາລັບບັນດາເຂດທະເລຂອງຫວຽດນາມ ເຊິ່ງໄດ້ກໍານົດຢ່າງສອດຄ່ອງກັບສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982.
|
|
ທ່ານນາງ ເລທິທູຮັ່ງ ໂຄສົກກະຊວງການຕ່າງປະເທດຫວຽດນາມ. ພາບ: ສໍານັກຂ່າວສານຫວຽດນາມ. |
ຫວຽດນາມ ຖືວ່າ ບັນດາມາດຕະການອະນຸລັກແຫຼ່ງຊັບພະຍາກອນຊີວະນາໆພັນຄວນໄດ້ຮັບການດໍາເນີນໃຫ້ສອດຄ່ອງກັບບັນດາຂໍ້ກໍານົດຂອງສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982 ແລະບໍ່ສົ່ງຜົນຮ້າຍເຖິງສິດອະທິປະໄຕ ແລະບັນດາສິດພິພາກສາຢູ່ທະເລຂອງບັນດາປະເທດທີ່ກ່ຽວຂ້ອງ.
ຫວຽດນາມ ຄັດຄ້ານ ແລະເດັດດ່ຽວປະຕິເສດຂໍ້ຕົກລົງພຽງລໍາພັງຝ່າຍດຽວນີ້ຂອງຝ່າຍຈີນ. ກົດລະບຽບນີ້ໄດ້ລ່ວງລະເມີດອະທິປະໄຕຂອງຫວຽດນາມ ສໍາລັບໝູ່ເກາະ ຮວ່າງຊາ, ລະເມີດບັນດາສິດ ແລະຜົນປະໂຫຍດອັນຊອບທໍາຂອງຫວຽດນາມ ຢູ່ບັນດາເຂດທະເລຂອງຕົນ, ລະເມີດກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982, ໄປຝືນກັບຈິດໃຈ ແລະເນື້ອໃນຂອງຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ ລະຫວ່າງ ອາຊຽນ ແລະຈີນ (DOC), ຝືນກັບຂໍ້ຕົກລົງກ່ຽວກັບບັນດາຫຼັກການພື້ນຖານໃນການຊີ້ນໍາແກ້ໄຂບັນຫາຢູ່ທະເລ ຫວຽດນາມ - ຈີນ”.
ໂດຍ: ໄຊຊະນະ