ກອງປະຊຸມມີການເຂົ້າຮ່ວມຂອງລັດຖະມົນຕີປ້ອງກັນປະເທດ, ຜູ້ຕາງໜ້າລັດຖະມົນຕີປ້ອງກັນປະເທດອາຊຽນ ແລະ 8 ປະເທດຄູ່ຮ່ວມມືລວມມີ: ອົດສະຕາລີ, ຈີນ, ອິນເດຍ, ຍີ່ປຸ່ນ, ນິວຊີແລນ, ສ.ເກົາຫຼີ, ລັດເຊຍ ແລະສະຫະລັດອາເມລິກາ. ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ນໍາໜ້າຄະນະຜູ້ແທນຂັ້ນສູງກະຊວງປ້ອງກັນປະເທດຫວຽດນາມ ເຂົ້າຮ່ວມກອງປະຊຸມ.
    |
 |
|
ບັນຍາກາດທີ່ກອງປະຊຸມ ADMM+ ຄັ້ງທີ 11. ພາບ: qdnd.vn |
ກ່າວຄໍາເຫັນໄຂພິທີ, ທ່ານພົນເອກ ຈັນສະໝອນ ຈັນຍາລາດ ເນັ້ນໜັກວ່າ ໃນສະພາບການໂລກ ແລະພາກພື້ນມີການຜັນແປຢ່າງວ່ອງໄວ, ອາຊຽນ ສືບຕໍ່ຮັກສາບົດບາດເປັນໃຈກາງ, ເປັນຂົວຕໍ່ໃຫ້ແກ່ການຮ່ວມມື ແລະການເຈລະຈາ. ຕີລາຄາວ່າ ໃນໄລຍະຜ່ານມາ, ການຮ່ວມມືດ້ານປ້ອງກັນຊາດລະຫວ່າງອາຊຽນ ກັບບັນດາຄູ່ຮ່ວມມືນັບມື້ນັບແທດຈິງ, ທ່ານພົນເອກ ຈັນສະໝອນ ຈັນຍາລາດ ສະແດງຄວາມຫວັງວ່າ ADMM+ ຄັ້ງທີ 11 ຈະສືບຕໍ່ແມ່ນກາລະໂອກາດ ເພື່ອຊຸກຍູ້ການຮ່ວມມືດ້ານປ້ອງກັນຊາດຢ່າງມີປະສິດທິຜົນກວ່າອີກ, ປະກອບສ່ວນແທດຈິງເຂົ້າໃນການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ ແລະຄວາມວັດທະນາຖາວອນຢູ່ພາກພື້ນ ກໍ່ຄືໃນໂລກ. ເນື່ອງໃນໂອກາດນີ້, ທ່ານພົນເອກ ຈັນສະໝອນ ຈັນຍາລາດ ໄດ້ສະແດງຄວາມຂອບອົກຂອບໃຈຕໍ່ການສະໜັບສະໜູນຂອງບັນດາປະເທດສະມາຊິກອາຊຽນ ແລະບັນດາປະເທດຄູ່ຮ່ວມມືທີ່ສະຫງວນໃຫ້ລາວ ໃນປີເປັນປະທານອາຊຽນ 2024.
ທີ່ກອງປະຊຸມ, ບັນດາຜູ້ແທນໄດ້ອັບເດດສະພາບການຮ່ວມມືອາຊຽນໃນໄລຍະມໍ່ໆມານີ້; ຮັບຮອງເອົາຖະແຫຼງການຮ່ວມຫົວຂໍ້ຍ່ອຍຂອງ ADMM+ ກ່ຽວກັບການປ່ຽນແປງຂອງດິນຟ້າອາກາດ. ກອງປະຊຸມກໍ່ແລກປ່ຽນທັດສະນະກ່ຽວກັບບັນຫາຄວາມໝັ້ນຄົງຂອງພາກພື້ນ ແລະໂລກ, ໃນນັ້ນໄດ້ເນັ້ນໜັກເຖິງຄວາມສຳຄັນຂອງສັນຕິພາບ, ສະຖຽນລະພາບ. ບັນດາປະເທດຄູ່ຮ່ວມມືໄດ້ຢືນຢັນການສະໜັບສະໜູນບົດບາດໃຈກາງຂອງອາຊຽນ ໃນກົນໄກຮ່ວມມືຢູ່ພາກພື້ນ.
ບັນດາຜູ້ແທນໄດ້ເນັ້ນໜັກເຖິງຄວາມສຳຄັນຂອງຄວາມໝັ້ນຄົງທາງທະເລ, ໃນນັ້ນມີທະເລຕາເວັນອອກ, ເຊິ່ງແມ່ນເສັ້ນທາງເດີນທະເລທີ່ສຳຄັນຂອງໂລກຕໍ່ຄວາມໝັ້ນຄົງພາກພື້ນ ແລະໃນທົ່ວໂລກ. ຫຼາຍປະເທດໄດ້ເຫັນດີເປັນເອກະພາບໂດຍຖືວ່າ ການຂັດແຍ້ງກັນຄວນໄດ້ຮັບການແກ້ໄຂໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982; ເນັ້ນໜັກເຖິງການຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ ແລະການບິນຢູ່ທະເລຕາເວັນອອກ. ບັນດາປະເທດ, ໃນນັ້ນມີ ຈີນ, ໄດ້ສະແດງຄວາມປາດຖະໜາຢາກບັນລຸໄດ້ກົດແຫ່ງການປະພຶດຢູ່ທະເລຕາເວັນອອກ (COC) ຢ່າງມີປະສິດທິຜົນ, ແທດຈິງ, ສອດຄ່ອງກັບກົດໝາຍສາກົນ ໂດຍໄວ.
|
|
 |
|
ທ່ານພົນເອກ ຟານວັນຢາງ ເຂົ້າຮ່ວມກອງປະຊຸມ ADMM+ ຄັ້ງທີ 11. ພາບ: qdnd.vn |
ໃນບົດກ່າວປາໄສດ້ວຍຫົວຂໍ້ “ຜູ້ນໍາດ້ານປ້ອງກັນຊາດ ມີຄວາມຮັບຜິດຊອບ, ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະຄວາມເຂັ້ມແຂງຂອງພາກພື້ນ ແລະໃນໂລກ, ທ່ານພົນເອກ ຟານວັນຢາງ ສະເໜີວ່າ ການຮ່ວມມືດ້ານປ້ອງກັນຊາດລະຫວ່າງອາຊຽນ ກັບຄູ່ຮ່ວມມືຕ້ອງຕິດພັນກັບການກໍານົດທິດຍຸດທະສາດຂອງອາຊຽນ. ພິເສດແມ່ນວິໄສທັດປະຊາຄົມອາຊຽນ 2045; ສືບຕໍ່ເຊີດຊູບົດບາດໃຈກາງ, ຄວາມສາມາດນຳພາ ແລະເປັນເຈົ້າຕົນເອງຍຸດທະສາດຂອງອາຊຽນ, ເຄົາລົບບັນດາຫຼັກການພື້ນຖານ ແລະຄຸນຄ່າຫຼັກແຫຼ່ງແກ່ນສານຂອງອາຊຽນ, ນັ້ນແມ່ນການຮ່ວມມືເພື່ອສັນຕິພາບ, ສະຖຽນລະພາບ, ພ້ອມກັນພັດທະນາ.
ກ່ຽວກັບບັນຫາທະເລຕາເວັນອອກ, ຫວຽດນາມ ໄດ້ເນັ້ນໜັກເຖິງຄວາມຈໍາເປັນໃນການປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະມີປະສິດທິຜົນ, ສ້າງເງື່ອນໄຂສະດວກໃຫ້ແກ່ການເຈລະຈາ COC ມີຄຸນນະພາບ, ມີປະສິດທິຜົນ, ແທດຈິງ, ສອດຄ່ອງກັບກົດໝາຍສາກົນ, ເປັນຕົ້ນແມ່ນ UNCLOS 1982. ທ່ານພົນເອກ ຟານວັນຢາງ ສະເໜີໃຫ້ຄູ່ຮ່ວມມື ສະໜັບສະໜູນຫຼັກໝັ້ນຂອງອາຊຽນ ກ່ຽວກັບທະເລຕາເວັນອອກ, ຄວາມມານະພະຍາຍາມຂອງອາຊຽນ ແນໃສ່ກໍ່ສ້າງທະເລຕາເວັນອອກໃຫ້ເປັນທະເລສັນຕິພາບ, ສະຖຽນລະພາບ, ຮ່ວມມື ແລະພັດທະນາແບບຍືນຍົງ. ທ່ານພົນເອກ ຟານວັນຢາງ ຢັ້ງຢືນວ່າ, ຫວຽດນາມ ມີຄວາມ ສະເໝີຕົ້ນສະເໝີປາຍຕໍ່ການປະຕິບັດແນວທາງການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ ແລະການຮ່ວມມືພັດທະນາ, ຫັນການພົວພັນເປັນຫຼາຍຮູບຫຼາຍແບບ ແລະຫຼາຍຝ່າຍ; ເປັນເພື່ອນມິດ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ ແລະເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບໃນປະຊາຄົມສາກົນ; ຢຶດໝັ້ນນະໂຍບາຍປ້ອງກັນຊາດ “ສີ່ບໍ່”.
ເນັ້ນໜັກວ່າ ປີ 2024 ແມ່ນປີແຫ່ງການຖ່າຍທອດລະຫວ່າງ 2 ຮອບວຽນຂອງກຸ່ມວິຊາການ ADMM+, ທ່ານພົນເອກ ຟານວັນຢາງ ໄດ້ສະແດງຄວາມຂອບໃຈຕໍ່ການສະໜັບສະໜູນຢ່າງຕັ້ງໜ້າຂອງບັນດາປະເທດສະມາຊິກສໍາລັບຫວຽດນາມ ແລະຍີ່ປຸ່ນ, ໃນຖານະເປັນ ປະທານຮ່ວມກຸ່ມວິຊາການ ADMM+ ກ່ຽວກັບການຮັກສາສັນຕິພາບ ໄລຍະ 2021-2023. ໂດຍໃຫ້ຮູ້ວ່າ, ງານວາງສະແດງປ້ອງກັນຊາດສາກົນຫວຽດນາມ ຄັ້ງທີ 2 ຈະຈັດຂຶ້ນໃນເດືອນທັນວານີ້, ທ່ານພົນເອກ ຟານວັນຢາງ ຂໍຖືເປັນກຽດຮຽນເຊີນບັນດາການນຳປ້ອງກັນປະເທດ, ກອງທັບ ແລະບັນດາວິສາຫະກິດອຸດສາຫະກຳປ້ອງກັນຊາດບັນດາປະເທດອາຊຽນ ແລະບັນດາປະເທດຄູ່ຮ່ວມມືເຈລະຈາມາຢ້ຽມຢາມ ກໍ່ຄືເຂົ້າຮ່ວມງານວາງສະແດງ.
* ໃນວັນດຽວກັນ, ພິທີມອບ-ຮັບປະທານ ADMM ແລະ ADMM+ ໄດ້ຈັດຂຶ້ນຢູ່ນະຄອນຫຼວງວຽງຈັນ. ຕາມນັ້ນແລ້ວ, ກະຊວງປ້ອງກັນປະເທດມາເລເຊຍ ເປັນປະທານ ADMM ແລະ ADMM+ ໃນປີ 2025.
* ວັນທີ 21 ພະຈິກ, ຢູ່ນະຄອນຫຼວງວຽງຈັນ, ລາວ, ໄດ້ດໍາເນີນການພົບປະບໍ່ເປັນທາງການລະຫວ່າງລັດຖະມົນຕີກະຊວງປ້ອງກັນປະເທດອາຊຽນ-ຈີນ ພາຍໃຕ້ການເປັນປະທານຮ່ວມຂອງທ່ານພົນເອກ ຈັນສະໝອນ ຈັນຍາລາດ ແລະທ່ານພົນໂທ Dong Jun ລັດຖະມົນຕີກະຊວງປ້ອງກັນປະເທດຈີນ.
|
|
 |
|
ທ່ານພົນເອກ ຟານວັນຢາງ ພົບປະກັບທ່ານພົນໂທ Dong Jun ລັດຖະມົນຕີກະຊວງປ້ອງກັນປະເທດຈີນ. ພາບ: qdnd.vn |
*ວັນດຽວກັນ, ທ່ານພົນເອກ ຟານວັນຢາງ ໄດ້ມີການພົບປະກັບທ່ານພົນໂທ Dong Jun. ລັດຖະມົນຕີ ສອງທ່ານໄດ້ເຫັນດີເປັນເອກະພາບຊຸກຍູ້ການພົວພັນຮ່ວມມືດ້ານປ້ອງກັນຊາດ, ປະຕິບັດເນື້ອໃນການຮ່ວມມືທີ່ໄດ້ເຫັນດີເປັນເອກະພາບຈາກການນໍາຂັ້ນສູງສອງປະເທດແນໃສ່ປະກອບສ່ວນນໍາການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ-ຈີນ ພັດທະນາຢ່າງປອດໃສ, ມີສະຖຽນລະພາບ.
|
|
 |
|
ທ່ານພົນເອກ ຟານວັນຢາງ ພົບປະກັບທ່ານ Lloyd Austin ລັດຖະມົນຕີກະຊວງປ້ອງກັນປະເທດອາເມລິກາ. ພາບ: qdnd.vn |
* ວັນທີ 21 ພະຈິກ, ທ່ານພົນເອກ ຟານວັນຢາງ ໄດ້ມີການພົບປະກັບທ່ານ Lloyd Austin ລັດຖະມົນຕີກະຊວງປ້ອງກັນປະເທດອາເມລິກາ. ສອງຝ່າຍໄດ້ເຫັນດີເປັນເອກະພາບສືບຕໍ່ເພີ່ມທະວີການຮ່ວມມືດ້ານປ້ອງກັນຊາດສອງຝ່າຍ, ສອດຄ່ອງກັບຂອບເຂດການພົວພັນຄູ່ຮ່ວມມືຍຸດທະສາດຮອບດ້ານເພື່ອສັນຕິພາບ, ການຮ່ວມມື ແລະພັດທະນາແບບຍືນຍົງ. ທ່ານພົນເອກ ຟານວັນຢາງ ຢືນຢັນວ່າ, ການຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມຢູ່ຫວຽດນາມ ມີຄວາມໝາຍສຳຄັນຫຼາຍຕໍ່ການພົວພັນສອງຝ່າຍ.
* ວັນທີ 21 ພະຈິກ, ທ່ານພົນເອກ ຟານວັນຢາງ ໄດ້ມີການແລກປ່ຽນກັບທ່ານ Kim Yong Hyun ລັດຖະມົນຕີກະຊວງປ້ອງກັນປະເທດສ.ເກົາຫຼີ ກ່ຽວກັບການຮ່ວມມືດ້ານປ້ອງກັນຊາດສອງຝ່າຍ.
* ຕອນບ່າຍວັນດຽວກັນ, ທ່ານພົນເອກ ຟານວັນຢາງ ໄດ້ມີການພົບປະກັບທ່ານພົນໂທ Alexander Fomin ຮອງລັດຖະມົນຕີກະຊວງປ້ອງກັນປະເທດລັດເຊຍ.
* ວັນທີ 21 ພະຈິກ, ທ່ານພົນເອກ ຟານວັນຢາງ ໄດ້ເຂົ້າຮ່ວມພິທີສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນເຈລະຈາ ອາຊຽນ-ອົດສະຕາລີ ແລະພິທີສະເຫຼີມສະຫຼອງ 35 ປີແຫ່ງວັນສ້າງຕັ້ງການພົວພັນເຈລະຈາ ອາຊຽນ-ສ.ເກົາຫຼີ.
ໂດຍ: ເຈິ່ນຮວ່ຽນ