ເສນາຮັກຫວຽດນາມ ແລະສະຫະພັນລັດເຊຍ ແລກປ່ຽນທາງອອນລາຍກ່ຽວກັບວັກຊິນປ້ອງກັນ SARS-CoV-2
ກປ.ອອນໄລ - ຕອນບ່າຍວັນທີ 10 ກັນຍາ, ພາຍໃຕ້ການເປັນປະທານຂອງທ່ານພົນຈັດຕະວາ ຫງວຽນຊວນກຽນ, ຫົວໜ້າກົມເສນາຮັກ (ກົມໃຫຍ່ພະລາທິການ), ເສນາຮັກຫວຽດນາມ ໄດ້ມີການແລກປ່ຽນທາງອອນລາຍກັບຄູ່ຮ່ວມມືລັດເຊຍ ກ່ຽວກັບການຮ່ວມມືໃນການຖ່າຍທອດເຕັກໂນໂລຢີ ແລະຜະລິດວັກຊິນປ້ອງກັນ SARS-CoV-2.
ທີ່ການແລກປ່ຽນ, ທ່ານ Vladimir Primak, ຜູ້ອໍານວຍການກອງທຶນລົງທຶນໂດຍກົງສະຫະພັນລັດເຊຍ ໄດ້ແນະນຳໂດຍສັງເຂບກ່ຽວກັບວັກຊິນ Sputnik V, ປະເພດວັກຊິນປ້ອງກັນ SARS-CoV-2 ທໍາອິດທີ່ລັດເຊຍ ໄດ້ອະນຸຍາດຜະລິດ.
ທ່ານພົນຈັດຕະວາ ຫງວຽນຊວນກຽນ ໃຫ້ຮູ້ວ່າ ໃນສະພາບການພະຍາດໂຄວິດ-19 ພວມມີການຜັນແປຢ່າງສັບສົນ, ບາງປະເທດ, ໃນນັ້ນມີສະຫະພັນລັດເຊຍ ໄດ້ນຳໜ້າໃນການຄົ້ນຄວ້າ ແລະຜະລິດວັກຊິນປ້ອງກັນ SARS-CoV-2. ທ່ານພົນຈັດຕະວາ ຫງວຽນຊວນກຽນ ອວຍພອນຜົນສຳເລັດເຊິ່ງຝ່າຍລັດເຊຍ ບັນລຸໄດ້ໃນການຄົ້ນຄວ້າ, ຜະລິດວັກຊິນ Sputnik V, ທ່ານຢັ້ງຢືນວ່າ ຂະແໜງການແພດທະຫານຂອງຫວຽດນາມ ພ້ອມແລ້ວທີ່ຈະຮ່ວມມືກັບບັນດາຄູ່ຮ່ວມມືລັດເຊຍ ໃນການທົດລອງວັກຊິນປ້ອງກັນ SARS-CoV-2 ເມື່ອບັນດາອົງການກ່ຽວຂ້ອງອະນຸຍາດໃຫ້; ເນື້ອໃນຈະລາຍງານກັບກະຊວງປ້ອງກັນປະເທດ, ກະຊວງສາທາລະນະສຸກຫວຽດນາມ ໃນໄວໆນີ້.
ໂດຍ: ແສງເດືອນ