ຍົກສູງກໍາລັງຄວາມສາມາດຈັດຕັ້ງບັນດາການເຄື່ອນໄຫວຝຶກຊ້ອມ ກ່ຽວກັບການຮັກສາສັນຕິພາບສະຫະປະຊາຊາດ
ກປ.ອອນໄລ - ວັນທີ 6 ມິຖຸນາ, ຢູ່ຮ່າໂນ້ຍ, ກົມຮັກສາສັນຕິພາບຫວຽດນາມ ເປັນປະທານ, ສົມທົບກັບບັນດາອົງການທີ່ກ່ຽວຂ້ອງຂອງກະຊວງປ້ອງກັນປະເທດຫວຽດນາມ ແລະອິນເດຍ ຈັດຕັ້ງກອງປະຊຸມສ້າງແຜນການໃຫ້ແກ່ການຝຶກຊ້ອມຮ່ວມໃນຮູບຈຳລອງກັບອິນເດຍ ກ່ຽວກັບການຮັກສາສັນຕິພາບສະຫະປະຊາຊາດ (ສປຊ) ປີ 2019 (VINBAX-2019) ໃນລະຫວ່າງວັນທີ 6-9 ມິຖຸນາ. ທ່ານພົນຈັດຕະວາ ຮວ່າງກິມຟຸ້ງ, ຫົວໜ້າກົມຮັກສາສັນຕິພາບຫວຽດນາມ ເປັນປະທານພິທີໄຂກອງປະຊຸມດັ່ງກ່າວ.
ກ່າວຄໍາເຫັນທີ່ພິທີ, ທ່ານພົນຈັດຕະວາ ຮວ່າງກິມຟຸ້ງ ເນັ້ນໜັກວ່າ, ກອງປະຊຸມຄັ້ງນີ້ໄດ້ຈັດຕັ້ງແມ່ນແນໃສ່ແລກປ່ຽນ, ປຶກສາຫາລືເພື່ອເຫັນດີເປັນເອກະພາບຕໍ່ບັນດາເນື້ອໃນຢ່າງລະອຽດດ້ານເຕັກນິກທີ່ກ່ຽວຂ້ອງເຖິງວຽກງານສ້າງແຜນການ ແລະກະກຽມທຸກດ້ານໃຫ້ແກ່ການຈັດຕັ້ງ VINBAX-2019 ປະສົບຜົນສໍາເລັດ; ພ້ອມທັງປະກອບສ່ວນເພີ່ມທະວີຄວາມເຂົ້າອົກເຂົ້າໃຈ, ການພົວພັນມິດຕະພາບ ແລະການຮ່ວມມືໃນຂົງເຂດຮັກສາສັນຕິພາບ ສປຊ ລະຫວ່າງຫວຽດນາມ ແລະອິນເດຍ.
ນອກຈາກນັ້ນ, ເລື່ອງຈັດຕັ້ງກອງປະຊຸມໄດ້ຊ່ວຍຍົກສູງກໍາລັງຄວາມສາມາດໃນການຈັດຕັ້ງບັນດາການເຄື່ອນໄຫວຝຶກຊ້ອມກ່ຽວກັບການຮັກສາສັນຕິພາບ ສປຊ ເທື່ອລະກ້າວ; ກ້າວໄປເຖິງເລື່ອງຫວຽດນາມ ມີຄວາມສາມາດຢ່າງພຽງພໍໃນການຈັດຕັ້ງບັນດາການເຄື່ອນໄຫວຝຶກຊ້ອມທີ່ຄ້າຍຄືກັນແນໃສ່ກະກຽມດີທີ່ສຸດໃຫ້ແກ່ກໍາລັງຮັກສາສັນຕິພາບ ສປຊ ຂອງຫວຽດນາມ ກ່ອນທີ່ຈະໄປຜັນຂະຫຍາຍຢູ່ບັນດາຄະນະປະຕິບັດງານ.
ພາຍຫຼັງພິທີໄຂ, ບັນດາຝ່າຍໄດ້ສຸມໃສ່ປຶກສາຫາລື, ເຫັນດີເປັນເອກະພາບຕໍ່ບັນດາເນື້ອໃນຢ່າງລະອຽດຕາມລາຍການເຮັດວຽກຂອງກອງປະຊຸມ.
ໂດຍ: ຄໍາແພງ