ທ່ານພົນເອກ ໂງຊວນລິກ ຕ້ອນຮັບເອກອັກຄະລັດຖະທູດການາດາ
ກປ.ອອນໄລ - ຕອນບ່າຍວັນທີ 23 ເມສາ, ທີ່ສຳນັກງານກະຊວງປ້ອງກັນປະເທດ, ທ່ານພົນເອກ ໂງຊວນລິກ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບທ່ານນາງ Deborah Paul ເອກອັກຄະລັດຖະທູດວິສາມັນຜູ້ມີອຳນາດເຕັມ ການາດາ ປະຈຳ ຫວຽດນາມ.
|
|
ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບທ່ານນາງ Deborah Paul ເອກອັກຄະລັດຖະທູດການາດາ ປະຈໍາ ຫວຽດນາມ. ພາບ: qdnd.vn. |
ທ່ານພົນເອກ ໂງຊວນລິກ ອວຍພອນທ່ານນາງ Deborah Paul ໄດ້ຮັບແຕ່ງຕັ້ງເປັນເອກອັກຄະລັດຖະທູດການາດາ ປະຈຳ ຫວຽດນາມ, ພ້ອມທັງຖືວ່າ, ຍ້ອນມີຄວາມມານະພະຍາຍາມຂອງກະຊວງປ້ອງກັນປະເທດສອງປະເທດ ກໍ່ຄືການໜູນຊ່ວຍຈາກສະຖານທູດການາດາ ປະຈຳ ຫວຽດນາມ, ມາຮອດປະຈຸບັນການຮ່ວມມືດ້ານປ້ອງກັນຊາດສອງຝ່າຍພວມໄດ້ຮັບການຊຸກຍູ້ຢ່າງຕັ້ງໜ້າ, ເຂົ້າສູ່ເນື້ອແທ້ ແລະມີປະສິດທິຜົນ, ສຸມໃສ່ເຂົ້າບັນດາຂົງເຂດ: ແລກປ່ຽນຄະນະທຸກຂັ້ນ, ບຳລຸງສ້າງນາຍທະຫານ, ຮັກສາສັນຕິພາບສະຫະປະຊາຊາດ, ແກ້ໄຂຜົນຮ້າຍຢ້ອນຫຼັງຈາກສົງຄາມ... ທ່ານພົນເອກ ໂງຊວນລິກ ເຊື່ອໝັ້ນວ່າໃນອາຍຸການຂອງທ່ານນາງ Deborah Paul, ການພົວພັນຮ່ວມມືດ້ານປ້ອງກັນຊາດສອງຝ່າຍລະຫວ່າງສອງປະເທດສືບຕໍ່ພັດທະນາຢ່າງສະດວກ, ປະກອບສ່ວນຢ່າງຕັ້ງໜ້າເຂົ້າໃນການພົວພັນຄູ່ຮ່ວມມືຮອບດ້ານ ຫວຽດນາມ- ການາດາ.
|
|
ບັນຍາກາດທີ່ການຕ້ອນຮັບ. ພາບ: qdnd.vn. |
ທ່ານນາງ Deborah Paul ເນັ້ນໜັກວ່າ ການາດາ ປາດຖະໜາຢາກພັດທະນາການພົວພັນກັບຫວຽດນາມ ກໍ່ຄືປະເທດຕ່າງໆໃນອາຊຽນ. ທ່ານນາງ Deborah Paul ກໍ່ຢັ້ງຢືນວ່າ ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອຊຸກຍູ້ການພົວພັນຮ່ວມມືຫວຽດນາມ-ການາດາ ໃນຫຼາຍຂົງເຂດ, ໃນນັ້ນມີຂົງເຂດການປ້ອງກັນຊາດນັບມື້ນັບພັດທະນາ, ເຂົ້າສູ່ເນື້ອແທ້.
ໂດຍ: ສົມເພັດ