ການຢ້ຽມຢາມໄດ້ດໍາເນີນໄປໃນໄລຍະທີ່ສອງປະເທດ, ສອງກອງທັບ ຈັດຕັ້ງຫຼາຍກິດຈະກໍາເຄື່ອນໄຫວທີ່ມີຄວາມໝາຍໃນ “ປີສາມັກຄີມິດຕະພາບ ຫວຽດນາມ-ລາວ, ລາວ-ຫວຽດນາມ 2022” ແນໃສ່ສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ (5-9-1962 / 5-9-2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະການຮ່ວມມື (18-7-1977 / 18-7-2022) ລະຫວ່າງສອງປະເທດ. ສາມາດຢັ້ງຢືນໄດ້ວ່າ, ຫວຽດນາມ ແລະລາວ ຍາມໃດກໍສະໜັບສະໜູນເຊິ່ງກັນ ແລະກັນ,  ຊ່ວຍເຫຼືອກັນຢ່າງໃຫຍ່ຫຼວງ, ລໍ້າຄ່າ, ໝົດຈິດໝົດໃຈ, ບໍລິສຸດຜຸດຜ່ອງ ແລະມີປະສິດທິຜົນໃນຕະຫຼອດວິວັດການຕໍ່ສູ້ຍາດເອົາເອກະລາດແຫ່ງຊາດ ໃນເມື່ອກ່ອນ ກໍຄືໃນພາລະກິດປ່ຽນແປງໃໝ່, ສ້າງສາ ແລະພັດທະນາປະເທດຊາດໃນປັດຈຸບັນ, ເຖິງວ່າສະພາບການໂລກ ແລະພາກພື້ນມີການຜັນແປຢ່າງໄວວາ, ສັບສົນ ກໍຕາມ, ແຕ່ປະຊາຊົນສອງປະເທດ ຍັງມີຄວາມປິຕິຊົມຊື່ນ ແລະພາກພູມໃຈ ເມື່ອເຫັນວ່າ ການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ຫວຽດນາມ-ລາວ, ລາວ-ຫວຽດນາມ ໂດຍ ປະທານ ໂຮ່ຈີມິນ ຜູ້ນໍາທີ່ຍິ່ງໃຫຍ່ ແລະປະທານ ໄກສອນ ພົມວິຫານ, ປະທານ ສຸພານຸວົງ ທີ່ແສນເຄົາລົບຮັກ ເປັນຜູ້ກໍ່ຕັ້ງ, ຖະໜຸຖະໜອມ, ການນໍາຮຸ່ນຕ່າງໆຂອງສອງພັກ, ສອງລັດ ແລະປະຊາຊົນສອງປະເທດ ໄດ້ເພີ່ມພູນຄູນສ້າງ, ໄດ້ຮັບການປັັບປຸງ ແລະພັດທະນາຢ່າງບໍ່ຢຸດຢັ້ງ, ນັບມື້ນັບ ເຂົ້າສູ່ລວງເລິກ, ແທດຈິງ ແລະມີປະສິດທິຜົນໃນທຸກຂົງເຂດ.

leftcenterrightdel
ພົນເອກ ເລືອງເກື່ອງ ພົບປະເຈລະຈາກັບ ພົນຕີ (ປັດຈຸບັນແມ່ນພົນໂທ) ທອງລອຍ ສີລິວົງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບປະຊາຊົນ ລາວ ໃນການຢ້ຽມຢາມຫວຽດນາມ ຢ່າງເປັນທາງການ, ເດືອນ ມີນາ ປີ 2019. ພາບ: ຈ້ອງຫາຍ.

ໃນສະພາບການຮ່ວມມືດ້ານປ້ອງກັນຊາດ ໄດ້ຮັບການກໍານົດວ່າແມ່ນເສົາຄໍ້າໜຶ່ງທີ່ມີຄວາມສໍາຄັນຂອງການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານຫວຽດນາມ-ລາວ, ລາວ-ຫວຽດນາມ, ວຽກງານພັກ, ວຽກງານການເມືອງ ແມ່ນໜຶ່ງໃນບັນດາຂົງເຂດສໍາຄັນພິເສດໃນການຮ່ວມມືລະຫວ່າງກອງທັບສອງປະເທດ. ໃນໄລຍະຜ່ານມາ, ການຮ່ວມມືລະຫວ່າງກົມໃຫຍ່ການເມືອງກອງທັບປະຊາຊົນຫວຽດນາມ ແລະກົມໃຫຍ່ການເມືອງກອງທັບປະຊາຊົນ ລາວ ໄດ້ຮັບການຜັນຂະຫຍາຍຢ່າງຮອບດ້ານ, ລົງເລິກ, ແທດຈິງ ແລະມີປະສິດທິຜົນ, ຕາມນັ້ນແລ້ວ, ສອງຝ່າຍໄດ້ສົມທົບກັນຢ່າງແໜ້ນແຟ້ນ, ໂຄສະນາກ່ຽວກັບການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ, ກອງທັບ ແລະປະຊາຊົນສອງປະເທດ ຢ່າງມີຊີວິດຊີວາ, ໃນນັ້ນຕ້ອງເວົ້າເຖິງການພົບປະແລກປ່ຽນມິດຕະພາບຢູ່ເຂດຊາຍແດນ ຫວຽດນາມ-ລາວ ຄັ້ງທີໜຶ່ງ ແລະການເຄື່ອນໄຫວໃນຂອບເຂດ “ປີສາມັກຄີມິດຕະພາບ ຫວຽດນາມ-ລາວ, ລາວ-ຫວຽດນາມ 2022”.

leftcenterrightdel
ພົນເອກ ເລືອງເກື່ອງ ແລະພົນຕີ (ປັດຈຸບັນແມ່ນພົນໂທ) ທອງລອຍ ສີລິວົງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບປະຊາຊົນ ລາວ ພ້ອມດ້ວຍສະມາຊິກຄະນະຜູ້ແທນການເມືອງຂັ້ນສູງກອງທັບປະຊາຊົນສອງປະເທດ ໃນການຢ້ຽມຢາມ ຫວຽດນາມ ຢ່າງເປັນທາງການ, ເດືອນມີນາ ປີ 2019. ພາບ: ຈ້ອງຫາຍ.

ບັນດາອົງການ, ກົມກອງຂອງສອງຝ່າຍ ໄດ້ຈັດຕັ້ງຫຼາຍຄະນະ ຢ້ຽມຢາມ ແລະເຮັດວຽກ, ຝຶກອົບຮົມ, ແບ່ງປັນບົດຮຽນວິຊາສະເພາະ ຜັນຂະຫຍາຍໜ້າທີ່ວຽກງານພັກ, ວຽກງານການເມືອງ. ວຽກງານຊອກຄົ້ນ, ທ້ອນໂຮມ ແລະຈັດສົ່ງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ລາວ ກັບຄືນປະເທດ ຍາມໃດກໍໄດ້ຮັບການເອົາໃຈໃສ່ຜັນຂະຫຍາຍ, ຕອບສະໜອງຕາມຄວາມມຸ່ງມາດປາດຖະໜາ, ຄວາມຄອງຄອຍຂອງຄອບຄົວ, ຍາດຕິພີ່ນ້ອງຂອງບັນດານັກຮົບເສຍສະຫຼະຊີວິດເພື່ອຊາດ. ການຮ່ວມມືບໍາລຸງສ້າງຊັບພະຍາກອນມະນຸດ ບັນລຸໝາກຜົນອັນພົ້ນເດັ່ນ, ເປັນຕົ້ນແມ່ນເລື່ອງກອງທັບສອງປະເທດ ໄດ້ສົມທົບກັນກໍ່ສ້າງໂຄງການສໍາຄັນ ຄື ໂຮງຮຽນທິດສະດີການເມືອງ ແລະໂຮງຮຽນວັດທະນະທໍາຊົນເຜົ່າກອງທັບປະຊາຊົນ ລາວ, ກາຍເປັນສັນຍາລັກແຫ່ງການຮ່ວມມືດ້ານປ້ອງກັນຊາດສອງຝ່າຍເວົ້າລວມ, ເວົ້າສະເພາະແມ່ນການຮ່ວມມືດ້ານວຽກງານພັກ, ວຽກງານການເມືອງ. ໄປຄຽງຄູ່ກັນນັ້ນແມ່ນການເສີມຂະຫຍາຍບັນດາຮູບການພົບປະແລກປ່ຽນ,  ແຮກສ່ຽວຢ່າງມີປະສິດທິຜົນ, ຜ່ານນັ້ນແຜ່ຂະຫຍາຍນໍ້າໃຈສາມັກຄີມິດຕະພາບ, ການໜູນຊ່ວຍເຊິ່ງກັນແລະກັນລະຫວ່າງກອງທັບ ແລະປະຊາຊົນສອງ ປະເທດ, ໂດຍສະເພາະແມ່ນຢູ່ເຂດຊາຍແດນຫວຽດນາມ-ລາວ, ລາວ-ຫວຽດນາມ.   

ບົນພື້ນຖານໝາກຜົນດັ່ງກ່າວນັ້ນ, ພວກເຮົາເຊື່ອໝັ້ນຢ່າງແນວແນ່ວ່າ ການຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ພົນເອກ ເລືອງເກື່ອງ ແລະຄະນະຜູ້ແທນການເມືອງຂັ້ນສູງກອງທັບປະຊາຊົນຫວຽດນາມ ຈະປະສົບຜົນສໍາເລັດຢ່າງຈົບງາມ, ປະກອບສ່ວນສໍາຄັນເຂົ້າໃນການພັດທະນາຢ່າງບໍ່ຢຸດຢັ້ງຂອງການພົວພັນສາມັກຄີພິເສດລະຫວ່າງສອງພັກ, ສອງລັດ, ກອງທັບ ແລະປະຊາຊົນສອງປະເທດ.

ໂດຍ: ໄຊຊະນະ