ການເຈລະຈານະໂຍບາຍປ້ອງກັນຊາດຫວຽດນາມ - ຍີ່ປຸ່ນ ຄັ້ງທີ 8
ກປ.ອອນໄລ - ໃນຂອບເຂດການຢ້ຽມຢາມຍີ່ປຸ່ນ ຢ່າງເປັນທາງການຂອງທ່ານ ຟ້າມມິງຈີ໊ງ ນາຍົກລັດຖະມົນຕີຫວຽດນາມ, ຕອນບ່າຍວັນທີ 23 ພະຈິກ, ທີ່ສໍານັກງານກະຊວງປ້ອງກັນປະເທດຍີ່ປຸ່ນ, ທ່ານພົນໂທ ຮວ່າງຊວນຈ໊ຽນ ຮອງລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານ Tsuchimichi Akihiro ຮອງລັດຖະມົນຕີກະຊວງປ້ອງກັນປະເທດຍີ່ປຸ່ນ ໄດ້ເປັນປະທານຮ່ວມການເຈລະຈານະໂຍບາຍປ້ອງກັນຊາດ ຫວຽດນາມ-ຍີ່ປຸ່ນ ຂັ້ນຮອງລັດຖະມົນຕີກະຊວງປ້ອງກັນປະເທດ ຄັ້ງທີ 8.
ທີ່ການເຈລະຈາ, ຮອງລັດຖະມົນຕີສອງທ່ານ ຕີລາຄາສູງຄວາມມານະພະຍາຍາມຂອງທັງສອງຝ່າຍ, ຜ່ານຜ່າຜົນສະທ້ອນຈາກພະຍາດໂຄວິດ-19, ຜັນຂະຫຍາຍການຮ່ວມມືຢ່າງມີປະສິດທິຜົນບົນຈິດໃຈຜົນການເຈລະຈານະໂຍບາຍປ້ອງກັນຊາດ ຄັ້ງທີ 7 (ເດືອນພະຈິກ 2019) ໃນຫຼາຍຂົງເຂດ ຄື: ຮັກສາການເຄື່ອນໄຫວພົບປະແລກປ່ຽນ (ທັງຜ່ານທາງອອນລາຍ ແລະໂດຍກົງ), ຮັກສາສັນຕິພາບ ສປຊ, ການຮ່ວມມືຖ່າຍທອດວັດຖຸອຸປະກອນ ແລະເຕັກໂນໂລຢີປ້ອງກັນຊາດ, ຄວາມໝັ້ນຄົງທາງອິນເຕີເນັດ, ເສນາຮັກ, ຍົກສູງກໍາລັງຄວາມສາມາດປະຕິບັດກົດໝາຍບົນທະເລ ແລະການເຄື່ອນໄຫວສົມທົບກັນໃນເວທີປາໄສຫຼາຍຝ່າຍ, ໂດຍສະເພາະແມ່ນບັນດາກົນໄກ, ເວທີປາໄສ ໂດຍ ອາຊຽນ ຊັກນໍາ ຄື: ADMM+, ARF.
|
|
ທ່ານພົນໂທ ຮວ່າງຊວນຈ໊ຽນ ແລະທ່ານ Tsuchimichi Akihiro ທີ່ພິທີລົງນາມ. ພາບ: AP |
ທ່ານຮອງລັດຖະມົນຕີ ຮວ່າງຊວນຈ໊ຽນ ຊົມເຊີຍເລື່ອງຍີ່ປຸ່ນ ສົມທົບ, ໜູນຊ່ວຍຫວຽດນາມ ໃນການຜັນຂະຫຍາຍກໍາລັງເຂົ້າຮ່ວມການເຄື່ອນໄຫວຮັກສາສັນຕິພາບ ເຖິງຄະນະປະຕິບັດງານຂອງ ສປຊ; ສະເໜີກະຊວງປ້ອງກັນປະເທດຍີ່ປຸ່ນ ສືບຕໍ່ພິຈາລະນາ, ໜູນຊ່ວຍແກ້ໄຂຜົນຮ້້າຍຢ້ອນຫຼັງຈາກລູກລະເບີດບໍ່ທັນແຕກ, ວັດຖຸລະເບີດ, ລ້າງພິດດີໂອຊິນ ທີ່ຍັງຕົກຄ້າງຫຼັງສົງຄາມຢູ່ຫວຽດນາມ; ທ່ານ ຢັ້ງຢືນວ່າ ກະຊວງປ້ອງກັນປະເທດຫວຽດນາມ ສະໜັບສະໜູນຍີ່ປຸ່ນ ຕັ້ງໜ້າເຂົ້າຮ່ວມກົນໄກຮ່ວມມືດ້ານປ້ອງກັນຊາດຫຼາຍຝ່າຍ ໂດຍ ອາຊຽນ ສວມບົດບາດໃຈກາງ, ບົນພື້ນຖານຄວາມເຫັນດີເຫັນພ້ອມຂອງອາຊຽນ ແລະປະກອບສ່ວນເພື່ອສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນ ແລະໃນໂລກ.
ພາຍຫຼັງການເຈລະຈາ, ຮອງລັດຖະມົນຕີສອງທ່ານໄດ້ເປັນປະທານຮ່ວມພິທີລົງນາມໃນບົດບັນທຶກຊ່ວຍຈໍາລະຫວ່າງກະຊວງປ້ອງກັນປະເທດຫວຽດນາມ ແລະກະຊວງປ້ອງກັນປະເທດຍີ່ປຸ່ນ ວ່າດ້ວຍການຮ່ວມມືໃນຂົງເຂດເສນາຮັກ ແລະບົດບັນທຶກຊ່ວຍຈໍາລະຫວ່າງກະຊວງປ້ອງກັນປະເທດຫວຽດນາມ ແລະກະຊວງປ້ອງກັນປະເທດຍີ່ປຸ່ນ ວ່າດ້ວຍການຮ່ວມມືໃນຂົງເຂດຄວາມໝັ້ນຄົງທາງອິນເຕີເນັດ ໂດຍພາຍໃຕ້ການເປັນສັກຂີພິຍານຂອງລັດຖະມົນຕີກະຊວງປ້ອງກັນປະເທດຂອງສອງປະເທດ.
ໂດຍ: ໄຊຊະນະ