ສະຫຼຸບວຽກງານແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ແລະທາດພິດສີສົ້ມ ໄລຍະ 2016-2020
ກປ.ອອນໄລ - ຕອນເຊົ້າວັນທີ 8 ມັງກອນ, ທີ່ຮ່າໂນ້ຍ, ອົງການປະຈໍາຄະນະຊີ້ນໍາລະດັບຊາດກ່ຽວກັບການແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ແລະທາດພິດເຄມີທີ່ຕົກຄ້າງຫຼັງສົງຄາມຢູ່ຫວຽດນາມ (ຄະນະຊີ້ນໍາ 701) ໄດ້ຈັດກອງປະຊຸມສະຫຼຸບວຽກງານແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ແລະທາດພິດສີສົ້ມ/ດີໂອຊິນທີ່ຕົກຄ້າງຫຼັງສົງຄາມຢູ່ຫວຽດນາມ ໄລຍະ 2016-2020, ວາງອອກທິດທາງ, ໜ້າທີ່ຈຸດສຸມໃນໄລຍະ 2021-2025. ທ່ານພົນໂທ ຫງວຽນຈີ້ວິ້ງ, ຄະນະປະຈໍາຄະນະພັກການທະຫານສູນກາງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າອົງການປະຈໍາຄະນະຊີ້ນໍາ 701 ເປັນປະທານກອງປະຊຸມ.
|
|
ບັນຍາກາດທີ່ກອງປະຊຸມ. ພາບ: ວັນຈ້ຽນ. |
ກ່າວຄໍາເຫັນທີ່ກອງປະຊຸມ, ທ່ານພົນໂທ ຫງວຽນຈີ້ວິ້ງ ຮຽກຮ້ອງໃຫ້ຄະນະຊີ້ນໍາ 701 ສືບຕໍ່ຍູ້ແຮງວຽກງານແກ້ໄຂຜົນຮ້າຍຢ້ອນຫຼັງຈາກທາດພິດສີສົ້ມ. ກ່ອນອື່ນໝົດແມ່ນສຸມໃສ່ປັບປຸງບັນດາເອກະສານກ່ຽວກັບການຮັບປະກັນລະບອບ, ນະໂຍບາຍ, ມາດຕະການໜູນຊ່ວຍສໍາລັບຜູ້ທີ່ເຂົ້າຮ່ວມການຕໍ່ຕ້ານທີ່ຖືກຕິດທາດພິດສີສົ້ມ ແລະຄົນຮຸ່ນຫຼັງທີ່ຖືກຜົນສະທ້ອນ. ຍູ້ແຮງວຽກງານໂຄສະນາ, ລະດົມບັນດາແຫຼ່ງກໍາລັງພາຍໃນ ແລະຕ່າງປະເທດ ເພື່ອແກ້ໄຂຜົນຮ້າຍຢ້ອນຫຼັງຈາກລູກລະເບີດບໍ່ທັນແຕກ ແລະທາດພິດສີສົ້ມ; ຈັດຕັ້ງການປະຕິບັດບັນດາໂຄງການກໍາຈັດດີໂອຊິນ, ໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມ, ໂຄງການເກັບກູ້ລູກລະເບີດບໍ່ທັນແຕກຮັບປະກັນຄວາມຄືບໜ້າ, ຄຸນນະພາບ, ປະສິດທິຜົນ. ໃນວິວັດການປະຕິບັດຕ້ອງຮັບປະກັນຄວາມປອດໄພຢ່າງເດັດຂາດ; ປະຕິບັດບັນດາຂໍ້ກໍານົດກ່ຽວກັບການຄຸ້ມຄອງການລົງທຶນພາກລັດ, ຄຸ້ມຄອງ, ນໍາໃຊ້ແຫຼ່ງທຶນ ODA ຢ່າງເຂັ້ມງວດ. ສຸມໃສ່ປະຕິບັດການກໍາຈັດທາດພິດສີສົ້ມຢູ່ບັນດາສະຖານທີ່ຖືກມົນລະພິດທີ່ໄດ້ຄົ້ນພົບໃຫ້ສໍາເລັດ; ສືບຕໍ່ສຳຫຼວດ, ຕີລາຄາສະພາບທາດພິດສີສົ້ມທີ່ຍັງຕົກຄ້າງຢູ່ບັນດາເຂດຖືກພົ່ນຢາຍ ແລະບັນດາບ່ອນທີ່ສົງໄສວ່າມີທາດພິດສີສົ້ມ. ພ້ອມກັນນັ້ນ, ສືບຕໍ່ຄົ້ນຄວ້າພື້ນຖານນິຕິກໍາ, ພື້ນຖານວິທະຍາສາດ, ສະພາບຕົວຈິງເພື່ອຕໍ່ສູ້ຍາດເອົາສິດຜົນປະໂຫຍດ ແລະຄວາມຍຸຕິທໍາໃຫ້ແກ່ຜູ້ປະສົບເຄາະຮ້າຍຈາກທາດພິດສີສົ້ມ/ດີໂອຊິນ.
ໂດຍ: ໄຊຊະນະ