ປະກອບສ່ວນຊຸກຍູ້ການເຄື່ອນໄຫວການຕ່າງປະເທດປະຊາຊົນ ຫວຽດນາມ - ກໍາປູເຈຍ
ກປ.ອອນໄລ - ຕອນເຊົ້າວັນທີ 21 ພະຈິກ, ທີ່ນະຄອນບັກຢາງ, ແຂວງບັກຢາງ, ສູນກາງສະມາຄົມມິດຕະພາບຫວຽດນາມ - ກໍາປູເຈຍ, ສະຫະພັນບັນດາອົງການຈັດຕັ້ງມິດຕະພາບຫວຽດນາມ ໄດ້ສົມທົບກັບສະຫະພັນບັນດາອົງການຈັດຕັ້ງມິດຕະພາບແຂວງບັກຢາງ ແລະສະມາຄົມມິດຕະພາບຫວຽດນາມ - ກໍາປູເຈຍແຂວງບັກຢາງ ຈັດຕັ້ງກອງປະຊຸມຫົວເລື່ອງສະເພາະກ່ຽວກັບວຽກງານກໍ່ສ້າງອົງການຈັດຕັ້ງ ແລະການເຄື່ອນໄຫວສະມາຄົມຢູ່ບັນດາແຂວງ, ນະຄອນທີ່ບໍ່ມີຊາຍແດນຕິດກັບກໍາປູເຈຍ.
|
|
ທ່ານນາງເອກອັກຄະລັດຖະທູດ ຫງວຽນເຟືອງງາ ກ່າວຄໍາເຫັນທີ່ກອງປະຊຸມ. ພາບ: ວັນຮ໊ຽວ. |
ທີ່ກອງປະຊຸມ, ບັນດາຜູ້ແທນໄດ້ຢັ້ງຢືນບົດບາດສໍາຄັນຂອງບັນດາສະມາຄົມທ້ອງຖິ່ນໃນການຊຸກຍູ້, ເພີ່ມທະວີການເຄື່ອນໄຫວການຕ່າງປະເທດປະຊາຊົນລະຫວ່າງສອງປະເທດ, ຜ່ານນັ້ນສືບຕໍ່ໃຫ້ກາຍເປັນຂົວຕໍ່ທີ່ສໍາຄັນ, ປະກອບສ່ວນເຮັດໃຫ້ການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງປະຊາຊົນຫວຽດນາມ ແລະກໍາປູເຈຍ ເວົ້າລວມກໍຄືປະຊາຊົນບັນດາແຂວງ, ນະຄອນຂອງຫວຽດນາມ ກັບປະຊາຊົນບັນດາທ້ອງຖິ່ນຂອງກໍາປູເຈຍ ເວົ້າສະເພາະໃຫ້ເລິກເຊິ່ງຂຶ້ນຕື່ມ. ໃນໄລຍະຜ່ານມາ, ບັນດາສະມາຄົມທ້ອງຖິ່ນໄດ້ປະຕິບັດວຽກງານກຸສົນ, ໜູນຊ່ວຍບັນດາເຂດປະສົບກັບຄວາມຫຍຸ້ງຍາກຢູ່ກໍາປູເຈຍ, ຕັ້ງໜ້າເຂົ້າຮ່ວມລາຍການ “ປູກຝັງໄມຕີຈິດມິດຕະພາບ” ຮັບດູແລເບິ່ງແຍງນັກສຶກສາກໍາປູເຈຍ.
|
|
ບັນຍາກາດທີ່ກອງປະຊຸມ. ພາບ: ວັນຮ໊ຽວ. |
ຄຽງຂ້າງນັ້ນ, ບັນດາບົດປະກອບຄໍາເຫັນກໍເນັ້ນໜັກວ່າ, ດ້ວຍບັນດາຮູບການທີ່ອຸດົມສົມບູນ, ມີປະສິດທິຜົນ, ບັນດາອົງການຈັດຕັ້ງສະມາຄົມທ້ອງຖິ່ນໄດ້ຕັ້ງໜ້າຊ່ວຍເຫຼືອສະມາຊິກຂອງສະມາຄົມລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ຈັດຕັ້ງການພົບປະສັງສັນເນື່ອງໃນໂອກາດວັນບຸນ, ວັນສໍາຄັນຕ່າງໆ, ຈັດຕັ້ງການຢ້ຽມຢາມສະໜາມຮົບເກົ່າໃຫ້ແກ່ຄະນະຜູ້ແທນ, ເຂົ້າຮ່ວມການເຄື່ອນໄຫວຕອບບຸນແທນຄຸນ, ຊອກຫາອັດຖິເພື່ອນຮ່ວມກົມກອງທີ່ເສຍສະຫຼະຊີວິດໃນປາງສົງຄາມຢູ່ກໍາປູເຈຍ... ຜ່ານນັ້ນເປັນການປະກອບສ່ວນປັບປຸງ, ພັດທະນາສະມາຄົມໃຫ້ນັບມື້ນັບໝັ້ນຄົງເຂັ້ມແຂງ.
ໂດຍ: ໄຊຊະນະ