ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບເອກອັກຄະລັດຖະທູດໄທ
ກປ.ອອນໄລ - ຕອນບ່າຍວັນທີ 3 ກັນຍາ, ທີ່ສໍານັກງານກະຊວງປ້ອງກັນປະເທດ, ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ຕ້ອນຮັບທ່ານ Tanee Sangrat ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງລາຊະອານາຈັກໄທ ປະຈໍາ ຫວຽດນາມ ເຂົ້າຢ້ຽມຂໍ່ານັບເນື່ອງໃນໂອກາດຫາກໍ່ມາຮັບອາຍຸການປະຕິບັດງານທາງການທູດຢູ່ຫວຽດນາມ.
ທີ່ການຕ້ອນຮັບ, ທ່ານພົນເອກ ໂງຊວນລິກ ເຊື່ອໝັ້ນວ່າໄທ ຈະປະສົບຜົນສໍາເລັດໃນບົດບາດເປັນປະທານອາຊຽນ ປີ 2019 ເປັນຢ່າງດີ, ສືບຕໍ່ເສີມຂະຫຍາຍບົດບາດຂອງຕົນໃນການເພີ່ມທະວີສາມັກຄີພາຍໃນ, ຮັກສາບົດບາດໃຈກາງຂອງອາຊຽນ ແລະສ້າງປະຊາຄົມອາຊຽນ ໃຫ້ນັບມື້ນັບເຂັ້ມແຂງ.
    |
 |
|
ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບທ່ານ Tanee Sangrat ເອກອັກຄະລັດຖະທູດໄທ. ພາບ: ມີ້ແຮ້ງ |
ທ່ານພົນເອກ ໂງຊວນລິກ ກໍ່ຢັ້ງຢືນວ່າ, ລັດຖະບານຫວຽດນາມ ເວົ້າລວມ ແລະກະຊວງປ້ອງກັນປະເທດຫວຽດນາມ ເວົ້າສະເພາະຈະສືບຕໍ່ສະໜັບສະໜູນໄທ ດໍາລົງຕໍາແໜ່ງເປັນປະທານອາຊຽນ ປີ 2019 ໃຫ້ສຳເລັດ. ລັດຖະບານຫວຽດນາມ ຫວັງວ່າໄທ ຈະຕັ້ງໜ້າສະໜັບສະໜູນຫວຽດນາມ ເປັນປະທານອາຊຽນ ໃນປີ 2020.
ທ່ານ Tanee Sangrat ເອກອັກຄະລັດຖະທູດໄທ ເນັ້ນໜັກວ່າ, ໃນຖານະຕໍາແໜ່ງວຽກງານໃໝ່ຈະສືບຕໍ່ມີການປະກອບຢ່າງຕັ້ງໜ້າໃນການຊຸກຍູ້ ແລະພັດທະນາການພົວພັນຄູ່ຮ່ວມມືຍຸດທະສາດລະຫວ່າງສອງປະເທດຫວຽດນາມ ແລະໄທ, ໃນນັ້ນມີການພົວພັນດ້ານປ້ອງກັນຊາດ. ໄທ ຈະສະໜັບສະໜູນຈົນສຸດຄວາມສາມາດເພື່ອໃຫ້ຫວຽດນາມ ດໍາລົງຕໍາແໜ່ງເປັນປະທານອາຊຽນ ໃນປີ 2020 ແລະເປັນກໍາມະການບໍ່ປະຈໍາການສະພາຄວາມໝັ້ນຄົງສະຫະປະຊາຊາດ ອາຍຸການ 2020-2021, ເຊື່ອໝັ້ນວ່າຫວຽດນາມ ຈະປະສົບຜົນສໍາເລັດໃນບັນດາຖານະຕໍາແໜ່ງນີ້.
ໂດຍ: ກວຽດເຕິມ